ភ្នំពេញ ៖ នារីម្នាក់ជិះម៉ូតូចេញពីសាលាត្រឡប់ទៅផ្ទះជុំគ្នាជាមួយមិត្តភ័ក្តិ២-៣ម៉ូតូទៀតមិនប្រយ័ត្ន ក៏ជ្រុលទៅបុករថយន្តលុចស៊ីសមួយគ្រឿងបត់ឆ្លងផ្លូវចំពេញទំហឹងបណ្ដាលអោយរងរបួសធ្ងន់ ហេតុការណ៍នេះបានកើតឡើងកាលពីវេលាម៉ោង១០និង១០នាទីយប់ថ្ងៃទី១៨ខែធ្នូឆ្នាំ២០១៤ ត្រង់ចំណុចផ្លូវព្រះនរោត្ដមកែងផ្លូវលេខ៣៧០ស្ថិតក្នុងសង្កាត់បឹងកេងកង១ ខណ្ឌចំការមន។
បើតាមសម្ដីមិត្តភ័ក្តិជនរងគ្រោះបានអោយដឹងថា មុនពេលកើតហេតុនារីរងគ្រោះជិះម៉ូតូមួយគ្រឿង ម៉ាកហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខ ភ្នំពេញ 1AB-8064 ចេញពីសកលវិទ្យាល័យ បៀលប្រាយធ្វើដំណើរតាមបណ្ដោយផ្លូវព្រះនរោត្ដម បំណងទៅផ្ទះទិសដៅពីជើងទៅត្បូង ក្នុងល្បឿន លឿនជុំគ្នាជាមួយមិត្តភ័ក្តិ២-៣ម៉ូតូទៀត ស្រាប់តែមកដល់
ចំណុចកើតហេតុក៏មានរថយន្តមួយគ្រឿង ម៉ាកលុចស៊ីសGS300 ពណ៌ស ពាក់ស្លាកលេខ ភ្នំពេញ 2X-8987 ធ្វើដំណើរច្រាស់ទិសគ្នាហើយបាន បត់ឆ្វេងឆ្លងផ្លូវយ៉ាងលឿនធ្វើអោយនារីរងគ្រោះចាប់ហ្វ្រាំងមិនទាន់ក៏ជ្រុលទៅបុករថយន្តចំជំហៀងខាងស្ដាំពេញទំហឹងបណ្ដាលអោយនារីរងគ្រោះរងរបួសធ្ងន់សន្លប់ស្ដូកស្ដឹង ហើយរថយន្តនិងម៉ូតូ រងការខូចខាតទាំងសងខាង។
បន្ទាប់ពីកើតហេតុភាគីខាងរថយន្តក៏បានឈប់រថយន្តនិងបានជួយបញ្ជូនជនរងគ្រោះទៅមន្ទីរពេទ្យ បាយ័ន ដើម្បីព្យាបាលរបួសភ្លាមៗហើយសមត្ថកិច្ចមូលដ្ឋានក៏បានចុះមកអន្តរាគមន៍ ធ្វើការវាស់វែង យករថយន្តនិងម៉ូតូទៅរក្សាទុកនៅអធិការដ្ឋាននគរបាលខណ្ឌចំការមនធ្វើការដោះស្រាយតាមផ្លូវច្បាប់
