សៀមរាប នៅថ្ងៃទី១៨ខែធ្នូឆ្នាំ២០១៤នេះនៅសាលាស្រុកអង្គរជុំ ខេត្តសៀមរាបមានប្រារព្ធធ្វើវេទិកាផ្សព្វផ្សាយនិងពិគ្រោះយោបល់របស់ក្រុមប្រឹក្សាខេត្តសៀមរាប អាណត្តិទី២ ឆ្នាំ២០១៤ ក្រោមអធិបតីភាពលោកនូផល្លាប្រធានក្រុមប្រឹក្សាខេត្តលោកម៉ៅវុឌ្ឍី អភិបាលរងនៃគណៈអភិបាលខេត្តដោយមានការនិមន្តអញ្ជើញចូលរួមពីព្រះសង្ឃ ថ្នាក់ដឹកនាំមន្ទីរអង្គភាពតំណាងអង្គការសង្គមស៊ីវិល មាតាបិតាសិស្សសិស្សានុសិស្ស អាជ្ញាធរ និង ប្រជាពលរដ្ឋមកពីក្រុង ស្រុក មានស្រុកស្រីស្នំ ស្រុកវ៉ារិន និង ស្រុកអង្គរជុំ ចំនួន ៥១៩ នាក់ ស្ត្រី ១៣០នាក់។
វេទិកានេះ មានគោលបំណង ដើម្បីផ្តល់ឱកាសជូនដល់បងប្អូនប្រជាពលរដ្ឋ អ្នកពាក់ព័ន្ធទាំងអស់ ដែលបាន មកពីក្រុង ស្រុកទាំងបី បានស្វែងយល់ពីស្ថានភាពទូទៅ នៃការអភិវឌ្ឍខេត្ត ក្រុង ស្រុក ឃុំ សង្កាត់ និង បញ្ហាប្រឈម ដែលកើតកន្លង ហើយវេទិកានេះ នឹងផ្តល់ឱកាស ក្នុងការបញ្ចេញមតិយោបល់របស់ខ្លួនពាក់ព័ន្ធនឹងកង្វល់ សំណូមពរ តម្រូវការជាក់ស្តែងក្នុងមូលដ្ឋាន ។
មានប្រសាសន៍បើកអង្គវេទិកានោះលោក នូ ផល្លា ប្រធានក្រុមប្រឹក្សាខេត្តដោយបានគូបញ្ជាក់ នូវគោល បំណងសំខាន់ៗ ក្នុងការផ្តល់ព័ត៌មាន ជូនប្រជាពលរដ្ឋអំពីសមិទ្ធល ដែលក្រុមប្រឹក្សាសម្រេចបានកន្លងមក បញ្ហា ប្រឈមនិង អំពីបញ្ហាអាទិភាពនៃការអភិវឌ្ឍរបស់ក្រុមប្រឹក្សាសម្រាប់ឆ្នាំបន្ទាប់ និង ផ្តល់ឱកាសជូនប្រជាពលរដ្ឋ ក្នុង ការផ្តល់យោបល់ ការពិភាក្សាលើខ្លឹមសារ និង របាយការណ៍ ព្រមទាំងទទួលយកនូវអនុសាសន៍ សំណូមពររបស់ ប្រជាពលរដ្ឋ ដើម្បីពិនិត្យ ពិភាក្សា ដោះស្រាយនិង ជម្រុញឲ្យមានការចូលរួម និង បង្កើនភាពសិ្នទ្ធស្នាលរវាងអ្នក ផ្តល់សេវាសាធារណៈ ឲ្យកាន់តែមានភាពល្អប្រសើរឡើង ។
បន្ទាប់ពីសមាជិកក្រុមប្រឹក្សាខេត្តធ្វើការអាននូវបទបញ្ជាផ្ទៃក្នុង និង បង្ហាញពីតួនាទី ភារកិច្ច សិទ្ធិអំណាចរបស់ ក្រុមប្រឹក្សា និង ទិដ្ឋាភាពរួម នៃការអភិវឌ្ឃនៅដែនសមត្ថកិច្ចឆ្នាំ២០១៥.២០១៩ និង ការបង្ហាញរបស់លោកម៉ៅ វុឌ្ឍី អភិបាលរងនៃគណៈអភិបាលខេត្ត ស្តីពីសមទ្ធិផល និង បញ្ហាប្រឈមក្នុងឆ្នាំ២០១៤ ។ 
ក្នុងសំណួរសំណូមពរ និង ចម្លើយ ដែលសមាជិកអង្គវេទិកាបានលើកឡើងពីទុក្ខកង្វល់របស់ពួកគាត់នៅ តាម មូលដ្ឋាន ដោយផ្តោតទៅលើ បញ្ហាដីធ្លី បរិស្ថាន បញ្ហាអត្រានុកូលដ្ឋាន ការធ្វើចំណាកស្រុក បញ្ហាផ្លូវថ្នល់ អគ្គិសនី បញ្ហាតម្លៃកសិផលទាប និង ការកំណត់ព្រំប្រទល់រដ្ឋបាលរវាងស្រុក និងស្រុក ខេត្តនិងខេត្ត និង បញ្ហាសេវាសុខាភិបាល ការងារអប់រំសិក្សា និង សេវាសាធារណៈ ព្រមទាំងការងារសន្តិសុខ ផ្តោតលើបញ្ហាគ្រឿងញៀន ល្បែងស៊ីសងជាដើម ។ ក្នុងនោះក៏មានលើក នូវសំណួរ និង សំណូមពរ របស់សមាជិកអង្គវេទិកាជាលាយល័ក្ខអក្សរដាក់ប្រអប់បានលើកឡើង ពាក់ព័ន្ធទៅនឹងការងារសេដ្ឋកិច្ច ,សង្គមកិច្ច, ការងារគ្រប់គ្រងដីធ្លី និង បរិស្ថាន ព្រមទាំងរដ្ឋបាល សន្តិសុខ សណ្តាប់ធ្នាប់ រួមមាន០៧ សំណួរ និង ២៣សំណូមពរ ។ 
បន្ទាប់ពីការបកស្រាយបំភ្លឺរបស់បណ្តាមន្ទីរអង្គភាពពាក់ព័ន្ធទៅនឹងរាល់សំណួរ និងសំណូមពរផ្ទាល់មាត់ដែលអង្គវេទិកាលើកឡើងទាំង១៦សំណួរនិងសំណូមពរព្រមទាំងការឆ្លើយសំណួរនិង សំណូមពរ ជាលាយល័ក្ខអក្សរចំនួន០៥សំណួរ និង សំណូមពររួចមក មានមតិបូកសរុបនិងបិទអង្គវេទិកានេះលោក នូ ផល្លា ក៏បានធ្វើការថ្លែងអំណរគុណ ដល់បង ប្អូនដែលបាន ចំណាយពេលចូលរួម ក្នុងអង្គទិកាផ្សព្វផ្សាយ និង ពិគ្រោះយោបល់ របស់ក្រុមប្រឹក្សាខេត្តសៀមរាបអាណត្តិទី២ឆ្នាំ២០១៤ដែលបានធ្វើឲ្យយើង បានយល់កាន់តែច្បាប់រាល់ការអភិវឌ្ឍន៍របស់រាជរដ្ឋាភិបាល ក៏ដូច អាជ្ញាធរខេត្ត ក្រុង ស្រុក និង ដឹងពីទុក្ខកង្វល់របស់ប្រជាពលរដ្ឋនៅតាមមូលដ្ឋាន និង តម្រូវការចាំបាច់របស់ប្រជាពល រដ្ឋផងដែរ ។ អង្គវេទិកាដែលដំណើរការអស់រយៈពេល ពេញមួយព្រឹកនេះ ជាសញ្ញាវិជ្ជមានថ្មីបន្ថែមទៀត ចំពោះ កិច្ចខិតខំប្រឹងប្រែង ក្នុងការពិគ្រោះ យោបល់ ពិភាក្សា ដើម្បីពិនិត្យ ពិចារណា និង ធ្វើការឆ្លុះបញ្ចាំងទៅលើសមិទ្ធផលដែលសម្រេចបាន និង បញ្ហាប្រឈម ក្នុងឆ្នាំ២០១៤ និង គម្រោងសកម្មភាពជាអាទិភាពសម្រាប់ឆ្នាំ២០១៥ របស់រដ្ឋបាលខេត្ត។ លោកនូ ផល្លា ក៏បានគូសបញ្ជាក់ថានេះជាកម្លាំងចលករជម្រុញឲ្យការអភិវឌ្ឍ តាមបែបប្រជាធិបតេយ្យនៅថ្នាក់ក្រោមជាតិកាន់តែមានល្បឿនទៅមុខឥតឈប់ឈរហើយក៏ជាកាយវិការដ៏ប្រពៃ សំដៅធ្វើឲ្យថ្នាលនៃលទ្ធិប្រជាធិបតេយ្យនៅកម្ពុជាកាន់តែចាក់ឬសយ៉ាងជ្រៅនៅតាមសហគមមូលដ្ឋានរបស់យើង។ ព្រឹត្តិការណ៏នាថ្ងៃនេះវាក៏ជាយន្តការមួយក្នុងការពង្រឹងនីតិរដ្ឋនិងអភិបាលកិច្ចល្អនៅមូលដ្ឋាន។លោកនូ ផល្លាបានថ្លែងអំណរគុណយ៉ាងជ្រាលជ្រៅចំពោះវាគ្មិនតំណាងមន្ទីរ-អង្គភាពនានាជុំវិញខេត្ត ដែលបានធ្វើការបកស្រាយឆ្លើយតបទៅនឹងសំណួរ កង្វល់របស់បងប្អូនប្រជាពលរដ្ឋ ។ អង្គវេទិកាសូមរក្សាសិទ្ធិរក្សាទុកសំណួរ និង កង្វល់ ដែលអង្គវេទិកានាពេលនេះ ពុំទាន់អាចបកស្រាយបំភ្លឺបាន ក្រុមប្រឹក្សាខេត្ត នឹងយកសំណួរ និង កង្វល់ទាំងនេះ ទៅពិនិត្យ ពិភាក្សាក្នុងក្របខណ្ឌក្រុមប្រឹក្សាខេត្តហើយនឹងធ្វើការឆ្លើយតប និង ជម្រាបជូនដំណឹងជាលាយលក្ខណ៏អក្សរ ដល់ម្ចាស់សំណួរ បងប្អូនប្រជាពលរដ្ឋ តាមកាលវេលាសមគួរ តាមរយៈអាជ្ញាធរស្រុក មេឃុំ ក្រុមប្រឹក្សាឃុំ តាមមូលដ្ឋានដែលបងប្អូនរស់នៅផងដែរ ៕
