ភ្នំពេញ ៖ បុរស២នាក់ជិះម៉ូតូបញ្ច្រាស់ផ្លូវបំរុងបត់ឆ្លងក៏ត្រូវម៉ូតូមួយគ្រឿងទៀតបុកចំពេញទំហឹង បណ្ដាលអោយរងរបួសធ្ងន់ម្នាក់ស្រាល២នាក់។ ហេតុការណ៍នេះបានកើតឡើងកាលពីវេលាម៉ោង៩ និង២០នាទីយប់ថ្ងៃទី២១ខែធ្នូឆ្នាំ២០១៤ ត្រង់ចំណុចក្បែរវិទ្យាស្ថានIIC តាមបណ្ដោយផ្លូវជាតិលេខ២ ស្ថិតក្នុងភូមិទួលរកា សង្កាត់ចាក់អង្រែក្រោម ខណ្ឌមានជ័យ។
បើតាមសម្ដីសាក្សីដែលបានឃើញហេតុការណ៍បានអោយដឹងថា មុនពេលកើតហេតុគេឃើញ ម៉ូតូមួយគ្រឿងម៉ាកហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខ ភ្នំពេញ 1CC-9430 ជិះដោយបុរស២នាក់ចេញពីលេងផ្ទះបងប្អូនបំណងទៅកន្លែងស្នាក់នៅក្នុងបរិវេណកោះពេជ្រ ធ្វើដំណើរតាមបណ្ដោយផ្លូវជាតិលេខ២ ទិសដៅពីត្បូងទៅជើងបញ្ច្រាស់ផ្លូវ ហើយបំរុងបត់
ឆ្លងផ្លូវ ស្រាប់តែមានម៉ូតូធុនធំមួយគ្រឿងម៉ាកហុងដាអេសអិល ពណ៌ទឹកប្រាក់ ពាក់ស្លាកលេខ កំពង់ស្ពឺ 1A-5059 ជិះដោយបុរសម្នាក់ទើបចេញពីញ៉ាំការមិត្តភ័ក្តិក្នុងរាជធានីភ្នំពេញបំណងឆ្ពោះទៅផ្ទះនៅស្រុកស្អាងខេត្តកណ្ដាល ធ្វើដំណើរតាមបណ្ដោយផ្លូវជាតិលេខ២ ទិសដៅពីជើងទៅត្បូង ក្នុងល្បឿនយ៉ាងលឿនក៏បុកម៉ូតូហុងដាឌ្រីមចំពេញទំហឹងបណ្ដាលអោយបុរសម្នាក់ជិះម៉ូតូហុងដាឌ្រីម រងបួសធ្ងន់ម្នាក់ស្រាលម្នាក់ ចំណែកភាគីខាងម៉ូតូអេសអិលក៏រងរបួសស្រាលផងដែរ ហើយម៉ូតូ រងការខូចខាតទាំងសងខាង។
បន្ទាប់ពីកើតហេតុជនរងគ្រោះរបួសធ្ងន់ត្រូវបានគេបញ្ជូនទៅសង្គ្រោះនៅមន្ទីរពេទ្យភ្លាម ហើយ សមត្ថកិច្ចមូលដ្ឋានក៏ចុះមកអន្តរាគមន៍និងវាស់វែងយកម៉ូតូទាំង២គ្រឿងទៅរក្សាទុកនៅអធិការដ្ឋាន នគរបាលខណ្ឌមានជ័យដើម្បីរង់ចាំធ្វើការដោះស្រាយគ្នាតាមផ្លូវច្បាប់៕
