ភ្នំពេញ ៖ បុរសចំណាស់ជាចុងភៅម្នាក់ចប់ការងារជិះម៉ូតូទៅផ្ទះ ដោយសារផ្លូវងងឹតពេកមើលមិន ឃើញពំនូកថ្ម ដែលគេចាក់សំរាប់ទុកជួសជុលផ្លូវក៏ជិះឡើងហោះធ្លាក់មកវិញរងរបួសធ្ងន់បាក់ដៃម្ខាង សន្លប់ស្ដូកស្ដឹង។ ហេតុការណ៍នេះបានកើតឡើងកាលពីវេលាម៉ោង១០ និង៤០នាទីយប់ ថ្ងៃទី២១ខែធ្នូឆ្នាំ២០១៤ ត្រង់ចំណុចខាង លិចប៉ុស្ដិ៍នគរបាលព្រៃសចំងាយ២០០ម៉ែត្រ តាមបណ្ដោយ ផ្លូវព្រៃស ស្ថិតក្នុងភូមិប្រកា សង្កាត់ព្រៃស ខណ្ឌដង្កោ។
ប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុមានបុរសចំណាស់ម្នាក់ត្រូវបាន គេស្គាល់ឈ្មោះ ហឿន អាយុជាង៤០ឆ្នាំមុខរបរជាចុងភៅ ជិះម៉ូតូមួយគ្រឿងម៉ាកហុងឌ្រីម ធុនសេ១២៥ ពណ៌ខ្មៅ ពាក់ស្លាកលេខ កណ្ដាល 1D-5046 ទើបចប់ការងារធ្វើម្ហូបរោងការមួយ កន្លែងនៅម្ដុំបឹងទំពុន ធ្វើដំណើរទៅផ្ទះនៅម្ដុំផ្សារកន្តួត តាមបណ្ដោយផ្លូវព្រៃស ទិសដៅពីកើត ទៅលិចក្នុងល្បឿនលឿន ដោយសារស្ថានភាពផ្លូវងងឹតពេក មើលមិនឃើញ ពំនូកថ្មដែលគេចាក់សំរាប់ ទុកជួសជុលផ្លូវក៏ជិះឡើងហោះធ្លាក់មកវិញបណ្ដាលអោយ រងរបួសធ្ងន់ បាក់ដៃសន្លប់ស្ដូកស្ដឹង។
បន្ទាប់ពីកើតហេតុប្រជាពលរដ្ឋរស់នៅក្បែរនោះក៏បានមកជួយមើលនិងទំនាក់ទំនងទៅសមត្ថកិច្ចសុំការអន្តរាគមន៍និង រថយន្តសាមុយដឹកជនរងគ្រោះទៅមន្ទីរពេទ្យ មួយសន្ទុះក្រោយមកជនរងគ្រោះក៏ត្រូវបញ្ជូនតាមរថយន្ត សាមុយទៅមន្ទីរពេទ្យព្យាបាលរបួសភ្លាមៗ ចំណែកម៉ូតូសមត្ថកិច្ចបានយកទៅរក្សាទុកនៅរង់ ចាំបងប្អូន ជនរងគ្រោះមកទទួលយកវិញ។
សូមបញ្ជាក់ថាកំណាត់ផ្លូវព្រៃសដែលបែកចេញពីផ្លូវលេខ២១៧ចំការដូងគឺកំពុងធ្វើការ
ជួសជុលស្ថាបនាចាក់បេតុង ដោយកន្លែងខ្លះមានចាក់នៅកំទិចថ្មតូចៗជាពំនូកតាមបណ្ដោយផ្លូវ ហើយនៅពេលយប់ងងឹតគឺពុំមានដាក់ នៅសញ្ញាសំគាល់ប្រាប់ដល់អ្នកធ្វើដំណើរអោយប្រុងប្រយ័ត្ន ទើបបង្កអោយមានគ្រោះថ្នាក់ជាញឹកញ៉ាប់។ ប្រជាពលរដ្ឋសំណូមដល់អាជ្ញាធរមានសមត្ថកិច្ចក៏ដូចក្រុមហ៊ុនម៉ៅការជួសជុលផ្លូវ សូមពិនិត្យមើលនិងដាក់ស្លាកសញ្ញា សំគាល់នៅចំណុចមួយចំនួនដែលអាចងាយបង្កគ្រោះថ្នាក់ដល់អ្នកដំណើរបានឃើញពេលធ្វើដំណើរឆ្លងកាត់ផង៕
Ads
