ឧត្តរមានជ័យៈមន្ត្រីសាខាគយរដ្ឋាករខេត្តឧត្តរមានជ័យ ចុះត្រួតពិនិត្យឆែកឆេរចរាចរ ម៉ូតូនៅក្នុងស្រុកអន្លង់វែង ដែលគ្មានពន្ធនាំចូល ចំពោះការត្រួតពិនិត្យនេះប្រជាពលរដ្ឋបានសំដែងការមិនពេញចិត្ត ទៅលើមន្ត្រីគយ ដែលចុះបង្ក្រាបតែម៉ូតូធ្វើចរាចរនៅតាមផ្លូវ រីឯម៉ូតូគ្មានពន្ធនាំចូល ដែលដាក់លក់យ៉ាងអនាធិបតេយ្យនៅតាមហាង ភាគច្រើនគ្មានពន្ធនាំចូល តែបែរជាមិនបង្ក្រាបទៅវិញ។
ការចុះបង្ក្រាបម៉ូតូដែលចរាចរគ្មានពន្ធនាំចូល បានធ្វើជាលើកទី២ នៅព្រឹកថ្ងៃទី២១ ខែធ្នូ ឆ្នាំ២០១៤ នៅបរិវេណវង្វង់មូលទីរួមស្រុកអន្លង់វែង ដែលដឹកនាំដោយលោក ខាន់ ផល្លា អនុប្រធានសាខាគយរដ្ឋាករខេត្តឧត្តរមានជ័យ រួមសហការពីមន្ត្រីការិយាល័យគយ ច្រកអន្តរជាតិជាំសាង៉ាំ។ ជាលទ្ធិផលមន្ត្រីគយបានរឹបអូសបានម៉ូតូជាច្រើនគ្រឿង ដែលសុទ្ធតែជាប្រភេទសេរីថ្មីពុំមានពន្ធ ហើយបាននាំយកទៅរក្សាទុកនៅស្នាក់គយប្រចាំច្រកអន្តរជាតិជាំសាង៉ាំបណ្តោះអាសន្នប៉ុណ្ណោះ ការធ្វើឡើងបែបនេះ គឺមន្ត្រីគយ ចង់ឱ្យម្ចាស់ម៉ូតូទៅ បង់ពន្ធនៅពន្ធដារនៅសាខាខេត្ត ឬធ្វើកាកគ្រីម៉ូតូ ទៅតាមសៀវភៅរបស់រដ្ឋ ហើយក៏ជាសារមួយ ផ្ញើរជូនដល់អ្នកមានយានជំនិះ ដែលគ្មានពន្ធចូលត្រូវទៅធ្វើ ឯកសារដែលពាក់ព័ន្ធនឹងយានយន្តរបស់ខ្លួន។
ការចរាចរម៉ូតូគ្មានពន្ធនាំចូល ជាពិសេសស្រុកនៅតាមតំបន់ព្រំដែនកម្ពុជា-ថៃ ដែលប្រើប្រាស់ ១០០% ស្ទើរតែគ្មានពន្ធនាំចូលពីក្រៅប្រទេសមកកម្ពុជា ដែលបានគេលួចនាំឆ្លងដែនយកមកលក់ឱ្យពលរដ្ឋខ្មែរ ក្នុងតំលៃថោកៗហើយប្រជាពលរដ្ឋខ្មែរក្រីក្រមួយចំនួនពុំមានលទ្ធិភាព ទិញម៉ូតូមានពន្ធនាំចូល.មានតំលៃថ្លៃ ដែលជាឧបសគ្គមួយសំរាប់ពួកគាត់នៅពេលមន្ត្រីជំនាញរឹតបន្តឹងទៅលើច្បាប់របស់រដ្ឋ ហើយក៏អាចប្រឈមនឹងការផាក់ពិន័យគុណទ្វេរឡើង។ លើសពីនោះទៀត ពួកគាត់ពុំមានលទ្ធិភាពទៅធ្វើពន្ធនាំចូល ពួកគាត់ក៏អាចសុខចិត្តម៉ូតូរបស់ខ្លួន ឱ្យគេរឹបអូស មិនទៅបង់ពន្ធនាំចូលនោះឡើយ។
ប្រជាពលរដ្ឋជាម្ចាស់ម៉ូតូអត់ពន្ធនាំចូលបានសំដែងការមិនពេញចិត្តទៅមន្ត្រីកាំកុងត្រូល គយរដ្ឋាករ ដែលចុះបង្ក្រាបម៉ូតូគ្មានពន្ធនាំចូល ជាគោលការ.រក្សាថវិការចំណូលរដ្ឋ ក៏ប៉ុន្តែពួកគាត់បានលើកឡើងថា សំរាប់ម៉ូតូពួកគាត់គ្មានពន្ធនាំចូល គឺពួកគាត់ទិញពីហាងលក់ម៉ូតូ ដែលមានសំបុត្រស្នាមត្រឹមត្រូវ ពួកគាត់ពុំមានលទ្ធិភាពទៅទិញពីប្រទេសគេមកបាននោះទេ ហើយបើសិនជានៅតាមហាងលក់ម៉ូតូគ្មានពន្ធនាំចូល ក៏គ្មានម៉ូតូទាំងនេះចរាចរបាននៅក្នុងទឹកដីខ្មែរបានដែរ។ មិនតែប៉ុណ្ណោះបើម៉ូតូដាក់លក់នៅតាមហាងគ្មានពន្ធនាំចូល អាចលក់បាន ក៏ពួកគាត់អាចទិញជិះបានដែរ។
ជាទូទៅគេសង្កេតឃើញថា នៅពេលមានមន្ត្រីគយខេត្ត ចុះត្រួតពិនិត្យរាល់ចរាចរ និងទីតាំងលក់ម៉ូតូ ដែលគ្មានពន្ធនាំចូល នៅតាមហាងមួយចំនួន នៅក្នុងស្រុកអន្លង់វែង និងស្រុកត្រពាំងប្រាសាទ រួមទាំងស្រុកមួយចំនួនទៀត ជាច្រើនកន្លែង ពុំដែលឃើញមានម៉ូតូគ្មានពន្ធនាំចូល ដាក់តម្រៀបលក់ត្រៀបត្រានោះឡើយ ហើយនៅពេលមន្ត្រីគយ ចេញផុតភ្លាមម៉ូតូគ្មានពន្ធនាំចូល ត្រូវបានគេបញ្ចេញមកដាក់ពីមុខហាងលក់ម៉ូតូវិញ ដូចជាគេតាំងពិពណ៌អញ្ចឹង។ ហើយប្រជាពលរដ្ឋក៏បានរិះគន់ចំៗទៅលើមន្ត្រីគយរដ្ឋាករខេត្តឧត្តរមានជ័យ និងគយប្រចាំស្នាក់ការច្រកអន្តរជាតិជាំសាង៉ាំ រួមនឹងច្រកអន្តរជាតិអូរស្មាច់ ថា ម៉ូតូគ្មានពន្ធនាំចូល ដែលពួកឈ្មួញនាំឆ្លងដែនចូលមកកម្ពុជាបាន គឺដោយមានការឃុបឃឹតពីមន្ត្រីគយរដ្ឋាករ ប្រចាំច្រកនីមួយៗ ជាអ្នកបើកដៃឱ្យម៉ូតូគ្មានពន្ធនាំចូល ហើយក៏គ្មានម៉ូតូអត់ពន្ធនាំចូលចរាចរណ៍នៅក្នុងស្រុកខ្មែរបាននោះឡើយ។ប៉ែន នួន.ឧត្តរមានជ័យ
