សៀមរាប : ជនជាតិវៀតណាមភេទប្រុសទាំង៣នាក់នេះត្រូវបានកម្លាំងនគរបាលការិយា ល័យអន្តោប្រវេសន៍នៃស្នងការដ្ឋាននគរបាលខេត្តសៀមរាបធ្វើការចាប់ឃាត់ខ្លួនកាលពីថ្ងៃទី២០ ខែ ធ្នូ ឆ្នាំ ២០១៤ កន្លងទៅរួចយកមកកាន់ការិយាល័យនគរបាលជំនាញដើម្បីធ្វើការសួរនាំជាប់ពាក់ព័ន្ធក្នុងករណី ក្លែងបន្លំឯកសារនិងប្រើប្រាស់លិខិតក្លែង ។ ជាប់ពាក់ព័ន្ធក្នុងករណីខាងលើលោក វរសេនីយ៍ឯក ចៅ ម៉ៅ វីរះ ស្នងការរងទទួលបន្ទុកអន្តោប្រវេសន៍នៃស្នងការដ្ឋាននគរបាលខេត្តសៀមរាបបានអោយដឹងថាដោយអនុវត្តតាមការយកចិត្តទុកដាក់ខ្ពស់ជាប្រចាំពីសំណាក់ឯកឧត្តម នាយឧត្តមសេនីយ៍ សុខ ផល អគ្គនាយក នៃអគ្គនាយកដ្ឋានអន្តោប្រវេសន៍ ក្រសួងមហាផ្ទៃ ក៏ដូចជាលោក ឩត្តមសេនីយ៍ទោ សត ណាឌី ស្នងការ
នគរបាលខេត្តសៀមរាប និងដើម្បីធ្វើអោយការអនុវត្តនូវគោលនយោបាយភូមិឃុំមានសុវត្ថិភាព អោយ កាន់តែមានប្រសិទ្ធភាពខ្ពស់ផងនោះ ។ ក្រោយពីបានបញ្ជាដឹកនាំកម្លាំងនគរបាលការិយាល័យអន្តោប្រវេសន៍ដែលមានលោក វរសេនីយ៍ត្រី ជា គឹមសាន នាយការិយាល័យអន្តោប្រវេសន៍នៃស្នងការដ្ឋាននគរបាលខេត្តសៀមរាបបានធ្វើការតាមដានស្រាវជ្រាវនិងកំណត់មុខសញ្ញាជនសង្ស័យជាជនជាតិវៀតភេទប្រុសទាំង៣នាក់នេះបានហើយនោះនិងមានការចូលរួមសហការណ៍ជាការិយាល័យចរាចរណ៍ជើងទឹកទើបជាលិទ្ធផលសមត្ថកិច្ច
បានធ្វើការសួរនាំនិងបានរកឃើញនូវលិខិតក្លែងក្លាយដែលជាប័ណ្ណសមាជិកការពារបរិស្ថានដែលពួកគេតែងតែបានស្លៀកពាក់និងយកប័ណ្ណសមាជិកការពារបរិស្ថានដែលជាប័ណ្ណក្លែងក្លាយទៅចុះធ្វើសកម្មភាពបង្ក្រាបបទល្មើសនេសាទនៅតំបន់ចុងឃ្នៀសខេត្តសៀមរាបជាប្រចាំ ។ លោក វរសេនីយ៍ឯក ចៅ ម៉ៅ វីរះ ស្នងការរងទទួលបន្ទុកអន្តោប្រវេសន៍នៃស្នងការដ្ឋាននគរបាលខេត្តសៀមរាបបានបន្តអោយដឹងទៀតថាបើទោះបីជាជនសង្ស័យទាំង៣នាក់នេះប្រើប្រាស់រូបភាពបែបណាដើម្បីបន្លំភ្នែកសមត្ថកិច្ចក៏ដោយក៏មិនអាចរត់គេចពីសមត្ថកិច្ចជំនាញបានឡើយ ដោយនៅមុខសមត្ថកិច្ចជនសង្ស័យបានឆ្លើយសារភាពថាពួកពិតជាបានប្រព្រត្តឹនូវករណីទាំងអស់ខាងលើពិតប្រាកដមែន ។ បច្ចុប្បន្នទាំងជនសង្ស័យនិងវត្ថុតាងត្រូវបានសមត្ថកិច្ចកសាងសុំណុំរឿងនិងបញ្ជូនទៅកាន់សាលាដំបូងខេត្តសៀមរាបហើយកាលពីថ្ងៃ ទី ២២ ខែ ធ្នូ នេះ ដើម្បីចំណាត់ការទៅតាមផ្លូវច្បាប់បន្ត ៕
លោក ព្រិន្ទបាលទោ ខេង ខេមរា
