សហរដ្ឋអាមេរិកអះអាងកាលពីថ្ងៃទី១៨ ធ្នូថា ត្រៀមខ្លួនទទួលប្រធានាធិបតីគុយបា លោករ៉ាអ៊ុលកាស្ត្រូ ខណៈលោកប្រធានាធិបតី បារ៉ាក់ អូបាម៉ា លើកឡើងដោយលោកផ្ទាល់ពីលទ្ធភាពដែលលោកនឹងធ្វើដំណើរទៅកាន់គុយបា ដែរ ដើម្បីជំរុញការខិតចូលជិតគ្នារវាងប្រទេសទាំងពីរ ។
មានការ ប្រកាសគួរឱ្យភ្ញាក់ផ្អើលកាលពីថ្ងៃទី១៧ ធ្នូ របស់ប្រមុខរដ្ឋនៃប្រទេសទាំង២ អំពីឆន្ទៈធ្វើឱ្យមានប្រក្រតីភាពឡើងវិញនៃទំនាក់ទំនងការទូតក្រោយ ការកាត់ផ្តាច់អស់រយៈពេលកន្លះសតវត្សមក ។ រដ្ឋាភិបាលទាំងពីរ តាមពិតទៅបានធ្វើការប្រាស្រ័យទាក់ទងគ្នាជាសម្ងាត់បំផុតរយៈពេល១៨ ខែ ដើម្បីបញ្ចប់កាកសំណល់ចុងក្រោយមួយនៃសង្គ្រាមត្រជាក់ ហើយមានសម្តេចសង្ឃកាតូលិកប៉ាបហ្វ្រង់ស្វ័រ ជាអ្នកជួយជ្រោមជ្រែងដែរ ។
អ្នកនាំពាក្យសេតវិមានលោក JOSH EARNEST ថ្លែងថា ខ្ញុំពុំបដិសេធឡើយចំពោះទស្សនកិច្ចមួយរបស់លោករ៉ាអ៊ុលកាស្ត្រូ ។
កាលពី ថ្ងៃទី១៧ ធ្នូ សេតវិមានបានលើករួចហើយពីទស្សនកិច្ចជាយថាហេតុមួយរបស់លោកបារ៉ាក់ អូបាម៉ា នៅគុយបា ។ តាមទូរទស្សន៍ ABC លោកអូបាម៉ា ថ្លែងដោយផ្ទាល់ថា ខ្ញុំពុំមានគម្រោងពិសេសឡើយសម្រាប់ពេលនេះ ក៏បុ៉ន្តែចូរយើងក្រឡេកមើល តើអ្វីៗវាវិវត្តន៍បែបណា ។
ឧបសគ្គ សំខាន់សម្រាប់ការបង្កើតទំនាក់ទំនងធម្មតារវាងប្រទេសទាំងពីរ គឺការហ៊ុមព័ទ្ធសេដ្ឋកិច្ចគុយបារបស់អាមេរិកចាប់តាំងពីឆ្នាំ ១៩៦២ មក ។ ពិតមែនហើយ ការត្រួតត្រាសភាទាំងពីរដោយគណបក្សសាធារណរដ្ឋ បំផ្លាញក្តីសង្ឃឹមនៃការលុបចោលទណ្ឌកម្មសេដ្ឋកិច្ចនេះ បុ៉ន្តែទោះបីសភារារាំង ក៏លោកអូបាម៉ា អាចធ្វើអ្វីៗសម្រាប់គុយបាដែរ ។ លោកអូបាម៉ា កាលពីថ្ងៃទី១៨ ធ្នូ រហូតដល់ប្រកាសថា លោកចង់សម្រាលការរឹតត្បាតមួយចំនួនលើទំនាក់ទំនងពាណិជ្ជកម្ម ធនាគារ និងក្នុងការដឹកជញ្ជូន ៕h
