ខេត្តពោធិសាត់ នាព្រឹកថ្ងៃទី២០ ខែធ្នូ ឆ្នាំ២០១៤ បានធ្វើពិធីប្រកាសទទួលស្គាល់ សមាសភាពបណ្តាញសមាគមនារីកម្ពុជា ដើម្បីសន្តិភាព និងអភិវឌ្ឍន៏ ឃុំអូរសណ្តាន់ ស្រុកក្រគរ នៅស្នាក់ការគណៈបក្សប្រជាជនកម្ពុជា ក្រោមអធិបតីភាព លោកជំទាវ ឯម ប៉ុណ្ណា សមាជិការរដ្ឋសភា
មណ្ឌលពោធិសាត់ និងជាសមាជិការគណៈកម្មាធិការសមាគម និងលោកជំទាវ ហ៊ុន ចាន់ធី ម៉ៅ ធនិន ប្រធានកិត្តិយសសមាគមនារីកម្ពុជា ដើម្បីសន្តិភាព និងអផិវឌ្ឍន៏សាខាខេត្តពោធិសាត់ ។
យោងតាមសេចក្តីសំរេច ដែលអានដោយលោកស្រី ប៉ុល វណ្ណរ៉ា ប្រធានអនុសាខាសមាគមនារី ស្រុកក្រគរ ប្រកាស់ទទួលស្គាល់សមាសភាព បណ្តាញសមាគមនារីកម្ពុជា ដើម្បីសន្តិភាព និងអភិវឌ្ឍន៏ឃុំអូរសណ្តាន់ ចំនួន១៣៧នាក់ ក្នុងនោះថ្នាក់ឃុំ២២នាក់ និងថ្នាក់ភូមិ២៤នាក់ និងថ្នាក់ក្រុម មានចំនួន៩១នាក់ដែលមានសមាជិការទាំង៨ភូមិ ចំនួន១១៤០នាក់ ។
បន្ទាប់ពីលោកស្រី ប៊ិន ផន ប្រធានសមាគមនារីកម្ពុជា ដើម្បីសន្តិភាព និងអភិវឌ្ឍន៏ឃុំអូរសណ្តាន់ ទើបតែប្រកាសតែងតាំងថ្មី បានធ្វីការបេ្តជ្ញាចិត្តនោះរួចមក លោកជំទាវ ហ៊ុន ចាន់ធី ម៉ៅ ធនិន និងលោកជំទាវ ឯម ប៉ុណ្ណា បានជម្រាបជួនថា នេះគឺជាលើកទី១សម្រាប់ខេត្ត និងជាលើកទី១ទូទាំងប្រទេស ដែលសមាគមនារីកម្ពុជាដើម្បីសន្តិភាពនិង អភិវឌ្ឍន៏ បានធ្វើពិធីប្រកាសសមាសភាព បណ្តាញសមាគមនារី នៅឃុំអូរសណ្តាន់ ស្រុកក្រគរ តាំងពីថ្នាក់ឃុំ ថ្នាក់ភូមិ ថ្នាក់ក្រុង និងបន្តទៅឃុំភូមិផ្សេងៗទៀត ទូទាំងខេត្ត ។ សមាគមនារីសង្គ្រោះជាតិកម្ពុជាបានចាប់បដិសន្ធិឡើង តាំងពីថ្ងៃ២ធ្នូ ឆ្នាំ១៩៧៨ រហូតមកដល់ពេលនេះ បានប្តូរឈ្មោះរបស់ខ្លួន៥លើក រួចមកហើយ ដើម្បីឲ្យស្របទៅតាមកាលះទេសះ និងការអភិវឌ្ឍន៏ជាក់ស្តែង របស់ប្រទេសជាតិ ។
ទោះជាយ៉ាងនេះក៏ដោយ សមាគមនារីនៅតែប្រកាន់ទស្សនះវិស័យរបស់ខ្លួន គឺអ្វីៗទាំងអស់ ដើម្បីសុខមាលភាពរបស់ស្ត្រី និងកុមារ ជាអង្គការមហាជនមួយ ដែលមានរចនាសម្ពន្ធ័ ចាត់តាំងពីថ្នាក់កណ្តាល រហូតដល់មូលដ្ឋាន បាននឹងកំពុងធ្វើសកម្មភាពយ៉ាងផុលផុស ទូទាំងប្រទេស ។
លោកជំទាវមានជំនឿជឿជាក់ថា ការពង្រីកបណ្តាញសមាគមនារីនៅទីនេះ គឺយើងបានប្រមូលផ្តុំកម្លាំងដ៏ច្រើនកុះករ របស់បងប្អូននារី ឃុំ ភូមិ ក្រុង សំដៅឲ្យបងប្អូននារីទាំងអស់ ត្រូវចេះគ្រប់គ្រង ដឹកនាំ មានកិច្ចសហការសាមគ្គីគ្នាល្អ ត្រូវចេះជួយគ្នា ក្នុងគ្រាមានគ្រោះអាសន្ន ពិសេសចំពោះស្ត្រីនិងកុមារ ឲ្យកាន់តែប្រសើរឡើង ប្រកបដោយភាពរុងរឿង និងសុភមង្គលទាំងក្រុមគ្រួសារ និងសង្គមជាតិយើងទាំងមួល ៕
