កំពង់ឆ្នាំងមានឧប្បត្តិហេតុគ្រោះថ្នាក់ចរាចរណ៍មួយ បានកើតឡើងបណ្តាលអោយមានការកកស្ទះ ចរាចរណ៍ជិត២០នាទី កាលពីវេលាម៉ោង១១និង១៥នាទីព្រឹក ថ្ងៃទី២២ ខែធ្នូ ឆ្នាំ២០១៤ នៅលើកំណាត់ផ្លូវជាតិលេខ៥ ចំណុចផ្លូវបំបែកជា៤ ស្ថិតក្នុងភូមិទី១ សង្កាត់ខ្សាម ក្រុងកំពង់ឆ្នាំង
ខេត្តកំពង់ឆ្នាំង រវាងរថយន្តដឹកកុងតឺន័រ ប៉ះគ្នាជាមួយរថយន្តម៉ាកហ្វ័ត ប្រភេទភីកអាប់ ពាក់ស្លាកលេខ ONG 202 2-227 ។
សាក្សីនៅកន្លែងកើតហេតុ បានអោយដឹងថា មុនពេលកើតហេតុ រថយន្តម៉ាកហ្វ័តខាងលើ បានធ្វើដំណើរក្នុងទិសដៅច្រាស់ទិសគ្នា ជាមួយរថយន្តដឹកកុងតឺន័រ មកដល់ចំណុចផ្លូវកោង មានស្ថានភាពចង្អៀត ដោយផ្លូវម្ខាងទៀត មិនអាចធ្វើដំណើរបាន កំពុងរៀបចំអ៊ុតចាក់ស៊ូ រថយន្តទាំងពីរ ក៍ប៉ះគ្នាគៀបជាប់តែម្តង ។
រថយន្តម៉ាកហ្វ័ត រងការខូចខាតផ្នែកខាងក្រោយ ចំហៀងខាងឆ្វេង ចំណែករថយន្តដឹកកុងតឺន័រ កំពិតផ្នែកខាងក្រោយចំហៀងខាងស្តាំ ។ តែសំណាងល្អ មិនបណ្តាលអោយនរណាម្នាក់ មានគ្រោះថ្នាក់បាត់បង់ជីវិត ឬរបួសមនុស្សឡើយ ។
ក្រោយកើតហេតុ សមត្ថកិច្ចនគរបាលចរាចរណ៍ ក្រុងកំពង់ឆ្នាំង ចុះមកអន្តរាគមន៍ សម្រួលចរាចរណ៍ រួចនាំយករថយន្តទាំងពីរ ទៅធ្វើការដោះស្រាយតាមនីតិវិធី ៕
