កំពង់ឆ្នាំង៖ យុវជនម្នាក់ត្រូវបានសមត្ថកិច្ចពទ្ធ័ចាប់ខ្លួនបាននិង២នាក់ទៀតបានរត់រួច ក្នុងពេលដែលក្រុមសមត្ថកិច្ចព័ទ្ធចាប់ខ្លួន ព្រោះតែពួកគេបានចែកចាយ និងប្រើប្រាស់ថ្នាំញៀន នៅលើចង្កេះភ្នំសន្ទូច។ កិច្ចបង្ក្រាបមុខសញ្ញាចែកចាយ និងប្រើប្រាស់ថ្នាំញៀនខាងលើនេះបានធ្វើឡើងនៅវេលា ម៉ោង៤និង១៥នាទីថ្ងៃទី២០ ខែធ្នូ ឆ្នាំ២០១៤ នៅក្នុងភូមិសន្ទូច ឃុំស្រែថ្មី ស្រុករលាប្អៀរ ខេត្តកំពង់ឆ្នាំង។
លោក ស សារិទ្ធ នាយប៉ុស្តិនគរបាលរដ្ឋបាលស្រែថ្មីបានអោយដឹងថា៖ជនល្មើសដែលសមត្ថកិច្ចចាប់ខ្លួនបាននេះមានឈ្មោះ អេង រស្មី អាយុ២៤ឆ្នាំ រស់នៅភូមិផ្សារលើ សង្កាត់ផ្សារឆ្នាំង ក្រុងកំពង់ឆ្នាំង ចំណែកគ្នីគ្នាគេ២នាក់ទៀតមិនត្រូវបានស្គាល់ឈ្មោះនោះ ឡើយ។មុនពេលបង្ក្រាប សមត្ថកិច្ចមានការសង្ស័យ និងបានតាមដានឃើញពួកគេកំពុងសេពថ្នាំញៀននៅចំណុចខាងលើ ខណៈនោះសមត្ថកិច្ចបានប្រើប្រាស់កំលាំងចំនួន៥ នាក់ឡោមព័ទ្ធចាប់បានតែម្នាក់តែប៉ុណ្ណោះ ចំណែក២នាក់ទៀតបានរត់គេចខ្លួនរួចដោយ បានយកទាំងថ្នាំញៀនម៉ាទឹកកកទៅមួយចំនួនផងដែរ។
ក្នុងពេលបង្ក្រាប សមត្ថកិច្ចបានរឹបអូសបានម៉ូតូម៉ាកស្មាស់សេវីឆ្នាំ២០១៤ មួយគ្រឿងពាក់ស្លាកលេខ កំពង់ឆ្នាំង1D-2014 ដែលជាម៉ូតូរបស់ឈ្មោះ អេង រស្មី,សម្ភារៈសំរាប់ ជក់ ថ្នាំញៀនចំនួន២សម្រាប់ផងដែរ និង បានកសាងសំណុំរឿងបញ្ជូនទៅកាន់អធិការដ្ឋាន នគរបាលស្រុករលាប្អៀរ ចាត់ការបន្តតាមនីតិវិធី។
សូមបញ្ជាក់ផងដែរថា៖ក្នុងពិធីចែកអំណោយដល់ប្រេជាពលរដ្ឋក្រីក្រ និងជនរង គ្រោះដោយគ្រោះធម្មជាតិចំនួន៥០០នាក់ នៅសាលាស្រុករលាប្អៀរ កាលពីថ្ងៃទី១៨ ខែធ្នូ ឆ្នាំ២០១៤ ឯ.ឧ ឈួរ ច័ន្ទឌឿន បានមានប្រសាសន៍សង្កត់ធ្ងន់ចំពោះការចរាចរណ៍ថ្នាំញៀននៅតាមគ្រប់មូលដ្ឋាន ដោយឯ.ឧបានអំពាវនាវដល់ប្រជាពលរដ្ឋ អាជ្ញាធរមូលដ្ឋាន សមត្ថកិច្ចពាក់ព័ន្ធ យកចិត្តទុកដាក់ចូលរួមសហការគ្នាក្នុងការអនុវត្តគោលនយោបាយភូមិ ឃុំមានសុវត្តិភាពទាំង៩ចំណុច ទប់ស្កាត់ និងបង្ក្រាបអោយខានតែបាននូវមុខសញ្ញាជួញដូរចែកចាយ និងប្រើប្រាស់ទាំងអស់ដែលមាននៅក្នុងមូលដ្ឋានរបស់ខ្លួនអោយអស់ ព្រោះថ្នាំញៀនជា ថ្នាំដ៍សាហាវកំពុងបំផ្លាញអនាគតយុវវ័យ ដែលជាធនធានមនុស្សនិងជាទំពាំងស្នងឬស្សីរបស់ប្រទេសជាតិ៕
