ភ្នំពេញ ជនសង្ស័យជួញដូរថ្នាំញៀន២នាក់ប្តីប្រពន្ធ ត្រូវកម្លាំងនគរបាលព្រហ្មទណ្ឌ នៃអធិការដ្ឋាននគរបាលខណ្ឌពោធិសែនជ័យ សហការជាមួយនគរបាលប៉ុស្តិ៍រដ្ឋបាលស្នោរ និងកម្លាំងប្រជាការពាសង្កាត់ បង្ក្រាបបានជាក់ស្តែង ខណះដែលជនសង្ស័យទាំង២នាក់ប្តីប្រពន្ធនេះធ្វើសកម្មភាពចែកចាយគ្រឿងញៀន។
ហេតុការណ៍បង្ក្រាបករណីគ្រឿងញៀន កើតឡើងកាលពីវេលាម៉ោង ០៨និង៣០នាទី ព្រឹកថ្ងៃទី២២ ខែធ្នូ ឆ្នាំ២០១៤ នៅផ្សារទួលលាភ ភូមិទួលលាភ សង្កាត់ស្នោរ ខណ្ឌពោធិសែនជ័យ រាជធានីភ្នំពេញ។ជនសង្ស័យទាំង២នាក់ប្តីប្រពន្ធក្នុងករណីជួញដូរថ្នាំញៀន ដែលត្រូវសមត្ថកិច្ចឃាត់ខ្លួន ប្តីឈ្មោះ អេង វុទ្ធី អាយុ៣០ឆ្នាំ និងប្រពន្ធឈ្មោះ រស់ គង់ អាយុ២៩ឆ្នាំ មុខរបរមិនពិតប្រាកដ បច្ចុប្បន្នស្នាក់នៅភូមិត្រពាំងអារក្ស សង្កាត់ឪឡោក ខណ្ឌពោធិសែនជ័យ រាជធានីភ្នំពេញ។
សមត្ថកិច្ចប្រាប់ឲ្យដឹងថា ជនសង្ស័យជួញដូរគ្រឿងញៀនទាំង២នាក់ប្តីប្រពន្ធនេះ គឺជាមុខសញ្ញាដែលសមត្ថកិច្ចតាមដានជាយូរមកហើយ លុះដល់ថ្ងៃកើតហេតុ កម្លាំងទទួលបានព័ត៍មានជាក់លាក់ ទើបសុំបញ្ជាពីលោក យឹម សារ៉ាន់ អធិការខណ្ឌពោធិសែនជ័យ សហការជាមួយនគរបាលប៉ុស្តិ៍រដ្ឋបាលស្នោរ និងកម្លាំងប្រជាការពាសង្កាត់ បង្ក្រាបបានជាក់ស្តែង ខណះដែលជនសង្ស័យទាំង២នាក់ប្តីប្រពន្ធនេះធ្វើសកម្មភាពចែកចាយគ្រឿងញៀន នៅផ្សារ
ទួលលាភ ភូមិទួលលាភ សង្កាត់ស្នោរ ខណ្ឌពោធិសែនជ័យ ដកហូតថ្នាំញៀន ចំនួន ២៣កញ្ចប់ និងម៉ូតូ ០១គ្រឿង ម៉ាក អ៊ែរប្លេក ពណ៍ខ្មៅ ពាក់ស្លាកលេខ ភ្នំពេញ 1Y.4135 ។
សមត្ថកិច្ចប្រាប់បញ្ជាក់ថា ជនសង្ស័យទាំង២នាក់ប្តីប្រពន្ធក្នុងករណីជួញដូរថ្នាំញៀន ក្រោយពីសាកសួរជំហានដំបូងនៅប៉ុស្តិ៍រដ្ឋបាលស្នោរ បញ្ជូនបន្តទៅកាន់អធិការដ្ឋាននគរបាលខណ្ឌពោធិសែនជ័យ ចាត់ការបន្តទៀត។
