ភ្នំពេញ ជនជាតិបារាំងម្នាក់ ត្រូវបានគេប្រទះឃើញដេកស្លាប់នៅលើគ្រែដោយមានកាំភ្លើង ម៉ាក K54 មួយដើម នៅក្បែរខ្លួនហើយសពមានសភាពស្អុយរលួយពេញក្នុងបន្ទប់ ដោយមានស្នាមបាញ់ ហើយមានចាក់សោបន្ទប់ជាប់ ។ការភ្ញាក់ផ្អើលខាងលើនេះ កើតឡើង នៅវេលាម៉ោង ០១ និង៣០នាទី ថ្ងៃទី២៣ ខែធ្នូឆ្នាំ២០១៤ នៅក្នុងបន្ទប់លេខ៣០៤ ជាន់ទី២ ក្នុងផ្ទះសំណាក់ ខ្មែរស្តេដែលមានទីតាំងស្ថិតនៅផ្ទះលេខ ៩៩ ផ្លូវលេខ៦៣ ភូមិ៧ សង្កាត់បឹងរាំង ខណ្ឌដូនពេញ ។
សមត្ថកិច្ចមូលដ្ឋានបានឲ្យដឹងថា បុរសជាជនជាតិបរទេសដែលដេកស្លាប់នៅក្នុងបន្ទប់ផ្ទះសំណាក់ខាងលើត្រូវបានគេស្គាល់ឈ្មោះ ឈ្មោះ CHELKOFF CYRIL VICTOR អាយុ៥៧ឆ្នាំ ជាជនជាតិបារាំង មុខរបរទេសចរណ៍ ស្នាក់នៅក្នុងផ្ទះសំណាក់ខ្មែរស្តេកាន់លិខិតឆ្លងដែនលេខ 13C158241 បានចូលស្នាក់នៅ កាលពីថ្ងៃទី ២៤ ខែកញ្ញាឆ្នាំ២០១៤ ។
បើប្រភពព័ត៌មាន ពីម្ចាស់ផ្ទះសំណាក់ឈ្មោះ ទឹម ចន្ទ័ណាក់ ភេទប្រុសអាយុ៣៤ឆ្នាំ មុខរបរ ម្ចាស់ផ្ទះសំណាក់ ខ្មែរស្តេបានឲ្យដឹងទៀតថាដោយសារតែមិនបានឃើញជនបរទេសរូបនោះចេញក្រៅសោះ ក៏បានឡើងទៅមើលពេលទៅដល់មុខបន្ទប់ស្រាប់តែមានធុំក្លិនស្អុយចេញពី
ក្នុងបន្ទប់ ទើបបបួលអ្នកធ្វើការជាមួយយកសោទៅចាក់បើកទ្វារមើល ស្រាប់តែឃើញបុរសជាជនបរទេសដេកស្លាប់នៅលើគ្រែដោយមានក្លិនស្អុយទៅហើយ ហើយបានបិទទ្វារ និងរាយការណ៍ឲ្យសមត្ថិកិច្ច ។ក្រោយទទួលបានព័ត៍មានភ្លាមសមត្ថកិច្ចបង្កើតគណៈកម្មការចម្រុះចុះពិនិត្យធ្វើ កោសល្យវិច័យដោយគ្រូពេទ្យក៏បានបញ្ជាក់ថាឃើញកាំភ្លើងម៉ាក K54 មួយគ្រាប់ ដែលបានបញ្ចូលគ្រាប់រួចស្រេចជំនាញបានសម្រេចបូមទឹកនោម យកទៅវិភាគដើម្បីរង់ចាំបញ្ជាក់ថាជនរងគ្រោះរូបនោះគាត់ដេកស្លាប់ដោយបញ្ហាអ្វីពិតប្រាកដ ។ សមត្ថកិច្ចនិងគណៈកម្មការចម្រុះបានសន្និដ្ឋានជាជំហានដំបូងថាជនរងគ្រោះស្លាប់ដោយការធ្វើអត្តឃាត បាញ់ សម្លាប់ខ្លួនដោយមិនដឹងពីមូលហេតុ ។
គួរបញ្ជាក់ផងដែរថា យោងតាមសមត្ថកិច្ចម្នាក់បានបង្ហើបអោយដឹងថា ការស្លាប់របស់ជនបរទេសរូបនោះហាក់មានអថ៍កំបាំង ព្រោះមានស្នាមបាញ់ចំក្បាលចំនួន១គ្រាប់ ហើយម្យ៉ាងវិញទៀតរាល់ការចូលស្នាក់នៅមិនអនុញ្ញាតិអោយយកអាវុធជាតិផ្ទុះចូលបានក្នុងផ្ទះសំណាក់បានទេ បន្ទាប់ពីពិនិត្យរួចរាល់ហើយទើបវេចខ្ចប់យកទៅរក្សាទុកនៅវត្តស្ទឹងមានជ័យ រង់ចាំសាច់ញាតិមកយកទៅធ្វើបុណ្យតាមប្រពៃណី៕
