សៀមរាប ៖ បន្ទាប់ពីបានឆ្លងកាត់វគ្គបណ្តុះបណ្តាលអស់រយៈពេល២ខែកន្លងមក សិក្ខាកាមកម្រឹតបឋមវិជ្ជាជីវៈនគរបាលចំនួន១៨៥នាក់ ដែលជាបេក្ខជនជ្រើសរើសថ្មីនោះ ត្រូវបានទទួលការប្រកាសតាំងស៊ប់ ក្នុងក្របខ័ណ្ឌមន្ត្រីនគរបាលជាតិ ជំនាន់ទី១ ឆ្នាំ២០១៤ នាព្រឹកថ្ងៃទី២៥ ខែធ្នូ ឆ្នាំ២០១៤ នៅសាលានគរបាលជាតិភូមិភាគទី៤ ខេត្តសៀមរាប ក្រោមអធិបតីភាព នាយឧត្តមសេនីយ៍ ខេង សុមេធ អគ្គស្នងការរង នៃ អគ្គស្នងការដ្ឋាននគរបាលជាតិ តំណាងដ៏ខ្ពង់ខ្ពស់ ឯកឧត្តម ឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ និង មានវត្តមានផងដែរ ឯកឧត្តម នូ ផល្លា ប្រធានក្រុមប្រឹក្សាខេត្តសៀមរាប ។
តាមរបាយការណ៍ ដែលបើកបង្ហាញដោយ លោកវរសេនីយ៍ឯក ហុង ណារ៉ុង នាយកសាលានគរបាល-ជាតិភូមិភាគទី៤ បានឲ្យដឹងថា ៖ វគ្គបណ្តុះបណ្តាលកម្រឹតបឋមវិជ្ជាជីវៈនគរបាល សម្រាប់បេក្ខជនជ្រើសរើសថ្មី ឲ្យចួលបំរើការងារក្នុងក្របខ័ណ្ឌមន្ត្រីនគរបាលជាតិ ជំនាន់ទី១ ឆ្នាំ២០១៤ មានរយៈពេល២ខែ គឺចាប់ផ្តើមដំណើរការ នៅថ្ងៃទី២៧ ខែតុលា និងត្រូវបានបញ្ចប់នៅថ្ងៃទី២៥ ខែធ្នូ ឆ្នាំ២០១៤ ។
លោកបានបញ្ជាក់ថា ៖ សិក្ខាកាមនៃវគ្គបណ្តុះបណ្តាលនេះ មកពីខេត្តសៀមរាប កំពង់ធំ ព្រះវិហារ និងខេត្តឧត្តរមានជ័យ សរុបចំនួន១៨៥នាក់ ក្នុងនេះមានសិក្ខាកាមជានារីចំនួន៣៤នាក់ ហើយនៅក្នុងនេះដែរ សិក្ខាកាមដែលមានកំរិតវប្បធម៌ថ្នាក់បរិញ្ញាបត្រជាន់ខ្ពស់ចំនួន ២នាក់ ថ្នាក់បរិញ្ញាបត្រ ៩២នាក់ ថ្នាក់បរិញ្ញាបត្ររង ៣នាក់ និងសិក្ខាកាមដែលមានសញ្ញាបត្រទុតិយភូមិចំនួន៨៨នាក់ រីឯលទ្ធផលនៃវគ្គបណ្តុះបណ្តាល គឺទទួលបាននិទ្ទេសល្អ ១៥១រូប និទ្ទេសល្អបង្គួរ ២៥រូប និង និទ្ទេសមធ្យម ចំនួន ០៩រូប ។
របាយការណ៍បានបន្តឲ្យដឹងទៀតថា ក្រោយពីបានបញ្ចប់វគ្គបណ្តុះបណ្តាលនេះ សិក្ខាកាមត្រូវបានទទួលការប្រកាសតាំងស៊ប់ក្នុងក្របខ័ណ្ឌមន្ត្រីនគរបាលជាតិ១០០% សម្រាប់ជំនាន់ទី១ ឆ្នាំ២០១៤ ក្នុងនេះរួមមានថ្នាក់អនុសេនីយ៍ត្រីចំនួន ៩៤រូប ថ្នាក់ព្រិន្ទបាលទោ ៩០រូប និងថ្នាក់ពលបាលត្រីចំនួន ០១រូប ។
នាយឧត្តមសេនីយ៍ ខេង សុមេធ អគ្គស្នងការរងនគរបាលជាតិ និងជាមេបញ្ចាការនគរបាលជាតិប្រចាំទិសភូមិភាគទី៤ និង ទី៥ បានលើកឡើងថា ៖ វគ្គបណ្តុះបណ្តាលបេក្ខជនជ្រើសរើសថ្មី ឲ្យចូលបំរើការងារក្នុងក្របខ័ណ្ឌនគរបាលជាតិ គឺពិតជាត្រូវជួបការលំបាកសម្រាប់គ្រូបង្គោល និងត្រូវឆ្លងកាត់សេចក្តីព្យាយាមរបស់សិក្ខាកាមផងដែរ ។ ឯកឧត្តមបានបញ្ជាក់ថា៖ វាពិតណាស់ថា មុននេះ ០២ ខែ សិក្ខាកាមទាំង១៨៥នាក់ គឺគ្រាន់តែជាប្រជាពលរដ្ឋសាមញ្ញតែប៉ុណ្ណោះ ក៏ប៉ុន្តែឆ្លងកាត់រយៈពេល២ខែនៃវគ្គបណ្តុះបណ្តាលនេះ សិក្ខាកាមទាំង១៨៥នាក់ បានក្លាយជាមន្ត្រីនគរបាលជាតិ ដែលមានតួនាទីភារកិច្ច ការពារថែរក្សាសន្តិសុខ សុវត្ថិភាព និង សណ្តាប់ធ្នាប់ ជូនប្រជាពលរដ្ឋ និងសង្គមជាតិ ។
នាយឧត្តមសេនីយ៍ ខេង សុមេធ បានគូសបញ្ជាក់ថា ៖ រាជរដ្ឋភិបាលកម្ពុជា ដែលមានសម្តេចតេជោ ហ៊ុន សែន ជាប្រមុខដឹកនាំ គឺមិនត្រឹមតែផ្តោតការយកចិត្តទុកដាក់ទៅលើវិស័យអប់រំសាធារណៈប៉ុណ្ណោះទេ តែថែមទាំងបានយកចិត្តទុកដាក់ទៅលើការងារអប់រំនិងបណ្តុះបណ្តាលវិជ្ជាជីវៈក្នុងជួរកងកម្លាំងប្រដាប់អាវុធ ដើម្បីបង្កើនសមត្ថភាពឲ្យកម្លាំងស្នូលនេះ មានលទ្ធភាពគ្រប់គ្រាន់ ឆ្លើយតបទៅនឹងសភាពការណ៍វិវត្តរបស់សង្គមជាតិ ។ ឯកឧត្តម បានបន្តថា ៖ ប្រទេសកម្ពុជា ក៏មិនខុសប្លែកពីបណ្តាប្រទេសនានានៅលើសកលលោកនោះទេ បញ្ហាសន្តិសុខនៅតែជាចំណុចក្តៅដែលត្រូវយកចិត្តទុកដាក់ ព្រោះថា បើយើងមានសន្តិភាព ស្ថិរភាពនយោបាយ ក៏ប៉ុន្តែយើងពុំមានសន្តិសុខនិងសណ្តាប់ធ្នាប់សាធារណៈល្អទេនោះ វានឹងជះឥទ្ធិពលមិនល្អ ដល់ការខិតខំប្រឹងប្រែងរបស់រាជរដ្ឋាភិបាល ក្នុងការអភិវឌ្ឍប្រទេសជាតិ ។ 
ឯកឧត្តមបានសង្កត់ធ្ងន់ថា ៖ លក្ខណសម្បត្តិ៩យ៉ាង នៃគោលនយោបាយ ភូមិ ឃុំមានសុវត្ថិភាព គឺជាកត្តាឈានទៅលុបបំបាត់ភាពអសកម្មនានានៅថ្នាក់មូលដ្ឋាន និងជួយពង្រឹងបាន សន្តិសុខ សុវត្ថិភាពនិងសណ្តាប់ធ្នាប់សាធារណៈ នៅក្នុងសង្គមជាតិយើងទាំងមូល ។
ជាមួយឱកាសបិទវគ្គបណ្តុះបណ្តាល និងប្រកាសតាំងស៊ប់ក្នុងក្របខ័ណ្ឌមន្ត្រីនគរបាលជាតិឆ្នាំ២០១៤នេះ នាយឧត្តមសេនីយ៍ ខេង សុមេធ បានឧបត្ថម្ភថវិកាជូនដល់មន្ត្រីនគរបាលថ្មីទាំង១៨៥នាក់ នូវថវិកាសរុប ៩លាន ២សែន ៥ម៉ឺនរៀល ។ ឧបត្ថម្ភគ្រូបង្គោល ០៩នាក់ សរុប ៩សែនរៀល ។ 
ឧបត្ថម្ភលើកទឹកចិត្តដល់សិក្ខាកាមនារី កញ្ញា សាន្ត មរកត មកពីស្នងការដ្ឋាននគរបាលខេត្តព្រះវិហារ ដែលប្រឡងបាញ់គ្រាប់ពិតបាននិទ្ទេសពូកែ ( ៥គ្រាប់ ចូលចំណុចស៊ីបទាំង ៥គ្រាប់ ) ចំនួន ២០ម៉ឺនរៀល និង ឧបត្ថម្ភកម្មវិធីបិទវគ្គ ១៤លានរៀល ក្នុងនេះ មានការចូលរួមពីសំណាក់ ឯកឧត្តម នូ ផល្លា ប្រធានក្រុមប្រឹក្សាខេត្តសៀមរាប ចំនួន ២លានរៀល ។
ជាមួយគ្នានេះដែរ ជាមោទនភាពនៃវគ្គបណ្តុះបណ្តាលនេះ គឺកាលក្នុងឱកាសបើកវគ្គ នាយឧត្តមសេនីយ៍ ខេង សុមេធ បានឧបត្ថម្ភដល់សាលានគរបាលជាតិភូមិភាគ៤ ឲ្យមានការកសាងអាគារសម្រាប់សិក្ខាកាមស្នាក់នៅរៀនសូត្រ ចំនួន១ខ្នង ។ ដោយឡែក នៅក្នុងឱកាសបិទវគ្គនេះ អាស្រ័យដោយកិច្ចដំណើរការល្អរបស់សាលា និងមើលឃើញអំពីទំហំនៃតម្រូវការចាំបាច់របស់សាលាផងដែរ ឯកឧត្តម បានជួយឧបត្ថម្ភ ឲ្យសាលានគរបាលជាតិភូមិភាគទី៤ កសាងអាគារស្នាក់នៅ១ខ្នង បន្ថែមទៀត ៕
ដោយ លោកខេង ខេមរា
