សៀមរាបៈមេឈ្មួញឈើម្នាក់បានស្រែកឡាំប៉ា ចង់ផ្អើលក្រុងសៀមរាបទាំងកណ្តាលថ្ងៃ ខណៈពេលប៉ូលិសចរាចរណ៏ប្រចាំគោលដៅ ស្ទាក់ចាប់ឡានដឹកឈើល្មើសច្បាប់របស់ខ្លួន ប្រគល់ឲ្យទៅខាងមេព្រៃ។ ភ្លាមៗនោះមេឈ្មួញឈើបានស្រែកឡូឡាថា រូបគេបានបង់ប្រាក់ គ្រប់សមត្ថកិច្ចហើយ ម៉េចក៏នៅតែចាប់។
ហេតុការណ៏នេះបានកើតឡើងនៅម៉ោង១១ និង៥០នាទីថ្ងៃទី២៥ខែធ្នូឆ្នាំ២០១៤ នៅលើដងផ្លូវលោកតាណឺយ ក្នុងភូមិដកពោធិ ក្រុងសៀមរាប។ ឡានដឹកឈើដែលប៉ូលិសចាប់ប្រគល់ឲ្យខាងមេព្រៃ ម៉ាកសាំយ៉ុងពណ៏ទឹកប្រាក់ពាក់ស្លាកលេខ បាត់ដំបង២អា២២៦៧ បើកបរដោយឈ្មោះតេ ឡេ ភេទប្រុស ជាមេឈ្មួញឈើ រស់នៅភូមិចុងកៅស៊ូសង្កាត់ស្លក្រាម ក្រុងសៀមរាប។
មន្ត្រីប៉ូលិសចរាចរណ៏ក្នុងហេតុការណ៏ បានឲ្យដឹងថា ឡានខាងលើនេះត្រូវពួកខ្លួនស្ទាក់ឃាត់ត្រួតពិនិត្យឯកទេសឡាន តែត្រូវអ្នកបើកបរព្យាយាមបើករត់គេច ទើបខាងលោកដេញតាមស្ទាក់ចាប់ ហើយក៏ឃើញដឹកបទល្មើសព្រៃឈើ ហើយក៏បានហៅជំនាញមេព្រៃឲ្យមកទទួលតែម្តង។
នៅពេលមេព្រៃយកឡានមួយគ្រឿងផ្សេងទៀត មកសាងឈើចេញពីឡានដែលបានចាប់ គេឃើញ បុ រស មេឈ្មួញឈើឈ្មោះតេ ឡេ បានបង្ហាញកាយវិការក្តៅក្រហាវ ព្យាយាមទូរសព្ទ័ស្វែងរកអន្តរាគមន៏។ តែដោយពុំមានលទ្ធផល តេ ឡេ បានស្រែកឡូឡាថា រូបគេបានបង់ប្រាក់គ្មានសល់សមត្ថកិច្ចណាម្នាក់ ចាប់ពីចំណុចលើកឈើដាក់ឡានក្នុងព្រៃ រហូតដល់ក្រុង ចុះហេតុអីបែជាប៉ូលិសចរាចរណ៏មកចាប់វិញចឹង។ ដឹកតាំងពីខេត្តព្រះវិហារឆ្លងកាត់ច្រើនស្រុកដូចជា ស្វាយលើ. សូទ្រនិគមន៏ .ប្រាសាទបាកង.សមត្ថកិច្ចរាប់សិបគោលដៅមិនអី បែជាមកចង្រៃជាមួយប៉ូលិសចរាចរណ៏ទៅវិញ។ តាមពិតខាងប៉ូលិស មិនមែនរឿងស្លាកលេខទេ គឺរឿងឈើ។នៅខេត្តសៀមរាប មានឡានគ្មានលក្ខណៈគ្រប់គ្រាន់រាប់រយគ្រឿង ប៉ូលិសមិនទាន់មានចំណាត់ការណាមួយឲ្យប្រាកដនៅឡើយ។ លោកប៉ូលិសចរាចរណ៏ គួរក្រឡេកមើលឲ្យគ្រប់ជ្រុងផង សុំកុំឃើញតែឡានដឹកឈើ ទោះបីជាលោកតេ ឡេ មិនបញ្ជាក់ថា បង់ប្រាក់ឲ្យសមត្ថកិច្ចណាខ្លះ ហើយឈ្មោះអ្វី តែគេបានដឹងថាមានសមត្ថកិច្ចច្រើនស្ថាបន័ណាស់ដែលដើរប្រម៉ាញ់ និងដាក់ប៉ុស្តិ៏ឃុបឃិត ចាំត្រងប្រយោជន៏ពីបទល្មើសព្រៃឈើ។
នៅរសៀលថ្ងៃទី២៥ធ្នូនេះ បើទោះបីមានការរារែកអល់ឯកខ្លះៗ តែនៅទីបញ្ចប់ខាងមេព្រៃបានអូសឡានដឹកបទល្មើស រួមទាំងឈើប្រភេទលេខ១(ត្រសេក) ៥២ដុំស្មើ២,៤១៨ម៉ែត្រគូប យកទៅទុកនៅថ្នាលបណ្តុះកូនឈើស្រុកបន្ទាយស្រី ខេត្តសៀមរាប ដើម្បីចំណាត់ទៅតាមនិតិវិធីបន្ត៕ លោក ខេង ខេមរា
