ជាប់ពាក់ព័ន្ធក្នុងករណីឆក់ទូរស័ព្ទដៃក្នុងឱកាសឆ្លងឆ្នាំសាកល ២០១៥
ជនសង្ស័យចំនួន៥នាក់ ក្នុងនោះស្រី២នាក់ ត្រូវបានកម្លាំងកងរាជអាវុធហត្ថខេត្តសៀមរាប ធ្វើការចាប់ឃាត់ខ្លួន រួចយកមកកាន់មន្ទីរជំនាញ ដើម្បីធ្វើការសួរនាំ ជាប់ពាក់ព័ន្ធក្នុងករណីឆក់ទូរស័ព្ទដៃរបស់ភ្ងៀវអន្តរជាតិ ដែលបានមកកម្សាន្តនៅតំបន់ផ្ទប់ស្ទ្រីត ក្រុងសៀមរាប នាឳកាសអបអរសាទរ ឆ្លងឆ្នាំសាកល ២០១៥ កាលពីវេលាម៉ោង ២ទៀបភ្លឺ ថ្ងៃទី០១ ខែមករា ឆ្នាំ២០១៥ ។ ក្នុងកិច្ចចុះប្រតិបត្តិការណ៍ធ្វើការបង្ក្រាបនេះដែរ លោកវរសេនីយ៌ឯក ស្រី យូរ៉ា មេបញ្ជាការរងនៃទីបញ្ជាការដ្ឋានកងរាជអាវុធហត្ថខេត្តសៀមរាប និងជាប្រធានមន្ទីរ
ស្រាវជ្រាវនិងយុត្តិធម៌បានឲ្យដឹងថា ដោយអនុវត្តតាមការយកចិត្តទុកដាក់ខ្ពស់ជាប្រចាំពីសំណាក់ ឯ.ឩ ឃឹម ប៊ុនសុង អភិបាលខេត្តសៀមរាប និង ឯ.ឩ ឧត្តមសេនីយ៌ត្រី ម៉ន សាម៉ុន មេបញ្ជាការកងរាជអាវុធហត្ថខេត្តសៀមរាប ក្នុងកិច្ចចុះប្រតិបត្តិការណ៍បង្ក្រាបគ្រប់មុខសញ្ញាទាំងអស់ ដែលបង្កភាពអសន្តិសុខក្នុងខេត្តសៀមរាប ជាពិសេសក្នុងឳកាសចូលឆ្នាំសាកលនេះ ដើម្បីធានាសុវត្ថិភាព និងសណ្តាធ្នាប់សាធារណៈ ជូនដល់ភ្ងៀវទេសចរណ៍ជាតិ និងអន្តរជាតិ ដែលបានកម្សាន្តក្នុងទឹកដីប្រវត្តិសាស្ត្រ ។ ហើយបន្ទាប់ពីកំលាំងសមត្ថកិច្ចបានធ្វើការតាមដាន និងស្រាវជ្រាវហើយកំលាំងកងរាជអាវុធហត្ថខេត្ត ក៏បានធ្វើការឃាត់ខ្លួនជនសង្ស័យទាំងអស់ខាងលើ ដែលជាមុខសញ្ញាលួច ឆក់ យ៉ាងសកម្មក្នុងខេត្តសៀមរាប ទើបសមត្ថកិច្ចឃាត់ខ្លួនបញ្ជូនមកកាន់ទីបញ្ជាការដើម្បីសាកសួរ។ 
បើតាមការអោយដឹងពីលោកវរសេនីយ៏ឯក ស្រី យូរ៉ា មេបញ្ជាការរង និងជាប្រធានមន្ទីរស្រាវជ្រាវនិងយុតិ្តធម័បានអោយដឹងថា ។ ក្នុងកិច្ចចុះប្រតិបត្តិការណ៍ធ្វើការបង្ក្រាបនេះផងដែរ កម្លាំងកងរាជអាវុធហត្ថខេត្តសៀមរាប ដកហូតបានទូរស័ព្ទដៃម៉ូឌែល អាយហ្វូន ព៌ណស១គ្រឿង និងបានប្រគល់ជូនទៅជនរងគ្រោះ ដែលជាជនជាតិបរទេសវិញផងដែរ ។ បច្ចុប្បន្នជនសង្ស័យទាំង០៥នាក់ខាងលើ និងវត្ថុតាងត្រូវបានកម្លាំងកងរាជអាវុធហត្ថខេត្តសៀមរាប កសាងសុំណុំរឿងនិងបញ្ជូនទៅកាន់សាលាដំបូងខេត្តសៀមរាបហើយ កាលពីថ្ងៃទី០២ ខែមករា ឆ្នាំ២០១៥ ដើម្បីចំណាត់ការទៅតាមនីតិវិធីជាបន្ត ៕ លោក ខេង ខេមរា
