វាហាក់ដូចជាការបន្ទន់ឥរិយាបទភ្លាមៗ និង គួរឲ្យភ្ញាក់ផ្អើលបំផុតមួយ ក្រោយពេល ដែលមេដឹកនាំកំពូលរបស់កូរ៉េខាងជើងលោក គីម ចុងអ៊ុន បាននិយាយកាលថ្ងៃទី០១ ខែមករា ឆ្នាំ ២០១៥ ថាលោក ស្វាគមន៍ចំពោះកិច្ចប្រជុំកំពូលជាមួយនឹងកូរ៉េខាងត្បូង ដែលជាប្រទេសអតីតសាច់ឈាម
តែមួយនឹងគ្នានេះ។
ទីភ្នាក់ងារព័ត៌មានជប៉ុន ក្យូដូ ចេញផ្សាយនៅថ្ងៃសុក្រ ទី០២ ខែមករា ទៀតថា ការលើក ឡើងក្នុងកិច្ចបើកទំព័រឆ្នាំថ្មីនេះ មេដឹកនាំកូរ៉េខាងជើង បានបង្ហាញពីសម្តីមិនធម្មតា ដែលចង់ មានកិច្ចពិភាក្សាផ្លូវការជាមួយកូរ៉េខាងត្បូង ស្របពេលដែលស្ថានការណ៍កំពុងតានតឹងជាមួយ សហរដ្ឋអាម៉េរិក ហើយ គ្រប់គ្នាបានដឹងថា វាកើតឡើងដោយសារតែក្រុមហ៊ុន Sony Pictures Entertainment ដាក់បញ្ចាំងរឿង “The Interview” កាលពីថ្ងៃបុណ្យណូអែល ដែលផ្គើនទៅ នឹងការព្រមានយ៉ាងចាស់ដៃពីកូរ៉េខាងជើងនោះ។
លោក គីម ចុងអ៊ុន ថ្លែងក្នុងពិធីស្វាគមន៍ឆ្នាំថ្មី តាមកញ្ចក់ទូរទស្សន៍កូរ៉េខាងជើងដូច្នេះថា “ប្រសិនបើ រដ្ឋាភិបាលកូរ៉េខាងត្បូង ចង់សម្រេចឲ្យខានតែបាននូវ ការស្តារទំនាក់ទំនងឲ្យ ប្រសើរឡើងវិញ រវាងកូរ៉េទាំងពីរជុំវិញកិច្ចពិភាក្សាគ្នានោះ យើងជឿជាក់យើងអាចបើក កិច្ចពិភាក្សានានា ដែល បានផ្អាកនោះឡើងវិញ រួមកិច្ចពិភាក្សាផ្នែកផ្សេងទៀតផងដែរ។ យោងទៅលើបរិយាកាសនេះ វាគ្មានមូលហេតុអ្វី ដែលមិនអាចឲ្យមានការរៀបចំកិច្ច
ពិភាក្សា កម្រិតខ្ពស់ជាមួយ ប្រធានាធិបតីកូរ៉េខាងត្បូងគឺលោក ស្រី ផាក គឺនហេ នោះទេ។”
ទោះបីជាកូរ៉េខាងជើង បើកភ្លើងខៀវចំពោះកូរ៉េខាងត្បូងក្តី ប៉ុន្តែរដ្ឋកុម្មុយនិស្តមួយនេះ បាន ដាក់លក្ខខណ្ឌធំមួយថា ទីក្រុងសេអ៊ូល ត្រូវតែបញ្ឈប់នូវរាល់ការ ធ្វើសមយុទ្ធសង្គ្រាមប្រចាំឆ្នាំ ជាមួយនឹងសហរដ្ឋអាម៉េរិក ប្រសិនបើខ្លួនចង់ឲ្យកិច្ចពិភាក្សានោះកើតឡើងមែន។ សម្រាប់រដ្ឋាភិបាលកូរ៉េខាងត្បូង វិញ ពុំទាន់មានការឆ្លើយ តបណាមួយនៅឡើយទេ ចំពោះការលើក ឡើងពីមេដឹកនាំវ័យ ៣១ឆ្នាំខាងលើនេះ៕
