មិត្ដអ្នកអានជាច្រើនមានការខ្លោចផ្សាអាណិតអាសូរ មិនអាចទប់ទឹកភ្នែកបាននៅពេលបានឃើញលិខិតចុងក្រោយ បង្អស់របស់នារីបម្រើការលើយន្ដហោះ ដ៏ស្រស់ស្អាតផ្ញើទៅកាន់សង្សារ មុនពេលយន្ដហោះ QZ-8501 បាត់ខ្លួន ។កាលពី ២សបា្ដហ៍មុនពេលយន្ដហោះ Air Asia បាត់ខ្លួននារី
បម្រើការនៅលើ យន្ដហោះដ៏ស្រស់ស្អាតឈ្មោះ Khairunisa Haidar Fauzi បានផ្ញើសារស្នេហាទៅឱ្យមិត្ដប្រុសពីលើដែនអាកាសពេលនេះ សារនោះបានចាក់ ទម្លុះបេះដូងប្រុសស្នេហ៍ និងមិត្ដអ្នកអានឱ្យមានការក្ដុកក្ដួលចិត្ដយ៉ាងខ្លាំង ។
នៅ ក្នុងសារដែលនាងបានសរសេរ មានន័យថា “អូនស្រឡាញ់បងពីកម្ពស់៣៨ពាន់ហ្វីត” ។ សាររបស់នារីបម្រើការអាយុ២២ឆ្នាំ បានសរសេរនៅ លើកូនកន្សែង ហើយថតរូបផ្ញើទៅកាន់មិត្ដប្រុសឈ្មោះ Divo។
រូបភាព ចុងក្រោយរបស់នាងបានធ្វើឱ្យមនុស្សជាច្រើន មិនអាចទប់ទឹកភ្នែកបានអាណិតអាសូរដល់រូបនាងហេតុអ្វីក៏មានវាសនា ជីវិតខ្លីម្ល៉េះ ។
ប្រកប ជំនាញជាអ្នកបម្រើការនៅលើយន្ដហោះ ជាក្ដីស្រមៃតែមួយគត់ នៅក្នុងជីវិតរបស់នាង ។ អ៊ីលចឹងហើយ បានជានាង Fauzi មានអំណរណាស់ តាំងពីនាងបានក្លាយជាស្ដ្រីបម្រើការនៅលើយន្ដហោះ Air Asia ពីប៉ុន្មានខែមុន។ ប៉ុន្ដែគួរឱ្យអនិច្ចា ព្រហ្មលិខិតបានផ្ដាច់សង្ខាររបស់នាង។
ក្នុងចំណោមសាកសពដំបូង គេដែលត្រូវបានស្រង់ពីសមុទ្រ Java មកនោះ មានសាកសពមួយត្រូវបានស្គាល់ថា ជា នារីបម្រើការវ័យក្មេង អាយុទើបតែ២២ឆ្នាំម្នាក់នេះ ។
ខុសពីស្ដ្រីបម្រើការជាច្រើន នាក់ផ្សេងទៀតនៅលើយន្ដហោះ នាង Fauzi ចូលចិត្ដបង្ហោះនៅលើបណ្ដាញសង្គម Instagram នូវរាល់អ្វីៗដែលនាងបានធ្វើ ជាពិសេសសកម្មភាពអាជីពជាមួយក្រុមហ៊ុនអាកាសចរណ៍ដែលនាងបានបម្រើការ ។ ប៉ុន្ដែនៅមុននាងបានឡើងយន្ដហោះ Airbus A320-200 នាងបានបង្ហោះសារចុងក្រោយមួយដែលនាងបានសរសេររួចថតជារូបដាក់ បង្ហោះនៅលើបណ្ដាញសង្គម ។
អតីត និស្សិតច្បាប់នាង Fauzi បានចូលធ្វើការនៅក្រុមហ៊ុនអាកាសចរណ៍ខាងលើមិនជាយូរប៉ុន្មាននោះទេ ប៉ុន្ដែបទពិសោធន៍ និងការទទួលខុសត្រូវរបស់នាងមានច្រើនជាងអ្វីដែលគេប្រៀបធៀបទៅនឹង ពេលវេលាដែលនាង ទើបចូលមកប្រកបអាជីពនេះ ។ ព្រោះថា ប្រសិនបើសាកសពរបស់នាងត្រូវបានរកឃើញមុនគេនេះ វាអាចជាប់ទាក់ទង ទៅនឹងសេចក្ដីស្និដ្ឋានជាច្រើនដែលអ្នកជំនាញបានពន្យល់ថា នាងអាចជាមនុស្សមុនគេម្នាក់ដែលស្គាល់ពីវិធីសាស្ដ្រ ជម្លៀសមនុស្សចេញពីយន្ដហោះ ហើយព្យាយាមបើកទ្វារសង្គ្រោះបន្ទាន់របស់យន្ដហោះភ្លាម បន្ទាប់ពីយន្ដហោះបានមកចុះចត ដោយសន្សឹមៗនៅលើទឹកសមុទ្រ ។
ចំពោះ បងប្អូនសាច់ញាតិរបស់នាង Khairunisa Haidar Fauzi បញ្ជាក់ថា នាងពិតជាបង-ប្អូនស្រីដែលរូសរាយរាក់ទាក់មានសន្ដានចិត្ដល្អ ចេះជួយទុក្ខធុរៈរបស់អ្នកដទៃ និងយកចិត្ដទុកដាក់ដល់ក្រុមគ្រួសារ ទោះបីជានាងធ្វើការនៅលើកម្ពស់ខ្ពស់ពីដីររាប់គីឡូម៉ែត្រ និងនៅឆ្ងាយពីផ្ទះក្ដី ក៏នាងទូរស័ព្ទមកផ្ទះយ៉ាងតិច៤ដងផងដែរ ។ ក្ដីឈឺចាប់ខ្លោចផ្សារបស់សាច់ញាតិអ្នកដែលស្គាល់រូបនាង ពិសេសគឺមិត្ដប្រុស មិនអាចគណនាបានឡើយនៅពេល ដែលមើលឃើញសាកសពរូបនាងដែលស្លៀកពាក់ឯកសណ្ឋានអ្នកបម្រើការនៅលើ យន្ដហោះ ដូចដែលនាងធ្លាប់ស្លៀកពាក់ រាល់ដង ។
សារ ទម្លុះបេះដូងរបស់នាងបានធ្វើឱ្យគេនឹកឃើញដល់សាររបស់ស្វាមីដែល មានភរិយាកំពុងតែពរផ្ទៃដំបូង មុនពេលឡើងទៅលើយន្ដហោះមរណៈនោះ។ លោកបាននិយាយទៅកាន់ភរិយារបស់ខ្លួនថា “បងស្រឡាញ់អូនពេលនេះ និងគ្រប់ពេលទាំងអស់ មានតែការស្លាប់ប៉ុណ្ណោះដែលអាចបំបែកបំបាក់ស្នេហាយើងបាន” ៕
