ភ្នំពេញ:ហេតុការណ៏គ្រោះថ្នាក់ចរាចរមួយដែលបង្កឡើងដោយរថយន្តកូរូឡាបើកបត់ឆ្លងផ្លូវត្រូវវាក់ជាមួយនិងម៉ូតូវ៉េវ១១០ បុកចំពីមុខយ៉ាងពេញទំហឹង បណ្តាលបុរសជាអ្នកបើកម៉ូតូវ៉េវ១១០ រងរបួសធ្ងន់បាក់ភ្លៅស្តាំ និងម្នាក់ទៀតរងរបួសស្រាល ឯម៉ូតូនិង រថយន្តរងការខូចខាតទាំងសងខាង ។
ហេតុការណ៏នេះបានកើតឡើងកាលពីវេលាម៉ោង៨នាទី៥០នាទីយប់ថ្ងៃទី៤ ខែធ្នូ ឆ្នាំ២០១៥ នៅតាមបណ្តោយផ្លូវសហព័ន្ឋរុស្សី ស្ថិតក្នុងភូមិព្រៃទា សង្កាត់ចោមចៅ ខណ្ឌពោធិ៍សែនជ័យ។
ប្រភពពត៌មានពីកន្លែងកើតហេតុបានឲ្យដឹងថា មុនពេលកើតហេតុ គេបានឃើញរថយន្តកូរូឡា ពណ៌ ស្លែ ពាក់ស្លាកលេខភ្នំពេញ 2A-5215 បើកដោយបុរសម្នាក់និងរួមដំណើរដោយបុរសស្ត្រី២នាក់រួមជាមួយនិងក្មេងតូចប្រុសស្រីចំនួន២នាក់ទៀត ដែលបើកចេញពីក្នុងភូមិព្រៃទាចេញទៅផ្លូវសហព័ន្ឋរុស្សី លុះដល់ចំណុចកើតហេតុរថយន្តបានបត់ឆ្លងផ្លូវ ក្នុងល្បឿនលឿន ស្រាប់តែវាក់ជាមួយនិងម៉ូតូវ៉េវ១១០ ពណ៌ខ្មៅពាក់ស្លាកលេខភ្នំពេញ 1R-1483 ជិះដោយបុរស២នាក់តាមបណ្តោយផ្លូវសហព័ន្ឋរុស្សី ក្នុងទិសដៅពីកើតទៅលិច បុកចំពីមុខពេញទំហឹង
បណ្តាលឱ្យអ្នកបើកម៉ូតូវ៉េវ១១០ ខ្ទាតចេញពីម៉ូតូរងរបួសធ្ងន់បាក់ភ្លៅខាងស្តាំ ចំណែកអ្នកជិះពីក្រោយរងរបួសស្រាល។ បន្ទាប់ពីកើតហេតុរួចគេបានឃើញរថយន្តបង្កខាងលើបានបើករត់គេច ខ្លួនពីកន្លែងកើតហេតុ លុះមកដល់ ផ្លូវ២០០៤ ទល់មុខនិងភោជនីយដ្ឋានអូខេហេបភីណាយ រថយន្តបានផ្តូរតៃកុងពីអ្នកបើកជាបុរសមកជាស្ត្រីវិញ ហើយរថយន្តបានបន្តល្បឿនរត់គេចរហូតមកចំណុចផ្លូវកែងនិងស្ថានីយ៍ប្រេងឥន្ឋនះ សូគីមិច ដែលស្ថិតក្នុងភូមិត្រពាំងល្វា ទើបសមត្ថកិច្ចស្ទាក់ចាប់បានភ្លាមៗតែម្តង ។
ក្រោយពេលកើតហេតុជនរងគ្រោះត្រូវបានរថយន្តសាមុយដឹកយកទៅសង្គ្រោះភ្លាមៗនៅគ្លីនិកឯកេជន ចំណែកឯជនបង្កនិងរថយន្តត្រូវបានសមត្ថកិច្ច នាំយកមករក្សាទុកនៅអធិការដ្ឋាននគរបាលខណ្ឌពោធិ៍សែនជ័យ ដើម្បីរងចាំការដោះស្រាយតាមនិត្តិវិធីច្បាប់ ៕
