ភ្នំពេញ ៖ បុរសម្នាក់ចេញពីពិធិជប់លៀងស្រវឹងជោកជាំជិះម៉ូតូដួលខ្លួនឯងសន្លប់ស្ដូកស្ដឹងត្រូវបានប្រជាពលរដ្ឋបញ្ជូនទៅមន្ទីរពេទ្យភ្លាមៗ ហេតុការណ៍នេះបានកើតឡើងកាលពីវេលាម៉ោង១១និង១០នាទីយប់ថ្ងៃទី៤ខែមករាឆ្នាំ២០១៤ ត្រង់ចំណុចស្ដុបផ្លូវលេខ១៦៣កែងផ្លូវលេខ៤៣២
ស្ថិតក្នុងសង្កាត់ទួលទំពូង១ ខណ្ឌចំការមន។
បើតាមសម្ដីសាក្សីដែលបានឃើញហេតុការណ៍បានអោយដឹងថា គេឃើញបុរសម្នាក់ជិះម៉ូតូមួយគ្រឿងម៉ាកហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខ ភ្នំពេញ 1BU-9079 ធ្វើដំណើរតាមបណ្ដោយផ្លូវលេខ១៦៣ ទិសដៅពីត្បូងទៅជើង ស្រាប់តែដល់ចំណុចកើតហេតុ
ដោយសារបុរសរងគ្រោះស្រវឹងខ្លាំងពេកទប់ចង្កូតម៉ូតូមិនជាប់ក៏ដួលក្បែរចិញ្ចើមផផ្លូវសន្លប់ស្ដូកស្ដឹង។ សាក្សីបន្តថាទំនងបុរសរងគ្រោះទើបចេញពីពិធីជប់លៀងនៅកន្លែងណាមួយទើបស្រវឹងខ្លាំងបែបនេះ។
បន្ទាប់ពីកើតហេតុប្រជាពលរដ្ឋដែលរស់នៅក្បែរទីនោះក៏បានជួយមើលនិងបានទំនាក់ទំនងក្រុមគ្រួសារជនរងគ្រោះ រួចហៅរថយន្តសាមុយដឹកបញ្ជូនជនរងគ្រោះទៅមន្ទីរពេទ្យភ្លាមៗផងដែរ ចំណែកម៉ូតូក៏ត្រូវបានក្រុមគ្រួសារជនរងគ្រោះក៏បានយកទៅផ្ទះវិញផងដែរ៕
