មាននាវា១គ្រឿងថ្មីទៀតត្រូវបានគេប្រទះឃើញយកមក ប្លុងចោលក្នុងដែនទឹកអីតាលី ។ កងឆ្មាំឆ្នេរសមុទ្រប្រទេសនេះអះអាងកាលពីថ្ងៃទី៣ មករា ថា នាវាដឹកទំនិញមួយគ្រឿងជាមួយជនអន្តោប្រវេសន៍លួចលាក់៤៥០នាក់ជិះ ក្នុងនោះ ត្រូវបានក្រុមនាវិកប្លុងចោល ។
យោងតាមកងទ័ពអាកាស អីុតាលីថា នាវានេះបានខូចពេលមកជិតដល់ឆ្នេរសមុទ្រអីុតាលី។ រួចបើតាមកាសែតអីុតាលី LA REPUBBLICA ថា នាវានេះឈ្មោះ EZADEEN ដោតទង់ជាតិសេរ៉ាឡេអូន ។ ការប្រកាសអាសន្នត្រូវបានធ្វើដោយពួកអ្នកដំណើរ ដែលប្រើវិទ្យុទាក់ទងរបស់នាវាដោយអះអាងថា ក្រុមនាវិកបានរត់ចោលនាវានេះ ហើយពុំមានអ្នកគ្រប់គ្រងវាឡើយ ។
តាម TWITTER កងឆ្មាំឆ្នេរសមុទ្រអះអាងថា មានជនអន្តោប្រវេសន៍៤៥០នាក់ លើនាវាដឹកទំនិញនេះ ដែលគ្មានក្រុមនាវិក ។ ឧទ្ធម្ភាគចក្រ១គ្រឿងត្រូវបានបញ្ជូនទៅប៉ុនប៉ងពិនិត្យមនុស្សលើនាវា ហើយគ្រប់គ្រង ។ នាវានេះស្ថិតនៅកន្លែងមួយចម្ងាយ៦៥គីឡូម៉ែត្រ ពីដែនទឹក CAP DE LEUCA ចុងភាគអាគ្នេយ៍អីុតាលី ។
កាលពីថ្ងៃមុន នេះ នាវាកាហ្គោ១គ្រឿងដោតទង់ជាតិម៉ុលដាវី ឈ្មោះ BLUE SKY-M ត្រូវបានកងម៉ារីនអីុតាលីជួយ ដែលនាំទៅដល់ការជួយសង្គ្រោះជនអន្តោប្រវេសន៍ជិះក្នុងនោះប្រមាណជា ៩០០នាក់ មកកាន់កំពង់ផែមួយ ។ នាវាកាហ្គោដែលដឹកមនុស្សពេញណែនណាន់តាន់តាប់នេះ ក៏ត្រូវក្រុមនាវិកបោះបង់ចោលក្នុងសមុទ្រដែរ ។ បើកុំតែមានការជួយបែបនេះ នាវានោះនឹងត្រូវរលកបោកទៅប៉ះនឹងផ្ទាំងថ្មពុំខានឡើយ ៕
