សៀមរាបៈ ប្រជាពលរដ្ឋខ្មែរជាច្រើនជំនាន់ សុទ្ធតែបានស្គាល់ពីគុណប្រយោជន៍នៃដើមរាំងទឹក ដែលភាគច្រើនដុះនៅក្នុងបឹងទន្លេសាប និងដុះនៅតាមបឹង អូរ ត្រពាំង តែបច្ចុប្បន្នដើមរាំងគឺជាមុនស្នេហ៍ទាក់ទាញភ្ញៀវទេសចរណ៍ ជាច្រើនមកកំសាន្តពីទិដ្ឋភាពដ៏ស្រស់ស្អាត 
នៃបឹងទន្លេសាប ក្នុងនោះផ្ទៃទឹកទន្លេសាប រួមទាំងដើមរាំងទឹករាប់ម៉ឺនរាប់សែនដើម ដែលដុះត្រៀបត្រាជាជួរក្នុងផ្ទៃទឹក បានបង្ហាញឲ្យឃើញពណ៌ចម្រុះបញ្ជេញ នូវរស្មីចាំងភ្លេតៗ ពីស្លឹករាំង ដែលមានខ្លះស្លឹកខ្ចី ខ្លះស្លឹកចាស់ ។
មិនតែប៉ុណ្ណោះទិដ្ឋភាពបឹងទន្លេសាប ដែលប្រកបដោយដើមរុក្ខជាតិជាច្រើនដែលបានដុះនៅក្នុងទឹក ហើយកំពុងតែធ្វើឲ្យភ្ញៀវជាតិ និងភ្ញៀវអន្តរជាតិ មានចំណាប់អារម្មណ៍ចង់ឃើញចង់ស្គាល់ ពីគុណប្រយោជន៍របស់ ដើមរាំងទឹក ដែលប្រជាពលរដ្ឋខ្មែរតែងតែយកមក ប្រកបជាមួយម្ហូបអាហារ ពិសារជាមួយនំបញ្ចុក ទឹកគ្រឿង នំបាញ់ឆែវ ដែលមានរស់ជាតិឆ្ងាញ់ ដែលត្រូវបានគេដឹងថា ជាឳសថបុរាណជួយដល់អ្នកកើតរោគ ក្រពះ និងអ្នកមានជំងឺរាក់រូសទៀតផង។
លោក ចាន់ ធី ជាអ្នកនេសាទស្ថិតនៅក្នុងភូមិចុងឃ្នាស សង្កាត់សៀមរាប ក្រុងសៀមរាប ខេត្តសៀមរាប បានឲ្យដឹងថាដើមរាំងទឹកមានមុខងារសំខាន់ណាស់ ក្នុងការជួយជាជម្រករបស់មឆ្ឆាជាតិ ក្នុងការបន្តពូជពង កូន ហើយកម្រនឹងឃើញមានដុះនៅផ្នែកខាងលើនៃវាលភ្នំ តែបច្ចុប្បន្នដើមរាំងត្រូវបានគំរាមកំហែងប្រឈមមុខនិងហិចហោច ដោយសារតែនៅរដូវប្រាំងមានអ្នកនេសាទ ដុតព្រៃលិចទឹកចាប់សត្វអណ្តើក សត្វពស់និងការកាប់ព្រៃទំលាក់ទុកឲ្យងាប់ រួចយកមកធ្វើជាអុស មិនតែប៉ុណ្ណោះដើមរាំងទឹកបច្ចុប្បន្នកំពុងតែប្រឈម និងការគាស់យកទាំងឬស ដឹកចេញទៅលក់នៅក្រៅប្រទេស ដោយសារមានការលបលួច និងឃុបឃិតគ្នា ពីសំណាក់អ្នកមានអំណាច។
ប្រជាពលរដ្ឋបានសំណូមពរ ឲ្យឯកឧត្តម ណៅ ធួក ប្រធានរដ្ឋបាលជលផល មេត្តាជួយទប់ស្កាត់នូវទង្វើដូច ខាងក្រោមដើម្បីថែរក្សា ព្រៃលិចទឹកសម្រាប់ការបន្តពូជរបស់មឆ្ឆាជាតិ ក៏ដូចជាការថែរក្សាអភិរក្សដើមរាំង ទឹក សម្រាប់លំអរសោភ័ណភាពនៃបឹងទន្លេសាប ក្នុងការទាក់ទាញភ្ញៀវទេសចរណ៍មកកំសាន្តកាន់តែច្រើន។
