សៀមរាបៈ នៅថ្ងៃទី០៥ ខែមករា ឆ្នាំ២០១៥ មានប្រជាពលរដ្ឋ២០៧គ្រួសារ នៅឃុំត្បែង ស្រុកបន្ទាយស្រី ខេត្តសៀមរាប កំពុងនាំគ្នមកត្រួសត្រាយដីព្រៃឧទ្យានជាតិភ្នំគូលែនដើម្បីយកដីឧទ្យានជាតិមកសាងសង់លំនៅដ្ឋានរបស់ខ្លួនក្នុងមួយគ្រួសារ ម្នាក់ៗត្រូវបានក្បាលដី៥០ម៉ែត្រ និងបណ្តោយ១០០ម៉ែត្រ។
ពាក់ព័ន្ឋទៅនឹងការធ្វើសកម្មភាព កាប់បំផ្លាញព្រៃឈើឧទ្យានជាតិភ្នំគូលែន លោក សូរ សុន អភិបាលស្រុកបន្ទាយស្រី លោក ទា គឹមសុទ្ធ នាយខណ្ឌរដ្ឋបាលព្រៃឈើខេត្តសៀមរាប និង លោក លឹម ផេង នាយកឧទ្យានជាតិភ្នំគូលែន នឹងមានការចូលរួមពីកម្លាំងប្រដាប់អាវុធគ្រប់លំដាប់ថ្នាក់បានចូលរួមនាំគ្នាទប់ស្កាត់ បទល្មើសរបស់ប្រជាពលរដ្ឋដែលនៅក្នុងឃុំត្បែងកំពុងធ្វើសកម្មភាពកាប់បំផ្លាញព្រៃឧទ្យានជាតិភ្នំគូលែន។
លោក សូរ សុន អភិបាលស្រុកបន្ទាយស្រីបានប្រាប់ប្រជាពលរដ្ឋមួយចំនួនដែលកំពុងនាំគ្នាតវ៉ាយកដីព្រៃឧទ្យានជាតិភ្នំគូលែនមកធ្វើជាកម្មសិទ្ធផ្ទាល់ខ្លួន និងហាមឃាត់មិនអោយប្រជាពលរដ្ឋធ្វើសកម្មភាពកាប់ត្រួសត្រាយបំផ្លាញព្រៃឈើឧទ្យានជាតិភ្នំគូលែនបន្តទៀតឡើយ និងសូមបងប្អូនប្រជាពលរដ្ឋកុំនាំគ្នាកាប់ព្រៃឧទ្យានជាតិភ្នំគូលែន ពីព្រោះព្រៃឈើឧទ្យាននេះជាសម្បត្តិរដ្ឋ និងជាទីរមនីយ៍ដ្ឋានរបស់យើងទាំងអស់គ្នា។
តែទោះជាមានការសម្របសម្រួលយ៉ាងណានោះ ប្រជាពលរដ្ឋក៏បាននាំគ្នាស្រែកតវ៉ាយ៉ាងខ្លាំងៗថា ពួកយើងមិនសុខចិត្តទេ យើងនាំគ្នាធ្វើលំនៅដ្ឋានសារជាថ្មីទៀត ពីព្រោះមន្ត្រីរាជការបានរុះរើខ្ទមរបស់យើងអស់បាត់ ហើយពួកយើងទាំងអស់គ្នាមិនព្រមស្តាប់ហេតុផលរបស់លោកអភិបាលស្រុកទៀតឡើយ ។
លោក ទា គឹមសិទ្ធ នាយខណ្ឌរដ្ឋបាលព្រៃឈើខេត្តសៀមរាប ក៏បានមានប្រសាសន៍ ទៅកាន់ប្រជាពលរដ្ឋ សូមបងប្អូនត្រលប់ទៅផ្ទះវិញសិន ហើយសូមធ្វើឯកសារថ្មីមួយទាក់ទងនឹងប្រជាពលរដ្ឋអត់មានដីធ្លី ដើម្បីដាក់ជូនទៅលោកអភិបាលស្រុកបន្ទាយស្រី និងយកឯកសារទាំងអស់របស់ប្រជាពរដ្ឋ យើងនឹងដាក់ជូនទៅថ្នាក់ខេត្តដើម្បីអោយថ្នាក់ខេត្តពិនិត្យ និងសម្រេចជូនបងប្អូនទាំងអស់គ្នា។
ប្រជាពលរដ្ឋនិយាយថាការធ្វើឯកសារដាក់ជូនទៅសាលាស្រុក និងស្នាមមេដៃរបស់ប្រជាពលរដ្ឋច្រើនណាស់ តែមិនដែលឃើញអាជ្ញាធរណាមួយចុះមកដោះស្រាយជូនប្រជាពលរដ្ឋឡើយ បន្ទាប់មកកងកម្លាំងរាជអាវុធហត្ថ និងមន្ត្រីប៉ូលីស ក៏បានឃិតខ្លួនជនសង្ស័យមេខ្លោងចំនួន៣នាក់ ដែលនាំប្រជាពលរដ្ឋបះបោរ ឲ្យកាប់ទន្ទ្រានយកដីឧទ្យានដីជាតិភ្នំគូលែន បាននាំទៅសាកសួរនៅតុលាការ និងផ្តន្ទាទោសទៅតាមផ្លូវច្បប់នៅវេលាម៉ោង១១.៣០នាទីថ្ងៃត្រង់ នៅថ្ងៃទី០៥ ខែមករា ឆ្នាំ២០១៥។
ដោយ(ព្រំ សុខា និង ឡាន់ សុចិត្រ)
