កំពង់ឆ្នាំង៖ កូនប្រុសអកត្តញូម្នាក់ត្រូវបានសមត្ថកិច្ចលើកគ្នាចាប់ខ្លួន ខណៈ ដែលបានវាយធ្វើបាបម្តាយទាំងរបូតសារុងទាញបញ្ចូលលើផ្លូវជាតិអោយឡានបុក ។ ហេតុការណ៍នេះបានកើតឡើងនៅវេលាម៉ាង៦និង៣០នាទីព្រឹកថ្ងៃទី៧ ខែមករា ឆ្នាំ២០១៥ នៅលំនៅដ្ឋាន ស្ថិតក្នុង ភូមិព្រៃខ្មែរ ឃុំរលាប្អៀរ ស្រុករលា ប្អៀរ ខេត្តកំពង់ឆ្នាំង។
លោកនាយនគរបាលប៉ុស្តិ រដ្ឋបាលឃុំរលាប្អៀរបាននិយាយអោយដឹងថាៈ កូនអកត្តញូរូបនោះមានឈ្មោះ ផា សុភា អាយុ៣៣ឆ្នាំនៅលីវ ជាមនុស្សស្រវឹងខួបរាល់ថ្ងៃ មានម្តាយឈ្មោះ សែន អៀច ៧២ឆ្នាំ និង ឪពុកឈ្មោះ ចិន ភិ អាយ៧៧ឆ្នាំ គ្រួសារនេះមានកូន៣នាក់ កូនស្រវឹងខួបជាកូនទី២ក្នុងចំណោមកូន៣នាក់។ចំពោះករណីធ្វើបាបឪពុក ម្តាយនេះ សមត្ថកិច្ចធ្លាប់បានធ្វើការអប់រំណែនាំ និងបានធ្វើកិច្ចសន្យាជាច្រើនលើកមកហើយ តែមិនគេរាងចាល។ នៅព្រឹកហេតុនេះ ប្រជាពលរដ្ឋបាន រាយការណ៍អោយ ពេលនោះកម្លាំងនគរបាលប៉ុស្តិ និងកម្លាំងនគរបាលស្រុករលាប្អៀរ បានទៅដល់កន្លែងកើតហេតុបានឃើញជនប្រមឹកជាកូនកំពុងចាប់កាច់ដៃម្តាយ ពេលនោះសមត្ថកិច្ចមានគ្នា៤នាក់ព្រួតគ្នាចាប់ជនរូបនោះ ស្ទើរមិនចង់ឈ្នះទេ ហើយ
បានបញ្ជូនមកកាន់ប៉ុស្តិនគរបាលរដ្ឋបាលដើម្បីធ្វើការសាកសួរ ចំណែកឪពុកម្តាយក៏បានសម្រេចចិត្តដាក់ពាក្យប្តឹង ដោយមិនយោគយល់ទៀតឡើយ។ ស្ត្រីជាម្តាយបាននិយាយអោយដឹងក្នុងក្តីឈឺចាប់ថា៖កូនគាត់ធ្វើបាបគាត់រយះពេល៤ឆ្នាំហើយ គាត់ចេះតែទ្រាំរហូត ប៉ុន្តែលើកនេះគាត់ទ្រាំមិនបានទេ ព្រោះកូនគាត់បានចាប់រុញគាត់បញ្ចូលឡានប្រុងសម្លាប់គាត់ ពេលគាត់របូតសារុង គាត់សុំកូនថាៈ “ម៉ែរបូតសារុងហើយ វាថារបូតអីរបូតទៅ” ពេលនោះបានឈ្មោះមុំ ជាកូនប្រសារបានស្ទុះមកជួយស្លៀកសារុងអោយទាំងដៃគាត់ទាំង២ត្រូវកូនស្រវឹងខួបនោះចាប់កាច់ជាប់ និងបានវាយប្អូនស្រីខ្លួនម្នាក់អោយរបួសហើមមុខទៀតផងពេលនាងចូលមកជួយម្តាយ។
ស្ត្រីជាម្តាយបាននិយាយបន្តថាៈ រយៈពេល៤ឆ្នាំកន្លងទៅកូនប្រុសគាត់តែបានធ្វើបាបគាត់ស្ទើរតែរាល់ថ្ងៃអោយតែស្រវឹង នៅរាល់យប់ម៉ោង១០ ទៅម៉ោង១១ ពេលត្រឡប់មកពីផឹកវិញបានស្រែកសម្លុតអោយគាត់ងើបដួសបាយអោយវាស៊ី ម្ហូបមានត្រឹមត្រីប្រឡាក់ ត្រីអាំង ឬសម្លកកូរ វាមិនស៊ីទេវាជះបាយម្ហូបចោល វាទារស៊ីឡើងគឺសម្លសាច់មាន់ សាច់ជ្រូក ទើបស៊ី។ ពេលខ្លះគាត់មិននៅកូនអកត្តញូរូបនោះ បានលួចកើបស្រូវយកទៅលក់ផឹកទៀត។ 
ប៉ុន្មានថ្ងៃមុននោះ វាគំរាមអោយគាត់ជាម្តាយ ទៅទិញស្រាអោយវាមួយលីត្រ សាច់ផាក់ឡូវយកមកក្លែម៣ពាន់រៀល ពេលនោះគាត់គ្រាន់តែយឺតបន្តិច វាទៅដុតជន្លុងចំប៉ើងឆេះបានគេជួយពន្លត់ទាន់ ទើបគាត់ក៏ព្រមទៅទិញស្រាអោយវាទៅ រាល់ថ្ងៃវាទារលុយចាយពី៥ពាន់ទៅ១ម៉ឺនរៀល និងទារខោ អាវស្បែកជើងថ្មីទៀតគាត់ពិតជាឈឺចាប់ខ្លាំងណាស់។
នៅក្នុងប៉ុស្តិនគរបាលសមត្ថកិច្ចមិនអាចសាកសួរយកចម្លើយពីជនស្រវឹងខួបបានទេ ព្រោះគេគិតតែស្រែកយំអោយម៉ែ អោយឪជួយទៅវិញព្រោះដឹងខ្លួនថាជិតជាប់ពន្ធនាគារហើយ តែម្តាយឪពុកមិនអាចជួយបានទេ ព្រោះជ្រុលពេលហើយ កូនអកត្តញ្ញូរូបត្រូវបានសមត្ថកិច្ចកសាងសំណុំរឿងបញ្ជូនមកស្នងការដ្ឋានបគរបាលខេត្ត និងបញ្ជូនទៅកាន់តុលាការខេត្តចាត់ការបន្ត៕
