ភ្នំពេញ ៖ ស្ត្រីចំណាស់ម្នាក់ ត្រូវបានចៅក្រមស៊ើបសួរសាលាដំបូងរាជធានីភ្នំពេញ សម្រេច កាលពីរសៀលថ្ងៃអាទិត្យ ទី១៦ ខែមីនា ឆ្នាំ២០១៤ ឃុំខ្លួនដាក់ពន្ឋនាគារបណ្តោះអាសន្ន ក្រោមការ ចោទប្រកាន់ពីបទមិនបំពេញកាតព្វកិច្ចចំពោះឧបករណ៍អាចជួញដូរបាន ពាក់ព័ន្ឋការចេញសែកអត់ សាច់ប្រាក់ចំនួន៩ម៉ឺន៦ពាន់ដុល្លារអាមេរិក បន្ទាប់ពីស្ត្រីរូបនេះត្រូវបានសមត្ថកិច្ចឃាត់ខ្លួន តាម ដីការបស់តុលាការ ។
ស្ត្រីរូបនេះឈ្មោះ អ៊ុក សុខន អាយុ៥៣ឆ្នាំ មានទីលំនៅផ្ទះលេខ២០៣ ផ្លូវលេខ៣០៦ សង្កាត់ទួលស្វាយព្រៃ១ ខណ្ឌចំការមន រាជធានីភ្នំពេញ ត្រូវបានសមត្ថកិច្ចការិយាល័យព្រហ្មទណ្ឌកម្រិតស្រាលរាជធានីភ្នំពេញ ឃាត់ខ្លួនកាលពីថ្ងៃទី១៥ ខែមីនា ឆ្នាំ២០១៤ តាមដីកា បង្គាប់ឲ្យចាប់ខ្លួនរបស់លោក កោ វណ្ឌី អនុប្រធានសាលាដំបូងរាជធានីភ្នំពេញ ពីបទមិនបំពេញកាតព្វកិច្ចចំពោះឧបករណ៍អាចជួញដូរបាន ចុះថ្ងៃទី១៩ ខែកុម្ភះ ឆ្នាំ២០១៤ ។
ពាក់ព័ន្ឋបញ្ហានេះ ប្រភពព័ត៌មានពីមន្ត្រីតុលាការ បានឲ្យដឹងថា ដើមចមដែលនាំឲ្យមានការ ចោទប្រកាន់នេះ គឺកើតឡើងកាលពីថ្ងៃទី០១ ខែមិថុនា ឆ្នាំ២០១១ ស្ត្រីជាប់ចោទ បានលក់ដីមួយ កន្លែងទៅឲ្យបុរសម្នាក់តម្លៃ១០ម៉ឺនដុល្លារ ខណៈដីមួយកន្លែងនេះត្រូវបានលក់ឲ្យអ្នកផ្សេងបាត់ទៅ ហើយ ។
ក្រោយមក បុរសម្នាក់ដែលទិញដីនេះ បានដឹងថាដីរបស់ស្ត្រីជាប់ចោទបានលក់ឲ្យអ្នក ផ្សេងបាត់ទៅហើយ ក៏បានទាមទារយកប្រាក់មកវិញ ហើយស្ត្រីជាប់ចោទបានចេញសែកមួយសន្លឹក តម្លៃ៩ម៉ឺន៦ពាន់ដុល្លារ តែការពិតសែកនេះគ្មានប្រាក់នោះទេ ។ ផ្តើមចេញពីបញ្ហានេះ បុរសម្នាក់នេះ ក៏បានដាក់ពាក្យបណ្តឹងប្តឹងស្ត្រីជាប់ចោទតែម្តង ៕ 
