ភ្នំពេញ ៖ សមត្ថកិច្ចកងរាជអាវុធហត្ថរាជធានីភ្នំពេញ កាលពីថ្ងៃទី១៧ ខែមីនា ឆ្នាំ២០១៤ បានបញ្ជូនបុរសវៀតណាមម្នាក់មកអយ្យការអមសាលាដំបូងរាជធានីភ្នំពេញ ដើម្បីសាកសួរពីដំណើរ រឿងប្រើអំពើហិង្សាទៅលើបុរសចំណាស់ម្នាក់ មានឋានន្តរស័ក្ដិឧត្ដមសេនីយ៍ទោផ្កាយ២យោធា បម្រើការងារនៅក្រសួងការពារជាតិ ព្រោះតែបញ្ហាកកស្ទះចរាចរបន្តិចបន្ទួច ។
ប៉ុន្តែរហូតមកទល់ រសៀលថ្ងៃដដែលនេះ លោក ព្រះរាជអាជ្ញារង លី សុផាណា ពុំទាន់សម្រេចយ៉ាងណានៅឡើយទេ ។ ជនសង្ស័យមានឈ្មោះ ចាំង គីមហេង ភេទប្រុស អាយុ២៦ឆ្នាំ ជនជាតិវៀតណាម ។ ចំណែក ជនរងគ្រោះឈ្មោះ ងី វ៉ាន់ឌីម ភេទប្រុស អាយុ៦៤ឆ្នាំ មានឋានន្ដរស័ក្ដិឧត្ដមសេនីយ៍ទោ (ផ្កាយ២យោធា) បម្រើការងារនៅ ក្រសួងការពារជាតិ ។
ប្រភពពីមន្ត្រីតុលាការ បានឱ្យដឹងថា មុនពេលកើតហេតុ ជនរងគ្រោះបានធ្វើដំណើរ តែម្នាក់ឯងដោយម៉ូតូម៉ាកហុងដាឌ្រីមសេ ១២៥ ពាក់ស្លាកលេខភ្នំពេញ 1CB-1265 រីឯ២នាក់ប្ដីប្រពន្ធ ធ្វើដំណើរ ដោយរថយន្ដមួយគ្រឿង ពណ៌ខ្មៅ ពាក់ស្លាកលេខភ្នំពេញ 2Q-6009 ។
ជន រងគ្រោះ និង២នាក់ប្តីប្រពន្ឋនេះ បានធ្វើដំណើរ ស្របទិសគ្នាតាមបណ្ដោយផ្លូវសហព័ន្ធរុស្ស៊ី។ លុះមកដល់ចំណុចមុខក្រសួងការពារជាតិ ក៏បានបត់ដូចគ្នា ។ ពេលនោះដោយស្ថាន ភាពផ្លូវមានការកកស្ទះចរាចរណ៍បន្ដិច ហើយ២នាក់ប្តីប្រពន្ឋបានបើករថយន្ដពីខាង ក្រោយម៉ូតូ រួចចុចស៊ីផ្លេរ ជាសញ្ញា តែជនរងគ្រោះមិនបាននិយាយអ្វីទាំងអស់ ដោយបន្តទៅមុខជាធម្មតា ។
ប្រភពបន្ដ ទៀតថា បន្ទាប់ពីធ្វើដំណើរទៅមុខបានចម្ងាយប្រហែល១០ ម៉ែត្រ ២នាក់ប្តីប្រពន្ឋក៏បានបើករថយន្ដទៅ ហួសម៉ូតូជនរងគ្រោះបន្តិច ក៏បានចុះពីរថយន្ដដើរសំដៅមកចាប់កអាវជន រងគ្រោះ រួចបុរសជាប្តី បានដាល់ចំផ្ទៃមុខជនរងគ្រោះ ជាច្រើនដៃដោយមិនមានការសួរនាំអ្វីទាំងអស់។
បន្ទាប់ពីប្រើអំពើហិង្សាលើជនរងគ្រោះ រួចហើយ ជនដៃដល់បានឡើងជិះរថយន្ដបំណងរត់ គេចខ្លួន ក៏ត្រូវសមត្ថកិច្ចកងរាជអាវុធ ហត្ថដែលយាមនៅលើសួនច្បារជិតកន្លែងកើតហេតុអន្ដរាគមន៍ឃាត់ខ្លួន ជនដៃដល់បានភ្លាមៗតែម្តង ។ ពាក់ព័ន្ឋបញ្ហានេះ នៅថ្ងៃទី១៧ ខែមីនា ឆ្នាំ២០១៤ មិនអាចទំនាក់ទំនងលោកព្រះរាជ អាជ្ញារង លី សុផាណា ដែលកាន់សំណុំរឿងនេះបានទេ ដោយសារទូរស័ព្ទចូលជាច្រើនលើក គ្មានអ្នកទទួល ។
ចំណែក លោក ងី វ៉ាន់ឌីម ជាជនរងគ្រោះបានបញ្ជាក់ ថាក្រុមគ្រួសាររបស់ជនល្មើសបាន ព្យាយាមសម្របសម្រួល ជាមួយលោក តែលោកនៅតែរក្សាជំហរប្តឹងជនល្មើសដដែល ព្រោះការ ប្រើអំពើហិង្សាលើកងយោធពលខេមរភូមិន្ទ លើដងផ្លូវសាធារណៈនេះ គឺពុំអាចអន់អោនឲ្យបាន ឡើយ ។
លោក ក៏បានសំណូមពរឲ្យតុលាការចាត់ការលើជនល្មើសតាមផ្លូវច្បាប់ផងដែរ ។ មជ្ឈដ្ឋានមួយចំនួនលើកឡើងថា តើតុលាការនឹងមានចំណាត់ការ យ៉ាងណាចំពោះ ជនល្មើសរូបនេះ ដែលហ៊ានបង្កអំពើហិង្សាទាំងកណ្តាលថ្ងៃច្រែស ទៅលើកងកម្លាំង សាធារណៈ មានពាក់ឯកសណ្ឋានយោធា ព្រោះតែរឿងកកស្ទះ ចរាចរលើដងផ្លូវសាធារណៈ បន្តិចបន្ទួច ៕ 
