ខេត្តកំពង់ធំៈ នៅយប់ថ្ងៃទី ៨ ខែមករា ឆ្នាំ ២០១៥ សមត្ថកិច្ចប្រឆាំងបទល្មើសសេដ្ឋកិច្ច នៃស្នងការនគរបាល ខេត្តកំពង់ធំ ដឹកនាំកម្លាំងស្ទាក់ចាប់ រថយន្តសាំយ៉ុងមួយគ្រឿង ពណ៌លឿង ពាក់ស្លាកលេខ ភ្នំពេញ2AB-2496 កាលពីវេលាម៉ោង ១១.៣០នាទីកណ្តាលអាធ្រាត ចាប់បាននៅក្នុងភូមិ រុងរឿង ឃុំចំណាលើ ស្រុកស្ទោង ខេត្តកំពង់ធំ បន្ទាប់ពីម្ចាស់រថយន្តទាល់ច្រក បើកបុកទួលថ្ម បណ្តាលឲ្យបែកក្រទារថយន្ត ទើបចត រថយន្តហើយដាក់មេប្រូចបាត់ស្រមោល។
តាមការឲ្យដឹងពីលោក វរៈសេនីយ៍ឯក កែវ សុផល ស្នងការងទទួលបន្ទុកផែនប្រឆាំងបទល្មើស និងលោក វរៈសេនីយ៍ទោ វ៉ា ចាន់កុសល នាយរងការិយាល័យប្រឆាំងបទល្មើសសេដ្ឋកិច្ច បានឲ្យដឹងថាកិច្ចសហប្រតិបត្តិការបង្ក្រាបរថយន្តដឹកសត្វព្រៃនេះ ដោយមានការឯកភាព ពីលោក អ៊ិត សុធា ព្រះរាជអាជ្ញាអមសាលាដំបូងខេត្តកំពង់ធំ ឲ្យសហការ
នាំគ្នាស្ទាក់រថយន្តដឹកសត្វព្រៃ មុនពេលឃាត់រថយន្តនេះបាន ត្រូវបានសមត្ថកិច្ចប្រទះឃើញរថយន្តមុខសញ្ញាដឹកសត្វព្រៃមកដល់ចំនុច មុខរមណីយដ្ឋាន ប្រិយប្រស់ តែរថយន្តពុំ បានឲ្យសមត្ថកិច្ចត្រួតពិនិត្យ តែបែជាបើករត់ ចូលផ្លូវលំ ឆ្លងពីភូមិមួយទៅភូមិមួយជាច្រើនដំណាក់កាល លុះចុងក្រោយជនសង្ស័យបានបើកត្រឡប់ទៅស្រុកស្ទោង វិញតែចៃដន្យ រថយន្តខូចក៏ត្រូវបានស្ទាក់ចាប់តែម្តង ហើយរថយន្តនិងវត្ថុតាង ត្រូវបានបញ្ជូនមកកាន់ស្នងការដ្ឋាននគរបាល ខេត្តកំពង់ធំ ដើម្បីធ្វើកំណត់ហេតុ។
សត្វបក្សដែលសមត្ថកិច្ចប្រឆាំងបទល្មើសសេដ្ឋកិច្ចក្របួចបាន សរុបមានសត្វស្រកាកែវ ចំនួន ៥១០ក្បាល ត្រូវបានលោក សាយ ណូរ៉ា ព្រះរាជអាជ្ញារង ព្រមទាំងកម្លាំងសមត្ថកិច្ច បាននាំយកសត្វបក្សីទាំងនេះយកទៅ ព្រលែងចូលព្រៃ ដើម្បីឲ្យរស់បែបធម្មជាតិឡើងវិញ ប៉ុន្តែក្នុងនោះមានសត្វមួយចំនួន បានស្លាប់យ៉ាង អណោចអធ័ម នៅក្នុងការ៉ុងជាច្រើនក្បាល ។
មហាជនទូទៅបានអរគុណដល់សមត្ថកិច្ច ដែលអាចឃាត់រថយន្តដឹកសត្វព្រៃបាន និងធ្វើការព្រលែងឲ្យរស់ រាន្ទមានជីវិតឡើងវិញ រួចផុតពីការសំលាប់ និងសំណូមពរ ឲ្យបងៗសមត្ថកិច្ច មេព្រៃ ជលផល និងសមត្ថកិច្ចប្រឆាំងបទល្មើស ជួយទប់ស្កាត់បន្ថែមទៀត និងពង្រឹកការអនុវត្តច្បាប់ការពារសត្វព្រៃ ដោយសារតែសត្វតូច សត្វធំ នាបច្ចុប្បន្នកំពុងតែ
ពេញនិយមនៅទីផ្សារជាតិ និងអន្តរជាតិ និងមានតំលៃថ្លៃណាស់ សម្រាប់អ្នកក្រីក្រ ពុំមានលទ្ធភាពក្នុងបរិភោជនោះទេ គឺសម្រាប់តែអ្នកមានលុយ និងអ្នកមានអំណាចតែប៉ុណ្ណោះ។
ដោយ ប៊ុន រដ្ឋា
