ព្រះវិហារថ្មីនិងសមិទ្ធិផលនានាក្នុងវត្តបញ្ញាវរាមហៅវត្តស្រែក្រសាំស្ថិតនៅភូមិស្រែក្រសាំងឃុំស្រែក្រសាំង ស្រុកសៀមបូកខេត្តស្ទឹងត្រែងបានធ្វើពិធីសម្ពោធកាត់ខ្សែបូដាក់ឲ្យប្រើប្រាស់កាលពីព្រឹកថ្ងៃទី១៦ខែមិនាឆ្នាំ២០១៤ក្រោមអធិបតីភាពឯកឧត្តមឡូយសុផាតតំណាងរាស្ត្រមណ្ឌល
ខេត្តស្ទឹងត្រែងឯកឧត្តមវ៉ាន់វុធសមាជិក ព្រឹទ្ធសភានិងឯកឧត្តមឈាងឡាក់អភិបាលរងខេត្តស្ទឹងត្រែងនឹងមានការអញ្ជើញចូលរួមពីថ្នាក់ដឹកនាំមន្ទីរ ជុំវិញខេត្ត និងពុទ្ធបរិស័ទចំណុះជើងវត្ត ។
ថ្លែងក្នុងពិធីនោះឯកឧត្តម ឡូយ សុផាត តំណាងរាស្ត្រមណ្ឌលខេត្តស្ទឹងត្រែង មានប្រសាសន៍ថា ៖
ការគោរពប្រតិបត្តិចំពោះវិស័យព្រះពុទ្ធសាសនាដែលជាសាសនារដ្ឋពីសំណាក់ថ្នាក់ដឹកនាំខេត្តស្ទឹងត្រែង ប្រកបដោយតម្លាភាពនិងធ្វើការអភិវឌ្ឍលើគ្រប់ហេដ្ឋារបនាសម្ពន្ធ័មានស្ពានថ្នល់ខ្វាត់ខ្វែងនិងសុខសន្តិភាពពេញលេញប្រកបដោយក្ដីសង្ឃឹមគួរជាទីមោទនភាព ។
ជាពិសេសព្រះវិហារដ៏ធំស្កឹមស្កៃថ្មីស្រឡាង និងសមិទ្ធិផលនានាដែលដាក់សម្ពោធក្នុងថ្ងៃនេះបានចាប់ផ្ដើមកសាងឡើងនៅថ្ងៃ សុក្រ ទី ១៥ ខែ កុម្ភៈ ឆ្នាំ ២០០៣ ក្រោមការដឹកនាំពីព្រះចៅអធិការព្រះនាម ទួន ខួច បន្ដរហួតមកដល់ព្រះចៅអធិការថ្មីព្រះនាម វី រ៉ាដូ ជាព្រះចៅអធិការសព្វថ្ងៃ ចាប់ផ្ដើមសាងសង់បន្ដរហូតដល់បានហើយស្រេចជាស្ថាពរ និងបានធ្វើពិធីបុណ្យបណ្ចុះខណ្ឌ័សីមា កាត់ខ្សែបូរសម្ពោធឆ្លងព្រះវិហារថ្មី ។
សមិទ្ធិផលទាំងនេះរួមមាន ព្រះវិហារមួយខ្នង គំនូរពុទ្ធប្រវត្តិ បល្ល័ងព្រះ ព្រះពុទ្ធបដិមាអង្គធំ ១ ព្រះអង្គ ព្រះពុទ្ធបដិមាអង្គតូច ២ ព្រះអង្គ ព្រះអង្គឆ្លាក់ពីថ្មសុទ្ធ ចាក់សាបមុខព្រះវិហារដែលសរុបបច្ច័យចំនួន ៦៣៥.០៨០.០០០ រៀល ស្មើរ ១៥៨.៧៧០ ដុល្លា ។
សមិទ្ធិផលទាំងអស់កើតមកពីសទ្ធាជ្រះថ្លា និងការតាំងចិត្តយ៉ាងមុតមាំរបស់ព្រះចៅអធិការ ភិក្ខុ សាមណេរក្នុងវត្ត លោកអាចារ្យ គណៈកម្មាធិកាវត្ត ជីដូនជីតា ចាស់ព្រឹទ្ធចារ្យ ទាយក ទាយិកា ចំណុះជើងវត្ត ដោយមានការចូលរួមយ៉ាងទូលំទូលាយ ពីសប្បុរសនានានៅគ្រប់ទិសទី ។
ជាពិសេសស្ថិតក្រោមការដឹកនាំដ៏ឈ្លាសវៃរបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក៍ដូចជាឯកឧត្តមថ្នាក់ដឹកនាំខេត្ត តែងតែគាំទ្រដល់ការអភិវឌ្ឍន៍ជានិច្ចនោះ បានធ្វើឲ្យស្រុកសៀមបូកទទួលបានសមិទ្ធិផលធំៗដូចជា ៖ ទំនប់ស្ដុកទឹកសម្រាប់ធ្វើស្រែប្រាំង ផ្លូវក្រាលកៅស៊ូ ប្រវែង ១៥ គម ប្រពន្ធ័ភ្លើងអគ្គីសនី ប្រព័ន្ធចែកចាយទឹកស្អាតចំនួនពីរភូមិ មណ្ឌលសុខភាពចំនួន៣ កន្លែង និងសមិទ្ធិផលផ្សេងៗជាច្រើនទៀត សមិទ្ធិផលទាំងអស់នេះហើយ ដែលធ្វើឲ្យជីវភាពប្រជាពលរដ្ឋកើនឡើងមួយកម្រិតថែមទៀត ។
