ខេត្តកំពង់ឆ្នាំង
អំពើហឹង្សាក្នុងគ្រួសារមួយបានបង្កអោយមានរបួសស្រាលទាំងប្តីប្រពន្ឋ ហើយត្រូវបានសមត្ថកិច្ចឃុំកោះថ្កូវ ឃាត់ខ្លួនស្ត្រីជាប្រពន្ឋ ។ ហេតុការនេះបានកើតឡើងនៅវេលាម៉ោង៣និង៣០នាទីរសៀលថ្ងៃទី៨មករា២០១៥ស្ថិតក្នុងភូមិអង្គជ្រុំ ឃុំកោះថ្កូវ ស្រុកជល់គីរីខេត្តកំពង់ឆ្នាំង
ប្រភពពីសមត្ថកិច្ចបានអោយដឹងថា៖ ស្ត្រីជាប្រពន្ឋដែលត្រូវសមត្ថកិច្ចឃាត់ខ្លួននេះមានឈ្មោះ ចែម ចាន់ឌី អាយុ៤៤ឆ្នាំនិងប្តីដែលរងរបួសមានឈ្មោះ សំរិទ្ធ សាយ អាយុ៤៦ឆ្នាំ មានទីលំនៅក្នុងភូមិអង្គជ្រុំ ឃុំកោះថ្កូវ ស្រុកជល់គីរី ខេត្តកំពង់ឆ្នាំង និងមានមុខរបជាកសិក មានកូន៥នាក់នៅក្នុងបន្ទុក ។
សមត្ថកិច្ចដែលបានចុះទៅដល់កន្លែងកើតហេតុបាននិយាយអោយដឹងថា៖មូលហេតុដែលបង្កអោយឈានទៅដល់ការចាក់ប្តីនេះ គឺដំបូងប្តីបានផឹកស្រាស្រវឹងនៅផ្ទះអ្នកជិតខាង ពេលកំពុងតែផឹកប្រពន្ធបានមកហៅប្តីអោយទៅពុះអូសតែ ប្តីស្ត្រីខាងលើបានឆ្លើយថា (អញជាប្តីដឹងហើយ) ដោយសារតែប្រពន្ធហៅច្រើនដង ច្រើនសារពេក និងដោយស្រវឹងផងប្តីបានជេរស្តីប្រពន្ធ ពេលនោះប្រពន្ធបាននិយាយថា(ម៉េច បានស្រាចូលខ្លួនខ្លាំងហ្អី…..)ស្រាប់តែប្តីដែលស្ថិតក្នុងភាពស្រវឹងស្រាជោគជាំបានឈប់គោយន្តរួចស្ទុះទាំងកម្រោលមកធាក់ប្រពន្ឋ២ទៅ៣ជើង និងវាយបណ្តាលអោយមានការប្រវាយប្រតប់គ្នាធ្វើអោយជាំមុខ ជាំមាត់ បាក់ធ្មេញ ហើយស្ត្រីជាប្រពន្ធបានដួល និងបានក្រវាសដៃដែមានកាន់កូនកន្ត្រៃ ទៅប៉ះប្តីមុតចំលើដោះខាងស្តាំ បណ្តាលអោយរងរបួសស្រាល ហើយនៅលើខ្លួនប្តីមានស្នាមក្រចកដៃក្រញៅមុតពេញខ្លួន។
ក្រោយពេលកើតហេតុសមត្ថកិច្ចដកហូតបាន កូនកន្ត្រៃមួយ និងបានធ្វើការឃាត់ខ្លួនស្ត្រីជាប្រពន្ឋនាំយកមកធ្វើការសាកសួរនៅប៉ុស្តិ៏នរគរបាល រដ្ឋបាលឃុំ ។ស្ត្រីជាប្រពន្ធបានសារភាពថា ខ្លួនពិតជាបានក្រវាសកន្ត្រៃទៅប៉ះចំប្តីពិតប្រាកដ៍មែន តែគ្មានបំណងចាក់សម្លាប់ប្តីនោះឡើយ ដោយឡែកប្តីដែលបានរងរបួសបាននិយាយអោយដឹងផងដែរថា៖គាត់គ្មានប្តឹងផ្តល់អីនោះទេ ព្រោះអាណិតកូនៗទាំង៥នាក់ និងសុំអោយសមត្ថកិច្ចធ្វើការអប់រំតែប៉ុណ្ណោះ មិនអោយសមត្ថកិច្ចយកប្រពន្ធគាត់ទៅណានោះឡើយ។
ប្រជាពលរដ្ឋដែលមានលំនៅឋានជិតៗនោះនិងបានឃើញហេតុការណ៏ខាងលើនេះបាននិយាយអោយដឹងផងដែរថា៖ប្តីរបស់ស្ត្រីដែលបង្ករបួសស្នាមខាងលើតែងតែផឹកស្រាស្រវឹងនិងរករឿងប្រពន្ធ ជេរបញ្ចោរ ព្រមទាំងវាយប្រពន្ធមិនដែរលោះថ្ងៃនោះឡើយ នៅពេលដែលរងរបួសក៍មានការអន្តរាគមន៏ពីអាជ្ញាធរនិងលោកអភិបាលខេត្តយករថយន្តសង្គ្រោះបន្ទាន់ពីមន្ទីពេទ្យខេត្តមកយកអ្នកដែលរបួសទៅសង្គ្រោះ បុរសជាប្តីដែលរងគ្រោះបែបជាមិនព្រមមកមន្ទីពេទ្យនោះឡើយ ដោយនិយាយផ្តេសផ្តាសទៀតផង។ មកដល់ពេលនេះស្ត្រីជាប្រពន្ធនិងប្តីត្រូវបានអាជ្ញាធរមូលដ្ឋាននិងសមត្ថកិច្ចធ្វើការអប់រំ ណែនាំ និងអោយធ្វើលិខិតបញ្ឈប់អំពើហឹង្សារទាំងប្តីទាំងប្រពន្ធចាប់ពីពេលនេះរហូតតទៅ៕
