ពលរដ្ឋស៊ីរី បានភៀសខ្លួនទៅនៅប្រទេសជិតខាងដោយសារតែសង្គ្រាមស៊ីវិល អូលបន្លាយរយពេលជាង៣ឆ្នាំកន្លងមកកើនឡើងរហូតដល់ជាង៣លាននាក់ គឺច្រើនជាងទាំងជនភៀសខ្លួននៅក្នុងសង្គ្រាមអីរ៉ាក់និងអាហ្វហ្គានិស្ថានដែលមានតែ ២លាន៦សែននាក់ ប៉ុណ្ណោះ។ ជាមួយនិងជនភៀសខ្លួនយ៉ងច្រើនបែបនេះធ្វើឲ្យពិភពលោកព្រួយបារម្ភពីវិបត្តិជនភៀសខ្លួន។
តាមរបាយការណ៍របស់ឧត្តមស្នងការដើម្បីជនភៀសខ្លួន អង្គការសហប្រជាជាតិ គ្រាន់តែក្នុងរយៈពេល៦ខែដើមឆ្នាំ ២០១៤ មានប្រជាជនស៊ីរី ជាង ៧សែននាក់ បានរត់គេចខ្លួន ពីសង្គ្រាមនៅស៊ីរី។ ចំនួននេះបានធ្វើឲ្យជនភៀសខ្លួនស៊ីរី ក្នុងរយៈពេលតែ៣ឆ្នាំកើនដល់ទៅជាង ៣លាននាក់ គឺច្រើនជាងអាហ្វហ្កានីស្ថាន ដែលសន្សំបានតែ២លាន ៦សែននាក់ ក្នុងរយៈពេល៣០ឆ្នាំ។ ម្យ៉ាងទៀត បើចំនួនភៀសខ្លួនស៊ីរី នៅតែមានច្រើនបែបនេះ ដូចឆ្នាំ ២០១៤ នោះ គេបារម្ភ
ដែរថា ជនភៀសខ្លួន ស៊ីរី នឹងកើនដល់ជាង ៤លាននាក់ នៅចុងឆ្នាំ ២០១៥នេះ។ ចំនួននេះច្រើនណាស់ ព្រោះត្រូវដឹងថា នៅមុនសង្គ្រាមស៊ីវិលផ្ទុះឡើង នៅខែមីនា ឆ្នាំ ២០១១ ស៊ីរីមានប្រជាជនសរុបប្រមាណ ២០លាននាក់ប៉ុណ្ណោះ។ ប៉ុន្តែ សង្គ្រាម ប្រយុទ្ធបង្ហូរឈាមគ្នា រវាងទ័ពរដ្ឋាភិបាលរបស់លោកប្រធានាធិបតី ស៊ីរី និងក្រុមប្រឆាំងបានសម្លាប់ជីវិតមនុស្សជាង ២សែននាក់ ដែលភាគច្រើនជាប្រជាជនស៊ីវិល។
ជនភៀសខ្លួនសីរីភាគច្រើននៅក្នុងប្រទេសលីបង បន្ទាបមក ប្រទេស ហ្សកដានី តួកគី និងអ៊ីរ៉ាក់ កំពុងទទួលជនភៀសខ្លួន ស៊ីរីជាង ៣លាននាក់នេះ។ ប៉ុន្តែ មានតែលីបង់ទេ ដែលមានជនភៀសខ្លួនស៊ីរីច្រើនជាងគេ គឺដល់ទៅ ១លាន ១សែននាក់ ក្នុងពេលដែលលីបង់មានប្រជាជនសរុប ត្រឹមជាង ៤លាន ៨សែននាក់ប៉ុណ្ណោះ។ លីបង់ទទួលជនភៀសខ្លួនស៊ីរី 
ច្រើនជាងគេ ព្រោះអាស្រ័យទៅលើទីតាំងភូមិសាស្ត្រ។ សង្គ្រាមផ្ទុះឡើងដំបូងនៅទីក្រុងហូម ដែលរដ្ឋាភិបាលរបស់លោកបាស្ហា អាល់អាសាដ ចាត់ទុកជាសំបុករបស់ក្រុមប្រឆាំង និងបានបាញ់ប្រហារ បំផ្លាញផ្ទះសម្បែងច្រើនជាងគេ។ ប្រជាជននៅទីក្រុងហូម ជាច្រើនម៉ឺននាក់ មិនថា ប្រជាជនស៊ីវិល ឬអ្នកគាំទ្រក្រុមប្រឆាំងស៊ីរីបានរត់ពីការវាយប្រហារ សំដៅទឹកដីលីបង់៕
