ភ្នំពេញ៖រោងចក្រផលិតមីម៉ាម៉ារបស់ក្រុមហ៊ុនប្រេស៊ីដេនហ្វូដ(ខេមបូឌា)ខូអិលធីឌី ដែលមានទីតាំងនៅតាមបណ្តោយផ្លូវ២១៧ ស្ថិតក្នុងភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញបានរងនូវការរិះគន់ពីសំណាក់បងប្អូនប្រជាពលរដ្ឋថា រោងចក្រផលិតមីម៉ាម៉ានេះ បានបង្ហូរ
កាកសំណល់ចូលអាងស្តុកទឹកនៅក្នុងរោងចក្របណ្តាលឲ្យជះក្លិនជូរស្ទើរទ្រាំមិនបាន និងបង្ហុយផ្សែងប្រេងខ្មៅធ្វើឲ្យកាកសំណល់ផ្សែងនោះហុយមកលើផ្ទះសម្បែងរបស់ពួកគាត់ ព្រមទាំងមានការបំពងសម្លេងម៉ាស៊ីនឡើងទ្រហឹងស្ទើរស្តាប់អ្វីមិនបានឡើយ។
ស្ត្រីម្នាក់ជាពលរដ្ឋរស់នៅក្នុងបុរីសម្បួណ៏មាសសុំមិនបញ្ចេញឈ្មោះបានប្រាប់ឲ្យដឹងកាលពីព្រឹកថ្ងៃទី១៦មិនាថា ជញ្ជាំងផ្ទះរបស់អ្នកស្រីមើលលែងយល់ហើយ ព្រោះវាប្រឡាក់ដោយចំហេះផ្សែងប្រេងខ្មៅដែលហុយចេញពីបំពង់ផ្សែងពីររបស់រោងចក្រផលិតមីម៉ាម៉ារបស់ក្រុមហ៊ុនប្រេស៊ីដេនហ្វូដ(ខេមបូឌា)ខូអិលធីឌីនេះ គឺនៅក្បែរផ្ទះរបស់អ្នកស្រីតែម្តង។
ស្ត្រីដដែលប្រាប់បន្តថា មិនត្រឹមតែរឿងផ្សែងប្រេងខ្មៅប៉ុណ្ណោះទេ ក្រៅពីនេះក៏នៅមានធំក្លិនស្អុយឡើងជូរស្ទើរទ្រាំដកដង្ហើមមិនបាន ហើយក្លិនទាំងនេះ គឺក្លិនកាកសំណល់មីដែលគេបង្ហូរចូលក្នុងអាងមួយក្នុងរោងចក្រនេះផ្ទាល់តែម្តង ដែលក្លិនកាកសំណល់នេះ ក៏បានឲ្យប៉ះពាល់ដល់សុខភាព និងបរិស្ថានជុំវិញការរស់នៅរបស់ក្រុមគ្រួសារអ្នកស្រីក៏ដូចជាបងប្អូនប្រជាពលរដ្ឋរស់នៅក្នុងបុរីនេះផងដែរ។
ពិនិត្យមើលស្ថានភាពទាំងក្នុងនិងក្រៅផ្ទះរបស់អ្នកស្រីឯណោះវិញ កូនប្រុសរបស់អ្នកស្រីក៏បានអះអាងឲ្យដឹងដែរថា នៅតាមបង្អួចផ្ទះនិងបន្លោះព្រិលត្រូវបានចងសំណាញ់ខៀវ ដើម្បីទប់ស្កាត់នូវការហុយចំហេះប្រេងខ្មៅចូលផ្ទះ ហើយពេលហុយចូលផ្ទះនៅលើជញ្ជាំងប្រឡាក់សុទ្ធតែប្រេងម៉ាស៊ីនខ្មៅ ក្នុង១ថ្ងៃជូត៣ទៅ៤ដងឯណោះហើយជូតមិនងាយជ្រះទេ ។ ចំហេះប្រេងខ្មៅនេះមិនធម្មតាទេ មិនដូចចំហេះធ្យូងយើងទេ ពេលប្រឡាក់ដៃជើងយើង និងសម្លៀកបំពាក់ពេលជូតប្រឡាក់សុទ្ធតែប្រេង។
ពាក់ព័ន្ធទៅនិងករណីខាងលើនេះមន្ត្រីជំនាញរបស់មន្ទីរបរិស្ថានរាជធានីភ្នំពេញបានលើកឡើងឲ្យដឹងថា លោកក៏បានយល់ស្របទៅនឹងការរិះគន់របស់ប្រជាពលរដ្ឋ ហើយលោកក៏បានចុះពិនិត្យឃើញថា រោងចក្រនេះមានអាងប្រព្រឹតិ្តកម្មសំណល់រាវចំនួន៤កន្លែងនៅក្នុងរោងចក្រហើយ។ ប៉ុន្តែរោងចក្របានបង្ហូរកាកសំណល់ទាំងនេះចេញពីអាងប្រព្រឹតិ្តកម្មសំណល់រាវចូលទៅក្នុងស្រះក្បែរនោះ ហេតុដូច្នេះធ្វើឲ្យធំក្លិនស្អុយជូរបង្កផលប៉ះពាល់ដល់ការរស់នៅរបស់ប្រជាពលរដ្ឋជុំវិញ ក៏ដូចជាប៉ះពាល់ដល់បរិស្ថាន និងអាកាសធាតុយ៉ាងខ្លាំងផងដែរ។
មន្ត្រីជំនាញដដែលក៏បានបញ្ជាក់ឲ្យដឹងទៀតថា ចំណុចមួយទៀតឡចំនួនពីរដែលយើងឃើញបំពង់ស៊ីម៉ាំងបង្ហុយផ្សែងទៅលើអាកាសនោះ ក៏ធ្វើឲ្យប៉ះពាល់ផងដែរ ពីព្រោះថា រោងចក្រនេះគេអត់ប្រើអូសដុតទេ គឺគេប្រើប្រេងខ្មៅ ហេតុដូច្នេះពេលរោងចក្រដំណើរការម្តងៗ គឺផ្សែងតែងហុយឡើងលើនាំឲ្យប៉ះពាល់សុខភាព ដូចជាធ្វើឲ្យប្រឡាក់សម្លៀកបំពាក់ និង ជញ្ជាំងផ្ទះរបស់ប្រជាពលរដ្ឋ។ ដោយឡែកនៅពេលយប់រោងចក្រនេះបានបញ្ឆេះម៉ាស៊ីនបំពងសម្លេងថែមទៀត បញ្ហាទាំងអស់នេះគឺជាបញ្ហារំខានដល់បងប្អូនប្រជាពលរដ្ឋ ។ ម្យ៉ាងវិញទៀតរោងចក្រធ្វើទាន់គ្រប់លក្ខណៈបច្ចេកទេសទាំងអស់ដូចជា អាងប្រព្រឹតិ្តកម្មសំណលរាវជាដើម។
មន្ត្រីជំនាញខាងលើប្រាប់បន្តថា បើចង់កុំឲ្យប៉ះពាល់ធំក្លិនស្អុយ គឺខាងរោងចក្រត្រូវរកឡានបូមលូមកបូមទឹកកាកសំណល់នោះចេញពីស្រះ ហើយរោងចក្រត្រូវសាងសង់អាងប្រព្រឹតិ្តកម្មសំណល់រាវឡើងវិញ សមស្របទៅនឹងបទដ្ឋានបច្ចេកទេសត្រឹមត្រូវ និងរៀងចំស្រះស្តុកទឹកកាកសំណល់ឲ្យបានត្រឹមត្រូវផងដែរ។
ជាមួយនេះដែរមន្ត្រីជំនាញដដែលក៏បានពន្យល់ឲ្យដឹងថា រោងចក្រផលិតមីនេះបើកដំណើរការតាំងឆ្នាំ២០០១មកម្ល៉េះ ដោយមានច្បាប់អនុញ្ញាតពីក្រសួងបរិស្ថាន និក្រសួងឧស្សាហកម្ម រ៉ែ និងថាមពលត្រឹមត្រូវ ក៏ប៉ុន្តែកាលណោះនៅតំបន់នេះពុំមានពលរដ្ឋរស់នៅក្បែរៗនោះទេ។ បច្ចុប្បន្នមានបុរីនៅក្បែររោងចក្រនេះ ហេតុដូច្នេះវាត្រូវតែមានការប៉ះពាល់បរិស្ថានជុំវិញក្នុងការរស់នៅរបស់ប្រជាពលរដ្ឋហើយ។
តាមរយៈការចុះផ្សាយព័ត៌មាននេះ ប្រជាពលរដ្ឋរស់នៅក្នុងបុរីសម្បួណ៏មាសក៏ដូចជាប្រជាពលរដ្ឋរស់នៅតំបន់នេះ ស្នើរសុំឲ្យអាជ្ញាធរពាក់ព័ន្ធទាំងអស់ធ្វើយ៉ាងណាជួយពិនិត្យមើលរោងចក្រនេះផង ចៀសវាងបង្កផលប៉ះពាល់ដល់ការរស់នៅរបស់ពួកគាត់៕
