ភ្នំពេញ ៖ រថយន្តកូរ៉េមួយគ្រឿងបើកបោះពួយលឿន ដូចហោះជ្រុលចង្កូតបុករះម៉ូតូ៣គ្រឿង បណ្ដាលអោយមនុស្ស៦នាក់រងរបួសស្រាល។ ហេតុការណ៍នេះបានកើតឡើងកាលពីវេលាម៉ោង៨យប់ថ្ងៃទី១១ខែមករាឆ្នាំ២០១៥ ត្រង់ចំណុចក្បែរស្ថានីយប្រេងឥន្ធនៈកាល់តិច តាមបណ្ដោយផ្លូវលេខ២១៧ ស្ថិតក្នុងភូមិដំណាក់ធំ សង្កាត់ស្ទឹងមានជ័យ ខណ្ឌមានជ័យ។
ប្រភពព័ត៌មានពីកន្លែងកើតហេតុបានអោយដឹងថា មានរថយន្តកូរ៉េមួយគ្រឿង ពាក់ស្លាកលេខ ភ្នំពេញ 2C-9320 ជិះធ្វើដំណើរដោយបុរស២នាក់ តាមបណ្ដោយផ្លូវលេខ២១៧ ទិសដៅពីលិចទៅកើតក្នុងល្បឿនយ៉ាងលឿន ស្រាប់តែមកដល់ចំណុចកើតហេតុមិនដឹងថាយ៉ាងមិច រថយន្តក៏បានរេចង្កូតទៅបុកប៉ះមួយគ្រឿងម៉ាកវីវ៉ា ពណ៌ខ្មៅ ពាក់ស្លាកលេខ ភ្នំពេញ 1AC-4650 ចំពីក្រោយ ជិះដោយបុរស២នាក់បណ្ដាលអោយដួលរងរបួសស្រាល ហើយរថយន្តមិនទាន់អស់ល្បឿន ក៏ទៅបុកនិងម៉ូតូមួយគ្រឿងទៀតមិនចាំម៉ាកជិះដោយបុរសម្នាក់
បណ្ដាលអោយរងរបួសស្រាលផងដែរ ប៉ុន្តែក្រោយពេលកើតហេតុម្ចាស់ម៉ូតូមិនចង់មានរឿងក៏ឡើងជិះម៉ូតូចេញពីកន្លែងកើតហេតុបាត់ទៅ រួចរថយន្តបន្តទៅបុកប៉ះម៉ូតូស្មាស់រីវ៉ូ ពណ៌ខ្មៅ មួយគ្រឿង ពាក់ស្លាកលេខ ភ្នំពេញ 1AA-6061 ជិះដោយបុរសម្នាក់បណ្ដាលអោយដួលរងរបួសស្រាល បន្ទាប់មករថយន្តក៏បួងចង្កូតក្រឡាប់នៅកណ្ដាលផ្លូវតែម្ដងធ្វើអោយអ្នកជិះក្នុងរថយន្តរងរបួសស្រាលបានលូនចេញពីរថយន្តហើយគេចខ្លួនពីកន្លែងកើតហេតុបាត់។
បន្ទាប់ពីកើតហេតុសមត្ថកិច្ចមូលដ្ឋានក៏បានចុះមកអន្តរាគមន៍ជួយសំរួលចរាចរភ្លាមៗ រួចសមត្ថកិច្ចជំនាញក៏ធ្វើការវាស់វែងយកម៉ូតូនិងរថយន្តទៅរក្សាទុកនៅអធិការដ្ឋាននគរបាលខណ្ឌមានជ័យដើម្បីធ្វើការដោះស្រាយតាមផ្លូវច្បាប់៕
