ខេត្តកំពង់ស្ពឺ ៖ ជនសង្ស័យចំនួន០៦នាក់ ត្រូវបាននគរបាលស្រុកឧដុង្គ ឃាត់ខ្លួន បន្ទាប់ពីបង្កហិង្សាគប់កែវ ចាននិងវ៉ៃគ្នា ក្រោយពេលចប់រាំធុងបាស់ក្នុងពិធីមង្គលការក្នុងភូមិ ។
ហេតុការណ៍នេះ បានភ្ញាក់ផ្អើល ឡើងនៅម៉ោង១២និង៣០នាទីរំលងអធ្រាត្រឈានចូលថ្ងៃទី១២ ខែ មករាឆ្នាំ ២០១៥ នៅក្នុងភូមិដំណាក់ស្មាច់ ឃុំវាលពង្ស ស្រុកឧដុង្គ ខេត្តកំពង់ស្ពឺ។
មនុស្ស៦នាក់ឃាត់នោះមានឈ្មោះ ១ បឿន ប៊ុត ភេទ ប្រុស អាយុ ៣៣ឆ្នាំ មុខរបរកម្មករ ២ ជា វិចិត្រ ភេទ ប្រុស អាយុ ២១ ឆ្នាំ មុខរបរមិនពិតប្រាកដ ៣ អាន់ សុភាព ភេទ ប្រុស អាយុ ៣២ឆ្នាំ មុខរបរកម្មកររោងចក្រ ទាំង៣នាក់ រស់នៅក្នុងភូមិ វត្តពោធិ ឃុំ វាំងចាស់ ស្រុក ឧដុង្គ ៤ សុង សារ៉ន ភេទប្រុស អាយុ ២៦ ឆ្នាំ មុខរបរកម្មករសំណង់ រស់នៅក្នុងភូមិវាលពង្ស ឃុំវាលពង្ស ស្រុកឧដុង្គ ទាំង៤នាក់ជាភ្ញៀវខាងកូនកំលោះ។ និង២នាក់ទៀតជាភ្ញៀវខាងកូនក្រមុំមានឈ្មោះ យឺន សុផាន ភេទប្រុស អាយុ ៣០ឆ្នាំ មុខរបរកម្មកររោងចក្រ រស់នៅភូមិ វត្តពោធិ ឃុំវាំងចាស់ ស្រុកឧដុង្គ និងម្នាក់ទៀតឈ្មោះ សម្បត្តិ សុជាតិ ភេទប្រុស អាយុ ១៩ ជាសិស្ស រស់នៅក្នុងភូមិដំណាក់ស្មាច់ ឃុំ វាលពង្ស ស្រុកឧដុង្គ។
តាមសម្តីរបស់នគរបាល ឲ្យដឹងថា នៅមុនពេលកើតហេតុ ភាគីទំនាស់និមួយៗ បានចូលរាំសប្បាយក្នុងពិធីមង្គលការក្នុងភូមិសាស្ត្រខាងលើ ស្រាប់តែដល់ពេលចប់ចាក់ធុងបាស់ មិនដឹងមូលហេតុអ្វីពិតប្រាកដក៍មានការគប់កែវ ចាននិងវ៉ៃគ្នា បង្កការភ្ញាក់ផ្អើល បណ្តាលឲ្យមានអ្នករបួស ក្នុងនោះក៍មានប៉ូលិសម្នាក់រងរបួសផងដែរ ខណៈចូលទៅឃាត់ក្នុងហេតុការណ៍នេះ ។
ប្រភពបានបន្តថា ក្នុងហេតុការណ៍ហិង្សានេះ មានមនុស្សជាច្រើននាក់បានចូលរួម ប៉ុន្តែប៉ូលិសឃាត់ខ្លួនជំហានដំបូងបាន០៦នាក់ និង បន្តតាមឃាត់ខ្លួន យកមកសួរនាំនៅស្នងការដ្ឋាននគរបាលខេត្តកំពង់ស្ពឺ ៕
