មហោស្រពប្រឡងចម្រៀងមរតកសំនៀងពានរង្វាន់ឯកឧត្តម អ៊ុំ ម៉ារ៉ា អភិបាលនៃគណៈអភិបាល ខេត្តព្រះវិហារនិងលោកជំទាវត្រូវបានប្រកាសបិទនៅល្ងាចថ្ងៃទី១១មករាឆ្នាំ២០១៥នេះ បន្ទាប់ពីបានដំណើរការ យ៉ាងរលូនក្នុងរយៈពេល០៣ថ្ងៃគឺចាប់ពីថ្ងៃទី០៩ដល់ថ្ងៃទី១១ខែមករាឆ្នាំ២០១៥។ មហោស្រពប្រឡងចម្រៀង មរតកសំនៀងពានរង្វាន់ឯកឧត្តម អ៊ុំ ម៉ារ៉ា អភិបាលនៃគណៈអភិបាលខេត្តព្រះវិហារនិងលោកជំទាវ បាន ប្រព្រឹត្តទៅក្រោមការជួយឧបត្ថម្ភគាំទ្រទាំងស្រុងពីសំណាក់ឯកឧត្តម អ៊ុំ ម៉ារ៉ា និងលោកជំទាវ ដើម្បីផ្តល់ឱកាស ដល់ប្រជាជនទាំងអស់ដែលមានចំណាប់អារម្មណ៍ស្រឡាញ់ចូលចិត្តវិស័យចម្រៀង បានចូលរួមប្រកួតប្រជែង ក្នុងស្មារតីចូលរួមអបអរសាទរខួបទី៣៦ឆ្នាំនៃទិវាជ័យជំនះ៧មករា។
ម្យ៉ាងទៀត មហោស្រពប្រឡងចម្រៀងនេះ ក៏បានបញ្ជាក់ឲ្យឃើញថា ថ្ងៃជ័យជំនះ៧មករា បានរំដោះ សិល្បៈវប្បធម៌ ប្រពៃណី សាសនា ក៏ដូចជាវិស័យ ដទៃៗទៀត ឲ្យរួចរស់រានមានជីវិតសារជាថ្មី ក្រោយពេលដែលអ្វីៗទាំងអស់នេះបានរលាយបាត់បង់ក្នុងរបប អាវខ្មៅប្រល័យពូជសាសន៍ប៉ុលពត។ 
ក្នុងឱកាសបិទមហោស្រពប្រឡងចម្រៀងដ៏មានអត្ថន័យនេះ ឯ.ឧ អ៊ុំ ម៉ារ៉ា អភិបាលនៃគណៈអភិបាលខេត្តព្រះវិហារ បានមានប្រសាសន៍បញ្ជាក់ថា ថ្ងៃជ័យជំនះ៧មករាមិនមែនជារបស់ គណបក្សប្រជាជនកម្ពុជាផ្តាច់មុខតែម្នាក់ឯងនោះទេ ពោលថ្ងៃ៧មករាគឺជារបស់ប្រជាជនខ្មែរទាំងអស់គ្នា។ ហើយថ្ងៃ៧មករាក៏មិនមែនជាសត្រូវរបស់នរណាម្នាក់ដែរ សត្រូវរបស់ថ្ងៃ៧មករាមានតែមួយគត់គឺរបបប្រល័យ ពូជសាសន៍។ ដូច្នេះតាមរយៈមហោស្រពប្រឡងចម្រៀង អបអរខួបទី៣៦ឆ្នាំនៃទិវាជ័យជំនះ៧មករាក្នុងខេត្ត ព្រះវិហារនាឱកាសនេះ បានឆ្លុះបញ្ចាំងឲ្យឃើញយ៉ាងច្បាស់ថា ក្រោយថ្ងៃ៧មករាក្រោមការដឹកនាំដ៏ត្រឹមត្រូវ និងប្រកបដោយគតិបណ្ឌិត របស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន ជាប្រមុខ បាននាំ មកនូវ
សុខសន្តិភាពពេញបរិបូរណ៍ និងការអភិវឌ្ឍន៍ជាលំដាប់លើគ្រប់វិស័យជូនជាតិនិងប្រជាជន គ្រប់ទីកន្លែង ទាំងទីក្រុង ទីជនបទ ជាពិសេសចុងកាត់មាត់ញកជាយដែន ដូចជាខេត្តព្រះវិហារយើងនេះ។ ហើយដោយសារ ថ្ងៃ៧មករា ទើបយើងមានអ្វីៗដូចក្នុងថ្ងៃនេះ ជាក់ស្តែងដូចជាខេត្តព្រះវិហារថ្វីត្បិតតែជាខេត្តដែលស្ថិតនៅ ជាយដែនក៏ពិតមែន ក៏ប៉ុន្តែខេត្តព្រះវិហារជាខេត្តដែលមានវាសនាខ្ពស់ ព្រោះកំពុងតែមានសុខសន្តិភាព មានការអភិវឌ្ឍន៍ជាលំដាប់ឥតឈប់ឈរ តាមគោលជំហរបើកឱកាសជើងមេឃ និង អភិវឌ្ឍសង្គមសេដ្ឋកិច្ច។ ជាមួយគ្នានេះឯកឧត្តម អ៊ុំ ម៉ារ៉ា ក៏បានផ្តាំផ្ញើឲ្យប្រជាពលរដ្ឋរួមគ្នាបន្តរក្សាស្មារតី៧មករា ឲ្យបានខ្ជាប់ខ្ជួន ដើម្បីរួមគ្នាអភិវឌ្ឍន៍មូលដ្ឋានយើងបន្ថែមទៀតជាមួយវប្បធម៌សន្តិភាព។ សូមឲ្យស្មារតី ៧មករាស្ថិតស្ថេរ ជាអមតៈ នៅក្នុងបេះដូងកូនខ្មែរគ្រប់រូប។ ជយោ! ថ្ងៃជ័យជំនះ៧មករា! ៕
