ការទទួលជួបនេះ ត្រូវបានធ្វើទ្បើងនៅក្រសួងការបរទេស និងសហប្រតិបត្តិការអន្តរជាតិ កាលពីព្រឹកថ្ងៃទី១៤ ខែមករា ឆ្នាំ២០១៤នេះ ។
ក្នុងជំនួបនោះ ឯកឧត្តម Rodney M.Elliott អភិបាលក្រុង Lowell បានជម្រាប ជូនឯកឧត្តម ឧបនាយករដ្ឋមន្ត្រី ហោ ណាំហុងថា ការអញ្ជើញមកបំពេញទស្សនកិច្ចនៅកម្ពុជា របស់ឯកឧត្តមនៅពេលនេះ គោលបំណងសំខាន់ចង់ដឹងពីការពិត និងចង់ដឹងពីប្រវត្តិសាស្ត្រ វប្បធម៌របស់ប្រទេសកម្ពុជា ។
ឯកឧត្តមឧបនាយករដ្ឋមន្ត្រី ហោ ណាំហុង ក៏បានជម្រាបជូន ឯកឧត្តមអភិបាល ក្រុងឡូវែល ទាក់ទងទៅនិងការរំដោះប្រជាជន ទូទាំងប្រទេសកម្ពុជា ក្នុងរបបប្រល័យពូជសាសន៍ ប៉ុល ពល ថ្ងៃ៧មករា ឆ្នាំ១៩៧៩ ។
ឯកឧត្តមបានបន្តទៀតថា ប្រជាពលរដ្ឋខ្មែររាប់លាននាក់ ត្រូវពួកប៉ុលពលសម្លាប់ និងបានកំទ្ទេចប្រទេសជាតិស្ទើរទាំងស្រុងលើគ្រប់វិស័យ ។ បើគ្មានសម្ដេចទាំងបី ទាក់ទងកងទ័ពស្ម័គ្រចិត្ដវៀតណាម ចូលមកចូលរំដោះប្រជាជនកម្ពុជាយើង ឱ្យរួចផុតពីរបបខ្មៅងងឹតនោះទេ ប្រទេសកម្ពុជានិងមានភាពអាប់អួរ គ្មានការរីកចំរើនទេ ។
ក្រោយរំដោះប្រជាពលរដ្ឋ ពីរបបខ្មែរក្រហមហើយនោះ ប្រជាពលរដ្ឋជួបបញ្ហាមួយទៀត គឺអត់បានហូប ដែលជាបញ្ហាដ៏ធ្ងន់ធ្ងរ សម្រាប់រាជរដ្ឋាភិបាលដោះស្រាយ ហើយជាអាទិភាពទី១ដែលត្រូវដោះស្រាយជាដំបូង គឺធ្វើយ៉ាងណា ឲ្យប្រជាពលរដ្ឋបានរស់សិន ហើយការចាប់ផ្តើមអភិវឌ្ឍន៍ប្រទេសជាតិនាពេលនោះ គឺចេញពីចំណុចសូន្យ ។ ក្រោមការដឹកនាំដ៏ឈ្លាសវៃ របស់សម្តេចទាំង៣ គឺសម្តេចអគ្គធមពោធិសាល ជា ស៊ីម ប្រធានរដ្ឋសភា ស្តេចអគ្គមហាពញ្ញាចក្រី ហេង សំរិន អនុប្រធានរដ្ឋសភា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានដឹកនាំនាវាកម្ពុជា រហូតដល់មានការអភិវឌ្ឍន៍ប្រទេសមានអ្វីៗទាំងអស់ រហូតមកដល់សព្វថ្ងៃនេះ ធ្វើឲ្យអន្តរជាតិទទួលស្គាល់ ពីភាពរីកចំរើនក្នុងប្រទេសកម្ពុជាយ៉ាងលឿនរហ័ស ។
ក្នុងជំនួបនេះដែរ ឯកឧត្តម ឧបនាយករដ្ឋមន្ត្រី ហោ ណាំហុង ក៏បានជម្រាបអំពីវប្បធម៌ និងប្រពៃណីរបស់ខ្មែរ ទៅឯកឧត្តម Rodney M.Elliott អភិបាលក្រុង Lowell អស់រយៈពេលប្រមាណជា១ម៉ោង ទើបបញ្ចប់ការជំនួបនោះ ៕
