យុវជន៣នាក់ជិះម៉ូតូមួយគ្រឿងទៅបុករទេះអូសអេតចាយដែលគេកំពុងអូសតាមផ្លូវបណ្តាលឱ្យម៉ូតូទៅលើថ្នល់រងរបួសទាំងធ្ងន់ស្រាលទាំង៣នាក់ ។ ហេតុការណ៍គ្រោះថ្នាក់ចរាចរណ៍ខាងលើកើតឡើងកាលពីវេលាម៉ោង១០ និង១០នាទីយប់ ថ្ងៃទី ១៣ មករា ២០១៥ 
នៅលើកំណាត់ផ្លូវ២៧១ ស្ថិតក្នុងខណ្ឌទួលគោក ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញម៉ូតូស៊ីរ៉ូស មួយគ្រឿង ពណ៌ខ្មៅពាក់ស្លាកលេខភ្នំពេញ 1N-7082 បើកបរដោយយុវជនម្នាក់ និងរួមដំណើរដោយយុវជន២នាក់ទៀត ដោយធ្វើដំណើរក្នុងល្បឿនយ៉ាងលឿនតាមផ្លូវលេខ២៧១ ក្នុងទិសដៅពីពីត្បូងទៅជើង ខណៈមកដល់ចំណុចកើតហេតុ ក៏បានបើកទៅបុករទេះដឹកអេតចាយដែលកំពុងអូសតាមផ្លូវបណ្តាលឱ្យម៉ូតូដួលបោកទៅលើថ្នល់ រងរបូសធ្ងន់ស្រាលទាំង៣នាក់ ក្នុងនោះយុវជនជាអ្នកបើកម៉ូតូរងរបួសធ្ងន់ ចំណែកយុវជនរួមដំណើរពីក្រោយពីរនាក់ទៀត រងរបួសស្រាល ។
ក្រោយពេលកើតហេតុ ជនរងគ្រោះរបួសធ្ងន់ត្រូវបានគេបញ្ជូនទៅសង្គ្រោះបន្ទាន់នៅមន្ទីរពេទ្យភ្លាមៗ ចំណែកយុវជនពីរនាក់រងរបួសស្រាលត្រូវក្រុមគ្រួសារមកទទួលយកទៅលាងមុខរបួស ហើយម៉ូតូរបស់ជនរងគ្រោះត្រូវសមត្ថកិច្ចយកទៅរក្សាទុកឱ្យ ។ ម្ចាស់រទេះអេតចាយមិនបានរករឿងយុវជនដែលបើកម៉ូតូមកបុករទេះអេតចាយខ្លួននោះទេ ដោយសារឃើញយុវជនទាំងនោះរងរបួសធ្ងន់ស្រាល ។
