ភ្នំពេញ=បុរសជាមេការសំណង់ម្នាក់ផឹកស៊ីស្រវឹងហើយត្រឡប់មកបន្ទប់ជួលវិញឈ្លោះប្រកែកជាមួយស្ត្រីជាប្រពន្ធរហូតបង្កជាហិង្សាវាយទាត់ធាក់និងយកកាំបិតបុ័ងតោអារកស្ត្រីជាប្រពន្ធរងរបួសធ្ងន់ រួចរត់គេចខ្លួនបាត់ កាលពីវេលាម៉ោង៩និង៣០នាទីយប់ថ្ងៃទី១៣ខែមករាឆ្នាំ
២០១៥ ត្រង់ចំណុចផ្ទះលេខ49CC បន្ទប់ជួលលេខ១៨ តាមបណ្ដោយផ្លូវបេតុងដីថ្មី ភូមិដំណាក់ធំ២ សង្កាត់ស្ទឹងមានជ័យ ខណ្ឌមានជ័យ។
ស្ត្រីរងគ្រោះមានឈ្មោះ ជិន នី អាយុ២៣ឆ្នាំមុខរបរជាកម្មការិនីរោងចក្រអ៊ីខាង មានស្រុកកំណើតនៅជិតផ្សារទំលាប់ ឃុំគីរីចុងកោះ ខេត្តតាកែវ ចំណែកបុរសជាប្ដីចិតកំណាចនោះមានឈ្មោះ ញ៉ែម ពុធ អាយុ៣៣ឆ្នាំមុខរបរជាមេការសំណង់ មានស្រុកកំណើតនៅខេត្តស្វាយរៀង អ្នកទាំង២ស្នាក់ក្នុងបន្ទប់ជួលកើតហេតុ។
បើតាមសម្ដីរៀបរាប់របស់ស្ត្រីរងគ្រោះទាំងទឹកភ្នែកកំពុងហូរនិងពេទ្យកំពុងដេរមុខរបួសបានរៀបរាប់ថា រូបគាត់និងបុរសជាប្ដីបានរួមរស់ជាមួយអស់រយៈពេលជិត២ឆ្នាំហើយ ដោយការរស់់នៅមានតែរឿងនៅពេលដែលបុរសប្ដីផឹកស្រវឹងម្ដងៗតែងតែមករករឿងវាយទាត់ធាក់រូបគាត់រហូត ហើយគាត់ក៏ធ្លាប់រលូតកូនអស់ចំនួន២ផងដែរដោយសារការវាយធ្វើបាបបុរសជាប្ដី។លុះនៅយប់កើតហេតុរូបគាត់បានចេញពីធ្វើការនិងបានរៀបចំបាយទឹកទុកសំរាប់ប្ដីនិងអង្គុយលេងនៅមុខបន្ទប់រង់ចាំប្ដីត្រឡប់មកពីធ្វើការហូបបាយជុំគ្នា រហូតដល់វេលាម៉ោងកើតហេតុបុរសជាប្ដីក៏បានត្រឡប់មកដល់បន្ទប់ជួលវិញក្នុងអាការៈស្រវឹងក៏បានមករករឿងចោទប្រកាន់រូបគាត់ (ស្ត្រីជាប្រពន្ធ) ថាទៅលេងប្អូនថ្លៃ (ជាប្អូនប្រុសបង្កើតស្ត្រីរងគ្រោះ ព្រោះបុរសជាប្ដីមិនចិត្តប្អូនថ្លៃ) ទោះបីរូបគាត់ខំពន្យល់បកស្រាយយ៉ាងណាក៏បុរសជាប្ដីមិនស្ដាប់ 
ហើយបុរសជាប្ដីក៏បានអូសរូបគាត់ចូលទៅក្នុងបន្ទប់រួចចាក់សោជាប់ ហើយបានវាយទាត់ធាក់បោចសក់រូបគាត់បោកផ្ទប់និងជញ្ជាំង រួចក៏បានយកកាំបិតបុ័ងតោមក អារកគាត់ ដោយរូបគាត់ព្យាយាមរើបំរាស់ផងដែរ តែរើមិនរួច ក៏ត្រូវបុរសជាប្ដីអារកបណ្ដាលអោយរងរបួសរយះ ក ប្រវែង៣សង់ទីម៉ែត្រហូរឈាម លុះពេលបុរសជាប្ដីឃើញដូចនោះក៏មានការភិតភ័យ រួចបើកទ្វារបន្ទប់រត់គេចខ្លួនបាត់តែម្ដង ភ្លាមៗស្ដ្រីរងគ្រោះក៏បានខំប្រឹងចេញមកក្រៅសុំអោយប្រជាពលរដ្ឋជួយ។
បន្ទាប់ពីកើតហេតុស្ត្រីរងគ្រោះក៏ត្រូវបានប្រជាពលរដ្ឋបញ្ជូនទៅពេទ្យនៅក្បែរនោះដើម្បីព្យាបាលរបួសភ្លាមៗ ហើយសមត្ថកិច្ចមូលដ្ឋានក៏បានមកដល់កន្លែងកើតហេតុធ្វើការសួរនាំប្រជាពលរដ្ឋនិងស្ត្រីរងគ្រោះដើម្បីស្វែងរកបុរសជាប្ដីយកមកសួរនាំនិងចាត់ការតាមផ្លូវច្បាប់៕
