ជនសង្ស័យកាច់សោក.ម៉ូតូម្នាក់ ត្រូវបានប្រជាពលរដ្ឋព័ទ្ឋស្ទាក់ចាប់បាន ខណៈដែលកាច់សោក.ម៉ូតូគេជិះចេញបាន៥ម៉ែត្រ។ ហេតុការណ៏នេះកើតឡើងកាលពីវេលាម៉ោង ៥និង៤៥នាទីព្រឹក ថ្ងៃទី១៥ ខែមករា ឆ្នាំ២០១៥ ស្ថិតនៅចំណុចសួនច្បារមាត់ទន្លេ ក្រុងតាខ្មៅ ខេត្តកណ្តាល។
សមត្ថកិច្ចឲ្យដឹងថា ជនសង្ស័យខាងលើឈ្មោះ ហឿន ប៊ុនធឿន អាយុ៣៨ឆ្នាំ មានទីលំនៅភូមិ សាមគ្គី ឃុំព្រែកដំបង ស្រុកមុខកំពូល ខេត្តកណ្តាល។ ចំណែកភាគីម្ចាស់ម៉ូតូឈ្មោះ ម៉ៅ សុភា ភេទប្រុស អាយុ២១ ជានិស្សិត រស់នៅក្នុងភូមិថ្មី សង្កាត់តាខ្មៅ ក្រុងតាខ្មៅ ខេត្តកណ្តាល។
តាមការអះអាងរបស់ជនរងគ្រោះបានឲ្យដឹងថា មុនពេលកើតហេតុ ខ្លួនបានជិះម៉ូតូម៉ាកឌូក ពណ៌ទឹកក្រូច ពាក់ស្លាកលេខ ១សេអឺ ៦៦៧៣ ឌុបម្តាយទៅហាត់ប្រាណនៅមាត់ទន្លេ ក្រុង តាខ្មៅ ខណៈដែលកំពុងតែហាត់ប្រាណបានមួយសន្ទុះ ស្រាប់តែទូរស័ព្ទរបស់ខ្លួនដែលភ្ជាប់ ប្រព័ន្ឋជីភីអេស រោទ៌ឡើងក្រឡេកមើលទៅម៉ូតូ ក៏ឃើញជនសង្ស័យកំពុងជិះម៉ូតូរបស់ខ្លួនចេញក៏ស្រែកឆោឡោថាចោៗ ធ្វើឲ្យជនសង្ស័យភ័យស្លន់ស្លោផ្តួលម៉ូតូចោល រត់ចូលទៅពួនក្នុង វិទ្យាល័យហ៊ុនសែនសេរីភាព រួចត្រូវបានប្រជាពលរដ្ឋនាំគ្នាដេញតាម ព័ទ្ឋចាប់បានប្រគល់ឲ្យសមត្ថកិច្ច។
ក្រោយពីចាប់ឃាត់ខ្លួន ជនសង្ស័យក៏បានសារភាពថា ខ្លួនពិតជាបានលួចម៉ូតូដូចការអះអាង របស់ម្ចាស់នោះមែន។ ហើយបច្ចុប្បន្នសមត្ថកិច្ចកំពុងក៏សាងសំណុំរឿង និងវត្ថុតាមរួមមាន សោរអក្សរតេមួយសម្រាប់ បញ្ជូនទៅតុលាការ ចំណែកម៉ូតូត្រូវបានប្រគល់ទៅឲ្យម្ចាស់ដើមវិញ៕
