ក្រុមចោរ ៦នាក់ ប្រដាប់ដោយអាវុធកាំភ្លើងAK ចំនួន២ដើម និងកាំភ្លើងខ្លី១ដើម ចូលប្លន់អាជីវករលក់មាសផ្លាកទីន ក្នុងផ្សារថ្មីអន្លង់វែង ស្រុកអន្លង់វែង បានបាញ់រះជាច្រើនគ្រាប់បណ្តាលឱ្យរបួសធ្ងន់ចំនួន៣នាក់ ហើយក្រុមចោរប្រដាប់អាវុធរត់គេចខ្លួនបាត់ស្រមោល ហេតុការណ៍នោះកើតឡើង វេលាម៉ោង ៥ល្ងាចថ្ងៃទី១៤ ខែមករា ឆ្នាំ២០១៥ ម្សិលមិញ។
ករណីចោរប្លន់ប្រដាប់អាវុធចូលប្លន់ទូរលក់មាសអាជីវករ នៅកណ្តាលផ្សារថ្មីអន្លង់វែង ដែលបានបាញ់រះជាច្រើនគ្រាប់ បណ្តាលឱ្យប្រជាពលរដ្ឋនៅក្បែរទីតាំងកើតហេតុរងរបួសធ្ងន់៣នាក់ ត្រូវបានបញ្ជូនទៅសង្គ្រោះនៅមន្ទីរពេទ្យបង្អែកស្រុកអន្លង់វែង។
ប្រជាពលរដ្ឋដែលរងគ្រោះដោយសារក្រុមចោរបាញ់មានឈ្មោះ ឡាន គឹមស៊ាន ភេទប្រុសអាយុ៣៦ឆ្នាំ ត្រូវគ្រាប់កាំភ្លើងធ្លាយឆ្អឹងជំនី ទី២.ឈ្មោះ ហាក់ ហ៊ី ភេទប្រុសអាយុ៣៦ឆ្នាំ ត្រូវគ្រាប់ចំភ្លៅស្តាំ និងទី៣ឈ្មោះ រុន សុភាព ភេទប្រុសអាយុ៣៦ឆ្នាំ ត្រូវគ្រាប់ចំប្រអប់ជើងស្តាំ ហើយត្រូវបានប្រជាពលរដ្ឋនាំទៅសង្គ្រោះនៅមន្ទីរពេទ្យបង្អែកស្រុកអន្លង់វែងភ្លាមៗផងដែរ។
លោកងួន ធារឹទ្ធិ បន្តថា បន្ទាប់ពីក្រុមចោរធ្វើសកម្មភាពប្លន់រួច បានជិះម៉ូតូគេចខ្លួនចូលព្រៃបាត់ ហើយកម្លាំងកងរាជអាវុធហត្ថស្រុក រួមនឹងកម្លាំងសមត្ថកិច្ចជាច្រើនស្ថាប័ន និងកម្លាំងកងពលតូចថ្មើរជើងលេខ៤១ កំពុងតាមប្រមាញ់មុខសញ្ញាក្រុមចោរទាំងនោះ ។
បើតាមឱ្យដឹងពីម្ចាស់ទូរមាសឈ្មោះ ណារី ត្រូវក្រុមចោរប្លន់យកអស់ជាង ៥០តំឡឹងមាស ចំណែកឯទូរលក់មាស ២កន្លែងទៀត អស់តែតិចតួចប៉ុណ្ណោះ។
