ជនសង្ស័យម្នាក់ក្នុងចំណោមបក្សពួក២នាក់ ត្រូវបានប្រជាពលរដ្ឋចាប់បានប្រគល់ឱ្យសមត្ថកិច្ច ដោយសារតែពួកគេបានផ្លោះចូលក្នុងរបស់ផ្ទះបំណងចូលទៅលួចទ្រព្យសម្បត្តិ តែត្រូវបានគេប្រទះឃើញនិងស្រែកឆោរឡោឡើងបង្កការភ្ញាក់ផ្អើលទាំងយប់ នៅខាងក្រោយមន្ទីរពេទ្យកាល់ម៉ែត្រ ស្ថិតក្នុងភូមិទី២៣ សង្កាត់ស្រះចក ខណ្ឌដូនពេញ កាលពីវេលាម៉ោង១១នឹង៥០នាទីយប់ថ្ងៃទី១៥ ខែមករា ឆ្នាំ២០១៥ ។ 
យោងតាមសម្តីប្រជាពលរដ្ឋដែលបានឃើញហេតុការន៍ខាងលើនេះបានឱ្យដឹងថា រូបគេរួមជាមួយនឹងមិត្តភក្ត្របានអង្គុយលេងនៅខាងមុខផ្ទះ ភ្លាមៗនោះស្រាប់តែបានឃើញជនសង្ស័យ២នាក់បានធ្វើសកម្មភាព ផ្លោះរបងផ្ទះប្រជាពលរដ្ឋនៅជិតនោះដោយមានការសង្ស័យក៏បានស្រែកឆោរឡោឡើង បង្កការភ្ញាក់ផ្អើលទាំងយប់ និងដេញឃាត់ខ្លួនបានម្នាក់ហើយប្រគល់ទៅឱ្យសមត្ថកិច្ចភ្លាមៗផងដែរ ។ 
សមត្ថកិច្ចបានឱ្យដឹងថា ជនសង្ស័យដែលប្រជាពលរដ្ឋឃាត់បាននោះមានឈ្មោះ ជិន យ៉ា អាយុ២៩ឆ្នាំ មានស្រុកកំណើតនៅស្រុកស្នួល ខេត្តក្រចេះ មានមុខរបរនិងកន្លែងស្នាក់នៅមិនពិតប្រាកដ ។ សមត្ថកិច្ចបន្តថា ជនសង្ស័យម្នាកនេះនៅមិនទាន់អាចបញ្ជាក់បានថាជាប់ពាក់ព័ន្ឋនឹងករណីអ្វីឱ្យពិតប្រាកដនោះឡើយទេ គឺយកទៅឃុំខ្លួនជាបណ្តោះអាសន្ននៅបុស្តិ៍នគរបាលរដ្ឋបាលស្រះចក រង់ចាំសាកសួរបន្តនាពេលក្រោយ ព្រោះថាមិនមានវត្ថុតាងអ្វីនៅជាប់នឹងខ្លួនជនសង្ស័យនោះទេ ៕ 
