ខេត្តប៉ៃលិន ៖ ស្ត្រីម្នាក់រងរបួសធ្ងន់សន្លប់បាត់ស្មារតីនៅនឹងកន្លែង ត្រូវគេដឹកតាមម៉ូតូយកទៅសង្គ្រោះនៅមន្ទីរពេទ្យបង្អែកខេត្ត រីឯបួននាក់ទៀតរងរបួសស្រាល ដោយសារជិះម៉ូតូឌ្រីមឆ្លងផ្លូវមិនប្រុងប្រតយ័ត្ន ត្រូវម៉ូតូឌ្រីមមួយគ្រឿងទៀតបើកបរក្នុងល្បឿនលឿន បុកចំផ្នែ កខាងក្រោយពេញទំហឹង បណ្តាលឱ្យដួលបោកទៅនឹងថ្នល់រងរបួសធ្ងន់ស្រាលតែម្តង ដែលហេតុការណ៍នេះ បានកើតឡើងកាលពីវេលាម៉ោង១ និង១០នាទីរសៀល ថ្ងៃទី១៦ ខែមករា ឆ្នាំ២០១៥ ស្ថិតនៅលើបណ្តោយផ្លូវជាតិលេខ៥៧ ក្នុងភូមិអូរតាពុកលើ សង្កាត់ប៉ៃលន ក្រុងប៉ៃលិន ។
ប្រភពព័ត៌មានពីសមត្ថកិច្ចនគរបាលចរាចរជើងគោកនៃស្នងការនគរបាលខេត្ត បានឱ្យដឹងថា ស្ត្រីរងគ្រោះដែលបែកក្បាលផ្នែកខាងក្រោយរបួសធ្ងន់ ឈ្មោះ ឈួន សុម៉ាលី អាយុ៤៦ឆ្នាំ ជាអាជីវករលក់ដូរនៅផ្សារសាមគ្គី ហៅប៉ាហ៊ី និងអ្នកបើកបរម៉ូតូ ឈ្មោះ មុត សុវត្ថិ ភេទប្រុស អាយុ២៨ឆ្នាំ រងរបួសស្រាល ដោយបើកម៉ូតូម៉ាកឌ្រីមពណ៌ខ្មៅ ស៊េរីឆ្នាំ២០១៣ ពាក់ស្លាកលេខ បន្ទាយមានជ័យ 1F-6524 រងការខូចខាតស្រាល ទាំងអស់គ្នារស់នៅភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ដោយបើកបរឆ្លងផ្លូវក្នុងទិសដៅពីជើងទៅត្បូង ។ 
ចំណែកភាគីម្ខាងទៀត ឈ្មោះ លឿន ឡោះ ភេទប្រុស អាយុ២១ឆ្នាំ ជាអ្នករត់ម៉ូតូឌុប រងរបួសស្រាល ដោយបើកបរម៉ូតូម៉ាកឌ្រីមពណ៌ខ្មៅ ស៊េរីឆ្នាំ២០០៥ ពាក់ស្លាកលេខ ប៉ៃលិន 1A-2159 រងការខូចខាតស្រាល រស់នៅភូមិទឹកផុស សង្កាត់ប៉ៃលិន ក្រុងប៉ៃលិន ដោយបើកបរម៉ូតូក្នុងទិសដៅពីកើតទៅលិច និងអ្នករួមដំណើរពីរនាក់ទៀត ទី១. ឈ្មោះ សេង លីនដា ភេទស្រី អាយុ១៩ឆ្នាំ រងរបួសស្រាល រស់នៅភូមិទឹកផុស សង្កាត់ប៉ៃលិន ក្រុងប៉ៃលិន ទី២. ឈ្មោះ សេង ប៊ុនធឿន ភេទប្រុស អាយុ២៣ឆ្នាំ រងរបួសស្រាល រស់នៅភូមិបឹងព្រលឹត ឃុំស្ទឹងកាច់ ស្រុកសាលាក្រៅ ។ 
ប្រភពព័ត៌មានពីសាក្សីនៅកន្លែងកើតហេតុបានឱ្យដឹងថា មុនពេលកើតហេតុគេឃើញ ស្ត្រីរងគ្រោះខាងលើ ឡើងជិះម៉ូតូឌុបចេញពីផ្សារក្នុងគោលបំណងទៅបង់លុយឱ្យមីក្រូហិរញ្ញវ ត្ថុប្រាសាក់ ដោយម៉ូតូបើកបរក្នុងទិសដៅពីជើងទៅត្បូងឆ្លងផ្លូវថ្នល់ លុះឆ្លងមិនទាន់ផុតផងស្រាប់តែមានម៉ូតូមួយគ្រឿងទៀត បើកបរក្នុងទិសដៅពីកើតទៅលិច ក្នុងល្បឿនលឿន បណ្តាលឱ្យជ្រុលចង្កូតទៅបុកម៉ូតូស្ត្រីរងគ្រោះចំផ្នែកខាងក្រោយ បណ្តាលឱ្យប្រាវទាំងអស់គ្នារងរបួសតែម្តង ។
ក្រោយពេលកើតហេតុ ស្ត្រីរងគ្រោះធ្ងន់ធ្ងរត្រូវគេដឹកទៅសង្គ្រោះនៅមន្ទីរពេទ្យបង្អែក ខេត្ត ហើយបន្ទាប់ពីសមត្ថកិច្ចធ្វើការវាស់វែងរួច ក៏អូសម៉ូតូទាំងពីរគ្រឿងយកទៅរក្សាទុកនៅ ស្នងការនគរបាលខេត្ត រង់ចាំភាគីទាំងសងខាងចូលមកដោះស្រាយតាមផ្លូវច្បាប់ ។ ចំណែក ស្ត្រីរងគ្រោះធ្ងន់ត្រូវក្រុមគ្រួសារដឹកបន្តយកទៅសង្គ្រោះនៅមន្ទីរពេទ្យខេត្តបាត់ដំបង ៕
