ខេត្តបន្ទាយមានជ័យ ១៦ មករា ២០១៥
ពលរដ្ឋខ្មែរជាច្រើននាក់បានជិះរថយន្តទួរីស ចេញពីខេត្តស្រះកែវឆ្ពោះទៅ ខេត្តនរ៉ាធិវាស ក្នុងគោលបំណងទៅរក ការងារធ្វើ នៅប្រទេសថៃបានជួបគ្រោះថ្នាក់ចរាចរណ៍ បណ្តាលឲ្យស្លាប់៦នាក់ និងរបួសធ្ងន់ស្រាល៩ នាក់ លើកំណាត់ផ្លូវកោងមួយកន្លែងក្នុង ឃុំចាក់នង ស្រុកឆះនះ ខេត្តស៊ុងខ្លា កាលពីវេលា ម៉ោង៤និង៣០នាទីទាមភ្លឺ ព្រឹកថ្ងៃទី១៦ ខែមករា ឆ្នាំ២០១៥។
គេហទំពរ័កាសែតថៃរ៉ាត់បានចេញផ្សាយថា រថយន្តទួរីស(រថទូ)ដែលដឹកពលករជួបគ្រោះថ្នាក់ ចរាចរណ៍នេះ ពាក់ស្លាកលេខ 10-5364 ស៊ុងខ្លា ជារថយន្តឈ្នួលឯកជន បានជួបគ្រោះថ្នាក់ចរាចរណ៍ លើផ្លូវអាស៊ាន ក្នុងភូមិឃុំកើតហេតុខាងលើ បានបណ្តាលឲ្យមានពលករខ្មែរ៥នាក់ស្លាប់ភ្លាមនៅកន្លែង កើត និង០១នាក់ផ្សេងទៀតបានស្លាប់ពេលបញ្ជូនទៅមន្ទីរ ក្នុងមនុស្សប្រុសស្រី៩នាក់ផ្សេងទៀត បានរងរបួសធ្ងន់និងស្រាល តែត្រូវបានសមត្ថកិច្ចបញ្ជូនទៅសង្គ្រោះភ្លាមផងដែរ។
ជនរងគ្រោះក្នុងហេតុការណ៍ នេះភាគច្រើនជាពលករខ្មែរ អ្នកដែលស្លាប់បាត់ជីវិតមានជនជាតិថៃ០១នាក់ ខែ្មរ៤នាក់ និងជនជាតិម៉ា ឡេស៊ី០១នាក់ ។ក្នុងមួយរថយន្តនេះគឺជិះគ្នា១៥នាក់ ក្នុងនោះគេ ដឹងថា មានជនជាតិខ្មែរ១១នាក់ ជនជាតិថៃ២នាក់ ជនជាតិម៉ាឡេស៊ី០២នាក់ បច្ចុប្បន្នជរងគ្រោះត្រូវ កំពុងសម្រាកព្យាបាលក្នុងមន្ទីរពេទ្យ ស្រុកចាក់ណាក់ ខេត្តស៊ុងខ្លា។គ្រោះថ្នាក់នេះកើតឡើងដោយសារ អ្នកបើកបរងងុយដេក ទើបបណ្តាលឲ្យក្រឡាប់ជាច្រើនត្រឡប់តែម្តង។
ជុំវិញករណីនេះភ្នាក់ងារពត៏មានយើង មិនអាចទំនាក់ទំនងសុំការបំភ្លឺពីលោក នេត្រ សារី អគ្គកុងស៊ុលកម្ពុជា ប្រចាំខេត្តស្រះកែវ ប្រទេសថៃ ដើម្បីសួរនាំជុំវិញរឿងរ៉ាវគ្រោះថ្នាក់ចរាចរណ៍នេះបានទេ ព្រោះទូរសព្ទ័ ខលចូលគ្មានអ្នកទទួល។
លោកឧត្តមសេនីយ៍ទោ ពេជ្រ វណ្ណា ប្រធានការិយាល័យទំនាក់ទំនងព្រំដែនកម្ពុជាថៃ បានថ្លែង ឲ្យដឹងតាមទូរសព្ទ័ថា ពិតជាមានករណីហ្នឹងកើតឡើងមែន ពេលនេះលោកបានបញ្ជូនមន្ត្រីរបស់ខ្លួនចុះ ទៅធ្វើការនៅគោលដៅនេះហើយ។ចំពោះលទ្ធផលយ៉ាងណានោះលោកនឹងជូនដំណឹងបន្តទៀតតាម ក្រោយ។
សូមបញ្ជាក់ថា នៅថ្ងៃដដែលនេះក៏មានពលរដ្ឋម្នាក់រស់នៅខេត្តបាត់ដំបង ទូរសព្ទ័មកទំនាក់ទំនងខាងការិយាល័យ របស់លោក រាយការណ៍ថា បងប្អូនរបស់ខ្លួនបានជួបគ្រោះថ្នាក់ចរាចរណ៍ស្លាប់ បាត់បង់ជីវិត នៅខេត្តឈុនបុរី ប្រទេសថៃផងដែរ៕
