នៅប្រទេសថៃ ថ្ងៃចន្ទនេះ អាជ្ញាធរថៃបានប្រកាសថា បានចាប់ខ្លួនមេដឹកនាំចលនាប្រឆាំងរដ្ឋាភិបាលមួយរូប ពីបទបានរំលោភបំពានគោលការណ៍នៃស្ថានភាពប្រកាសអាសន្នដែលអាជ្ញាធរកំពុងដាក់នៅក្រុងបាងកក សព្វថ្ងៃនេះ។ ថៃទើបតែបានចាប់ខ្លួនមេក្រុមប្រឆាំង ជាលើកទី១ ប៉ុណ្ណោះ បើទោះជាកន្លងមក អាជ្ញាធរបានចេញដីកាចាប់ខ្លួនជាង១០មកហើយក្តី។ នេះជាលើកទី១ហើយ ដែលប៉ូលិសថៃបានចាប់ខ្លួន មេដឹកនាំចលនាបាតុកម្មប្រឆាំងរដ្ឋាភិបាលលោកស្រីយីងឡាក់ ក្នុងពេល៣ខែមកនេះ។
កន្លងមក ទោះជាមានដីកាចាប់ខ្លួនចំនួនជាង១០ អនុញ្ញាត អោយប៉ូលិសចាប់ខ្លួនមេដឹកនាំបាតុកម្មប្រឆាំងជាច្រើនរូប ក៏ដោយចុះ អាជ្ញាធរមានសមត្ថកិច្ចទើបតែបានសម្រេចចាប់ខ្លួនមេដឹកនាំក្រុមប្រឆាំងមួយរូប នៅពេលនេះតែប៉ុណ្ណោះ។ មេដឹកនាំក្រុមបាតុករប្រឆាំងដែលថៃប្រកាសថា បានចាប់ខ្លួននៅថ្ងៃចន្ទនេះ មានឈ្មោះថា សុងទីយ៉ាន ឈឿនរូអេថៃណៃថាំ។
ប៉ូលិសចាត់ទុកគាត់ថា ជាមេដឹកនាំចលនាប្រឆាំងសំខាន់ទី២។ លោកសុងទីយ៉ានរងការចោទប្រកាន់ថា បានរំលោភបំពានគោលការណ៍នៃស្ថានភាពប្រកាសអាសន្ន ដែលកំពុងតែដាក់នៅក្រុងបាងកក សព្វថ្ងៃនេះ។
គួររំលឹកថា ដើម្បីទប់ស្កាត់ចលនាក្រុមបាតុករ អាជ្ញាធរថៃបានដាក់ក្រុងបាងកក និងទីកន្លែងដទៃទៀតស្ថិតនៅជាប់ក្រុងបាងកក អោយស្ថិតក្នុងស្ថានភាពប្រកាសអាសន្នរយៈពេល៦០ថ្ងៃ គិតចាប់ពីថ្ងៃ២៣មករាកន្លងមក។ គោលការណ៍ស្ថានភាពប្រកាសអាសន្ន ហាមឃាត់មិនអោយមានការជួបជុំគញនា នៅតាមកន្លែងមួយចំនួន ក្នុងទីក្រុងបាងកកនោះទេ។
ហើយស្ថានភាពប្រកាសអាសន្ននេះ អនុញ្ញាតអោយប៉ូលិសឃុំជនសង្ស័យបាន១ខែ ដោយមិនចាំបាច់រង់ចាំអោយមានការដាក់ពិរុទ្ធអ្វីឡើយ។ កន្លងមក អាជ្ញាធរថៃធ្លាប់ចេញដីកាចំនួន៣ អោយចាប់ខ្លួនលោកស៊ូថេប ដែលជាមេដឹកនាំបាតុកម្មប្រឆាំងរដ្ឋាភិបាល ដ៏សំខាន់។ លោកស៊ូថេប បានផ្គើនអាជ្ញាធរថៃអោយ មកតាមរកចាប់រូបលោក។ លោកស៊ូថេបនៅតែបន្តដើរដង្ហែក្បួនបាតុកម្ម នៅតាមដងផ្លូវជាច្រើន នៅក្រុងបាងកកដដែល។
គាត់ជាអ្នកទាមទារអោយមានក្រុមប្រឹក្សាប្រជាជនមួយ ដោយមិនចាំបាច់ឆ្លងកាត់ការបោះឆ្នោត អោយក្រុមប្រឹក្សាប្រជាជននេះ ដឹកនាំប្រទេសជំនួសរដ្ឋាភិបាលលោកស្រីយីងឡាក់។ ការបោះឆ្នោតសភាមុនកាលកំណត់ នៅថ្ងៃ២កុម្ភៈកន្លងទៅ មិនបានជួយដោះស្រាយវិបត្តិនយោបាយក្នុងស្រុកឡើយ។
ក្រុមបាតុករបានរាំងស្ទះដំណើរការបោះឆ្នោត នៅតាមការិយាល័យបោះឆ្នោត១០ភាគរយ រាំងស្ទះមិនអោយមានការផ្សព្វផ្សាយលទ្ធផលនៃការបោះឆ្នោត ធ្វើអោយរដ្ឋាភិបាលលោកស្រីយីងឡាក់ នៅតែបន្តគ្រប់គ្រងប្រទេស តែអំណាចរដ្ឋាភិបាលមានព្រំដែនកំណត់៕ 
