ភ្នំពេញ ៖ បុរស២នាក់បានរងរបួសបាក់ដៃបាក់ជើងសន្លប់នៅនឹងកន្លែងបន្ទាប់ពីរថយន្តកាមរីហាយប្រ៊ីតមួយគ្រឿងបើកមកបុកម៉ូតូជនរងគ្រោះទាំង២នាក់កំពុងបើកបរដល់ចំណុចផ្លូវបែកជា៤ ។ ហេតុការណ៍នេះកើតឡើងកាលពីវេលាម៉ោង ៩ និង ៣០នាទី យប់ ថ្ងៃទី១៦ មករា 
២០១៥ នៅចំណុចផ្លូវបែកជា៤ ស្ថិតក្នុងសង្កាត់បឹងត្របែក ខណ្ឌចំការមន ។ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញបុរសរងគ្រោះទាំង២នាក់ បើកម៉ូតូម្នាក់មួយគ្រឿង គឺមួយគ្រឿងម៉ាកហុងដាឌ្រីមសេ១២៥ ពណ៌ខ្មៅ ពាក់ស្លាកលេខភ្នំពេញ1AL-4333 និង មួយគ្រឿងទៀតម៉ាកណៃ ពាក់ស្លាកលេខបាត់ដំបង1B-1836 ។ បុរសរងគ្រោះទាំងពីរនាក់ខាងលើបានបើកបរម៉ូតូម្នាក់មួយគ្រឿង តាមផ្លូវលេខ៤៣២ ក្នុងទិសដៅពីលិចទៅកើតខណៈបើកម៉ូតូមកដល់ចំណុចកើតហេតុផ្លូវបែកជា៤ ក៏ត្រូវរថយន្តកាមរីហាយប្រ៊ីត ពណ៌ស
មួយគ្រឿងបើកក្នុងល្បឿនដោយធ្វើដំណើរតាមផ្លូវលេខ១០៥ក្នុងទិសដៅពីជើងទៅត្បូង បើកមកដល់ចំណុចផ្លូវបែកជា៤ ក៏បានបុកម៉ូតូជនរងគ្រោះទាំង២គ្រឿង បណ្តាលឱ្យខ្ទាតទាំងម៉ូតូ និង អ្នកបើកទៅលើថ្នល់រងរបួសបាក់ដៃបាក់ជើង សន្លប់នៅនឹងកន្លែងកើតហេតុ ។ក្រោយពេលកើតហេតុរថយន្តបង្កបានបើកគេចខ្លួនបាត់ស្រមោល ចំណែកបុរសរងគ្រោះទាំង២នាក់ត្រូវរថយន្តសាមុយរបស់មន្ទីរពេទ្យមកទទួលយកទៅសង្គ្រោះ។ នៅនឹងកន្លែងកើតហេតុសមត្ថកិច្ចមូលដ្ឋានបានចុះមកពីនិត្យកន្លែងកើតហេតុ និងបាននាំយកម៉ូតូរបស់ជនរងគ្រោះទាំងពីរគ្រឿងទៅរក្សាទុកឱ្យនៅប៉ុស្ថិ៍សង្កាត់រដ្ឋបាលនគរបាលចោមចៅ ។
