បន្ទាយមានជ័យៈ ក្រុមហ៊ុនចំនួន៤ ដែលប្រកបរបររកស៊ីកាយដីលក់ ហើយត្រូវក្រសួងរ៉ែ និងថាមពលបានបញ្ចាប់អាជ្ញាប័ណ្ណហើយនោះ តែក្រុមហ៊ុនទាំងនេះនៅបន្តឃុបឃិតជាមួយអាជ្ញាធរក្រុង និងស្ថាប័នពាក់ព័ន្ធនៅក្នុងខេត្តបន្ទាយមានជ័យ លួចធ្វើសកម្មភាពកាយដីភ្នំលក់យ៉ាងគគ្រឹកគគ្រែង ដឹកប្រសេចប្រសាចពេញខេត្ត ដោយគ្មានញញើតច្បាប់សោះឡើយ សកម្មភាពល្មើសនេះក៏មិនទាន់ឃើញមានសមត្ថកិច្ចជំនាញណាមួយចេញមុខមក ទប់ស្កាត់ដែរ ឬមួយក៏ស្ថាប័នទាំងនោះ ទទួលបានសំណែនពីឈ្មួញរៀងរាល់ខែអស់ហើយ?
រាល់ថ្ងៃនេះ មានក្រុមហ៊ុនចំនួន៤ ដែលកំពុងធ្វើសកម្មភាពកាយដីភ្នំលក់ មានទី១.ក្រុមហ៊ុន ភ្លន់ ហុង (របស់លោក ភ្លន់ តារា មេបញ្ជាការតំបន់ប្រតិបត្តិការសឹករងខេត្តបន្ទាយមានជ័យ) ដែលធ្វើសកម្មភាពកាយនៅចំណុចខាងត្បូង និងខាងកើតភ្នំដូងព្រះ ស្ថិតសង្កាត់អូរអំបិល, ទី២.ក្រុមហ៊ុន យឿម គង់ សមាជិកសភាពាណិជ្ជកម្មខេត្តបន្ទាយមានជ័យ សកម្មភាពកាយចំណុចភ្នំបាក់ ស្ថិតសង្កាត់ទឹកផ្លា, ទី៣.ក្រុមហ៊ុន ឡាច ហុក ធ្វើសកម្មភាពកាយម្ខាងជើងភ្នំដូងព្រះ ស្ថិតក្នុងសង្កាត់កំពង់ស្វាយ និងទី៤.ក្រុមហ៊ុន ញ៉ាំ សាវ៉ូន ប្រពន្ធរបស់លោក ទួ ធានទ័រ ធ្វើសកម្មភាពកាយភ្នំកងវ៉ា ក្រុងសិរីសោភ័ណ។
ពាក់ព័ន្ធករណីនេះ លោក សុត វឌ្ឍនា ប្រធានមន្ទីរ៉ែ និងថាពលខេត្តបន្ទាយមានជ័យ ប្រាប់ អ្នកយកពត៏មាន នៅព្រឹកថ្ងៃទី១៦ ខែមករានេះថា ក្រោយពេលលោក គោស៊ុំ សារឿត អភិបាលខេត្តបន្ទាយមានជ័យ បញ្ជាឲ្យធ្វើប្រកាសរបស់មន្ទីរ៉ែថាមពលខេត្តបន្ទាយមានជ័យ ដែលបានសុំឲ្យក្រសួងរ៉ែ និងថាមពល ត្រូវបិទអាជ្ញាប័ណ្ណក្រុមហ៊ុនទាំង៤ ដែលធ្វើសកម្មភាពកាយដីភ្នំលក់ជាច្រើនឆ្នាំមកហើយ ធ្វើប៉ះពាល់ដល់បរិស្ថានធម្មជាតិលើ ភ្នំដើម្បីរក្សាទុក ហើយខេត្តនឹងរៀបចំតំបន់ទេសចរធម្មជាតិភ្នំ នៅកណ្តាលក្រុងសិរីសោភ័ណ។
លោកបានបញ្ជាក់ថា ក្រោយពេលដែលអភិបាលខេត្តស្នើសុំ ក្រសួងបានយល់ព្រមនៅពេលបញ្ចប់អាជ្ញាប័ណ្ណក្រុមហ៊ុនទាំង៤ នៅថ្ងៃទី៣១ ខែធ្នូ ឆ្នាំ២០១៤។ ក្រោយពេលបញ្ចប់អាជ្ញាប័ណ្ណហើយនោះ ក្នុងចំណោម៤ក្រុមហ៊ុន មានក្រុមហ៊ុនចំនួន៣ មាន១.ក្រុមហ៊ុន ភ្លន់ ហង្ស ចំណុចភ្នំដូងព្រះ, ២.ក្រុមហ៊ុន យឿម គង់, ៣.ក្រុមហ៊ុន ញ៉ាំ សាវ៉ូន នៅតែបន្តលួចលាក់ធ្វើសកម្មភាពកាយដីភ្នំលក់ ដែលមិនញញើតនឹងច្បាប់។ ហើយពេលនេះ មន្ទីរ៉ែ និងថាមពល
ខេត្តបន្ទាយមានជ័យ បានធ្វើលិខិតរាយការណ៍ជូនលោកអភិបាលខេត្ត ហើយត្រូវបានចុះហាមឃាត់នៅព្រឹកថ្ងៃទី១៥ ខែមករា ឆ្នាំ២០១៥នេះ និងបានព្រមានថា បើមានក្រុមហ៊ុនណាមួយហ៊ានធ្វើសកម្មភាពកាយដីភ្នំបន្តទៀត ត្រូវមានវិធានការតាមច្បាប់៕
