កំពង់ឆ្នាំង៖ ស្ត្រីម្នាក់បានរងរបួសដេកសន្លប់ និងត្រូវបានក្រុមគ្រួសារដឹកមកសង្គ្រោះនៅក្នុងមន្ទីរពេទ្យខេត្ត ចំណែកបុរសម្នាក់ទៀតបានរងរបួសជាំភ្នែកឆ្វេង ខណៈដែលជនរងគ្រោះទាំង២នាក់ត្រូវជាបងប្អូនថ្លៃនិងគ្នាមានជម្លោះជាមួយក្រុមជនដៃដល់និងបក្ខពួកមួយក្រុមទៀតក្នុងអំពើហឹង្សាដោយចេតនាមួយ រឿងដាក់ម៉ូតូចង្អៀតលើផ្លូវដើរបន្តិចបន្តួចសោះ។ករណីនេះបានកើតឡើងនៅវេលាម៉ោង៦និង១០នាទីយប់ថ្ងៃទី១៥ ខែមករា ឆ្នាំ២០១៥ នៅក្នុងភូមិម៉ុងបារាំង សង្កាត់ប្អេរ ក្រុងកំពង់ឆ្នាំង។
លោក ម៉ា យន្ត នាយផ្នែកនគរបាលព្រហ្មទណ្ឌ័ក្រុងកំពង់ឆ្នាំងបាននិយាយអោយដឹងថា៖ ស្ត្រីរងគ្រោះក្នុងអំពើហឹង្សាដោយចេតនានោះមានឈ្មោះ វោយ មករា អាយុ៣២ឆ្នាំ រងរបួសធ្ងន់ និងបុរសម្នាក់ទៀតជាបងថ្លៃស្រី្តខាងលើនេះមាន ឈ្មោះ អុំ ទូច អាយុ៣៥ ឆ្នាំ ទាំង២នាក់មានទីលំនៅភូមិម៉ុងបារាំង សង្កាត់ប្អេរ ក្រុងកំពង់ឆ្នាំង។ ចំណែកជនដៃដល់មានឈ្មោះ ស៊ិញ ភេទប្រុសអាយុ ជាង២០ឆ្នាំ ជាកូនបុរសឈ្មោះ រ៉ា និងម្តាយឈ្មោះភាព គ្រួសារនេះនៅភូមិផ្សារលើ សង្កាត់ផ្សារឆ្នាំង ក្រុងកំពង់ឆ្នាំង។
មុនពេលកើតហេតុស្ត្រីឈ្មោះ វោយ មករា បានឈ្លោះប្រកែកគ្នាជាមួយ ស្ត្រី ឈ្មោះភាព ពីរឿងដាក់ម៉ូតូចង្អៀតផ្លូវដើរ នៅពេលកំពុងឈ្លោះគ្នានោះស្រាប់តែកូនស្ត្រីឈ្មោះភាព មានឈ្មោះ ស៊ីញ និងបក្ខពួក បានស្ទុះមកវាយស្ត្រីឈ្មោះ វោយ មករា បណ្តាលអោយដួលសន្លប់ដេកលើដី ក្នុងគ្រានោះដែរបុរសឈ្មោះ អុំ ទូច ជាបងថ្លៃស្ទុះមកជួយ ក៏ត្រូវឈ្មោះស៊ីញ និងបក្ខពួកព្រួតវាយត្រូវជាច្រើនដៃបណ្តាលអោយជាំភ្នែកមួយជំហៀង។
ក្រោយពេលកើតហេតុអ្នកជិតខាងបានចួលជួយឃាត់ហើយបានយកស្ត្រីរងគ្រោះមកកាន់មន្ទីរពេទ្យខេត្ត ចំណែកជនដៃដល់ឈ្មោះ ស៊ីញ ភ័យខ្លួនបានគេចបាត់ពីផ្ទះ។
លោក ម៉ា យន្ត បានអោយដឹងទៀតថា៖ បាននៅព្រឹកថ្ងៃទី១៦ ខែមករា ឆ្នាំ២០១៥ នេះគ្រួសារជនរងគ្រោះទាំង២នាក់បាន មកដាក់ពាក្យប្តឹងនៅក្នុងអធិការដ្ឋាននគរបាលក្រុងរួចហើយ ដែលពេលនេះសមត្ថកិច្ចជំនាញកំពុងកសាងសំរឿងតាមនិតិវិធីបញ្ជូនទៅកាន់តុលាការខេត្ត ដើម្បីសុំដីកាស្វែងរកចាប់ខ្លួនជនដៃដល់ដែលបានរត់គេចខ្លួនបាត់ពីមូលដ្ឋានទៅហើយ តែជុងពិតជាមិនភ្លេចកុកឡើយ៕
