ប្រទេសកេនយ៉ា និង ជប៉ុន បានចុះហត្ថលេខា លើកិច្ចសន្យារួមគ្នាមួយ ដោយ ប្រទេសមហាអំណាច សេដ្ឋកិច្ច ទីបី លើពិភពលោកមួយនេះ នឹងផ្តល់ប្រាក់កម្ចីប្រមាណ ២៧៥លានដុល្លារ សហរដ្ឋអាមេរិក ដល់ប្រទេស អាហ្វ្រិកកណ្តាល ក្នុងតំណាក់កាលទីពីរ ដើម្បី ពង្រីកកំពង់ផែ អន្តរជាតិនៅទីក្រុង មុំបាសា ។
ទីភ្នាក់ងារព័ត៌មានចិនស៊ិនហួ ចេញផ្សាយនៅថ្ងៃសៅរ៍ ទី១៧ ខែមករា ឆ្នាំ ២០១៥ នេះថា រដ្ឋមន្ត្រីក្រសួងរតនាគារជាតិ កេនយ៉ា លោក ហេនរី រ៉ូទិចហ៍ បាននិយាយថា ប្រាក់កម្ចីនេះ នឹង ប្រើប្រាស់ដើម្បី អភិវឌ្ឍន៍កំពង់ផែ ដូចជាការពង្រីកបន្ថែម និង កសាងនូវកន្លែងស្តុក ទំនិញ កុងទឺនឺ នៅច្រកចូលលេខ ២២ផងដែរ។
គួរបញ្ជាក់ថា ប្រទេសជប៉ុន បានបង្កើនតួនាទី របស់ខ្លួន ក្នុងការជួយអភិវឌ្ឍន៍ ប្រទេសជាច្រើន នៅតំបន់អាហ្វ្រិក ជាពិសេសប្រទេសកេនយ៉ា ។ ដោយមើលឃើញ បែបនេះ លោករដ្ឋមន្ត្រី កេនយ៉ា បានថ្លែងអំណរគុណ យ៉ាងជ្រាលជៅចំពោះជប៉ុន ដែលបានជួយស្តារ និង អភិវឌ្ឍន៍ សេដ្ឋកិច្ចរបស់កេនយ៉ា តាមរយៈការផ្តល់ ជំនួយឥតសំណង និង កម្ចីឥណទាន កន្លងមក ៕
