កំពង់ស្ពឺ=ឈើប្រណិតប្រភេទធ្នង់និងសុក្រមចំនួន៣៩ដុំធំៗដែលបានដឹកតាមឡានតូរីសត្រូវបានកំលាំងកងរាជអាវុធហត្ថកំពង់ស្ពឺស្ទាក់ចាប់បានខណះដែលឡានេះបានធ្វើដំណើរលើផ្លូវជាតិលេខ៤២ ពីចំណុចដែនជំរកសត្វព្រៃភ្នំ ឪរ៉ាល់ មកកាន់ទីរួមខេត្តកំពង់ស្ពឺ ។
តាមការឲ្យដឹងពីលោកអនុសេនីយ៏ឯក ទិត្យ វណ្ណះ នាយការិយាលយ័ស្រាវជ្រាវ កងរាជអាវុធហត្ថខេត្តបានឲ្យដឹងថាកាលពីវេលាម៉ោង២០និង៥០នាទីថ្ងៃទី១៨ខែមករាឆ្នាំ២០១៥កំលាំងកងរាជអាវុធហត្ថកំពង់ស្ពឺបានទទួលបទបញ្ជាពីលោកឧត្តមសេនីយ៏ត្រី ម៉ែន ស៊ីប៊ន មេបញ្ជាការចេញល្បាតក្នុងនយ័ទប់ស្កាត់រាល់បទ ល្មើសដែលកើតមានលើភូមិសាស្ត្រក្នុងខេត្តជារៀងរាល់ថ្ងៃ។
លោកអនុសេនីយ៏ឯក ទិត្យ វណ្ណះបានឲ្យដឹងទៀតថាដោយបានទទួលពត៏មាន ថាមានឡានតូរីសមួយបានដឹកឈើធ្នង់ និង ឈើសុក្រមគ្មានច្បាប់អនុញ្ញាតិ ធ្វើ ដំណើរឆ្លងកាត់តាមចំណុចក្នុងតំបន់ស្រុកឪរ៉ាល់និងស្រុកសំរោងទង ខេត្តកំពង់ ស្ពឺតាមផ្លូវជាតិលេខ៤២ កំលាំងក៏បានស្ទាក់ឃាត់បានភ្លាមៗ។
ប្រភពបន្តថាក្រោយពេលចុះទៅបង្ក្រាបបានកំលាំងបានរកឃើញឈើធ្នង់និងសុក្រមចំនួន៣៩ដុំស្មើរជាង២ម៉ែត្រគូបដែលជាប្រឈើម៉ៃតាប់សម្រាប់កែឆ្នៃ។ក្រោយពីដឹងខ្លួនក្រុមឈ្មួញរកស៊ីរួមទាំងអ្នកបើកបរបានចុះរត់គេចខ្លួនចូលព្រៃបាត់។
ឈើទាំងនេះឈ្មួញបានដឹកតាមឡានបំរ៉ុងយកទៅទុកក្នុងទឹកដីស្រុកគងពិសីនិងស្រុកបសេដ្ឋក្នុងបំណងចេញទៅប្រទេសជិតខាងដែលពេលបច្ចុប្បន្នឈើប្រណិតធ្នង់និងសុក្រមបានត្រូវប៉ាន់យ៉ាងខ្លាំងបន្ទាប់ពីឈើក្រញូងជិតបានបាត់ឈ្មោះពីក្នុងព្រៃធម្មជាតិបាត់ទៅហើយ។ក្រោយពីការបង្ក្រាប កំលាំងកងរាជអាវុធហត្ថកំពង់ស្ពឺបានប្រគល់ឈើទាំងនេះ ទៅឲ្យផ្នែករដ្ឋបាលព្រៃឈើកំពង់ស្ពឺនៅរសៀលថ្ងៃខែដដែលជាអ្នកថែរក្សានិងកសាងសុំណុំរឿងតាមនិតិវិធីនៃច្បាប់ព្រៃឈើ។
មានការលើកឡើងថាក្រុមសមត្ថកិច្ចដែលមានវត្តមាននៅចំណុចខាងលើហាក់គ្មានគំនិតក្នុងការបង្ក្រាបនោះទេ។ហើយករណីប្រភេទដូចខាងលើនេះមួយយប់បានឆ្លងកាត់ស្រុកឪរ៉ាល់ ជាពិសេសចេញពីដែនជំរកសត្វព្រៃភ្នំឪរ៉ាល់នេះ ក៏មិន តិគ្រឿងដែរ។ ដោយឈ្មួញទាំងនោះគ្រាន់តែទូរសព្ទ័ប្រាប់សមត្ថកិច្ចជំនាញជាការស្រេច។
គួរឲ្យចាប់អារម្មណ៏ជាងនេះទៅទៀតពួកឈ្មួញបានប្រើរូបភាពដឹកឈើប្រណិតគ្រប់ប្រភេទទាំងថ្ងៃក្នុងរូបភាពបង្កប់ក្រោមធ្យូងនិងអុសហើយពួកឈ្មួញទាំងនោះមិនហ៊ានលាក់ជំនាញទេដោយគ្រាន់តែបិទបាំងខ្លះលាក់ភ្នែកមហាជនតែប៉ុណ្ណោះ។បើទោះជាមានបទបញ្ជាដ៏តឹងរឹងយ៉ាងណាក្តីការបណ្តែតបណ្តោយឲ្យមានការដឹកឈើខុសច្បាប់នៅតែបន្តយ៉ាងរលូនដោយគ្រាន់តែប្តូររូបភាពឲ្យខុសពីមុនជៀសវាងត្រូវមាត់ថ្នាក់លើតែប៉ុណ្ណោះឬកុំឲ្យគគឹកគគ្រេងដូចមុនពេកចំពោះឈើទាំងនេះមាននៅតែលើទឹកដីដែលបរិស្ថានជាអ្នកគ្រប់គ្រងតែប៉ុណ្ណោះ។
