សៀមរាប ៖ ប្រជាពលរដ្ឋក៏ដូចជាភ្ញៀវជាតិអន្តរជាតិ បានធ្វើការរិះគន់យ៉ាងខ្លាំងៗទៅលើអាជ្ញាធរក្រុងសៀមរាបថា មិនអើពើពីទង្វើរបស់អ្នកដាក់ផ្ញើរកង់ម៉ូតូដែលយកផ្លូវសាធារណៈមកធ្វើជាកន្លែងដាក់ផ្ញើរកង់ម៉ូតូយកលុយច្រកហោប៉ៅយ៉ាងអានាធិបតេយ្យ បង្កអោយមានការកកស្ទះចរាចរណ៍ ប៉ះពាល់សណ្តាប់ធ្នាប់និង សន្តិសុខសង្គម។ 
កន្លែងដែលអ្នកដាក់ផ្ញើរកង់ម៉ូតូយកផ្លូវសាធារណៈអានាធិបតេយ្យនេះ ស្ថិតនៅខាងកើតឈាងខាងជើងផ្សារចាស់ ភូមិមណ្ឌល១ សង្កាត់ស្វាយដង្គុំ ក្រុងសៀមរាប ខេត្តសៀមរាប។
ប្រភពពីប្រជាពលរដ្ឋដែលបានធ្វើដំណើរឆ្លងកាត់កំណាត់ផ្លូវមួយនេះបាន រអ៊ូរទាំពីការកកស្ទះចរាចរណ៍ស្ទើរបើកម៉ូតូទៅមុខមិនរួច ព្រោះចំណីផ្លូវត្រូវបានគេយកធ្វើជាកន្លែងដាក់ផ្ញើកង់ម៉ូតូអស់ទៅហើយមិនខ្វល់ពីអ្នកធ្វើដំណើរសោះ។ អ្នកតែងធ្វើដំណើរឆ្លងកាត់នៅទីនោះបាននាំគ្នានិយាយរិះគន់ទៅលើសមត្ថកិច្ចថាមិនបានខ្វល់ខ្វាយយកចិត្តទុកដាក់និង មើលរំលងពួកអ្នកទាំងនោះដែលបានបំពានច្បាប់។
ការដាក់ម៉ូតូតាមដងផ្លូវមួយនេះ ពិតជារញ៉េរញ៉ៃគ្មានសណ្ដាប់ធ្នាប់បែបអានាធិបតេយ្យបង្កឲ្យមានផលប៉ះពាល់យ៉ាងខ្លាំង ដូចជាបាត់បង់សោភ័ណភាពទីក្រុងស្អាតដែលរាជរដ្ឋាភិបាលកម្ពុជាកំពុងតែជំរុញឲ្យមានការកែប្រែទូទាំងប្រទេស គឺ (ទីក្រុងស្អាត រមណីយដ្ឋានស្អាត សេវាល្អ )។
ប្រជាពលរដ្ឋរស់នៅបវិវេណនោះពួកគាត់ធុញទ្រាន់ជាខ្លាំង។ ប្រជាពលរដ្ឋ ម្នាក់រស់នៅផ្សារចាស់សុំមិនបញ្ចេញឈ្មោះបានលើកឡើងថាការដាក់ផ្ញើរកង់ម៉ូតូបែបអានាធិបតេយ្យនេះប្រហែលជាមានខ្នងអ្នកធំនៅពីក្រោយហើយ បានជាពួកអ្នកប្រកបរបររកស៊ីផ្ញើរកង់ម៉ូតូមិនរវីរវល់ពីច្បាប់យ៉ាងដូច្នោះ។ គាត់បានបន្តថានៅបរិវេណផ្សារចាស់កណ្តាលក្រុងសៀមរាបឥឡូវរញ៉េរញ៉ៃណាស់ អ្នកគ្រប់គ្រងផ្សារមិនរវល់អើពើយកចិត្តទុកក្នុងការរក្សាសណ្តាប់ធ្នាប់បន្តិចសោះឡើយ តែបែជា បណ្តែតបណ្តោយអោយទៅជាសភាពបែបនេះវិញ។ កន្លែងនេះគេរកស៊ីផ្ញើរកង់ម៉ូតូរយៈពេលច្រើន ឆ្នាំហើយព្រោះកន្លែងមានភាពងាយស្រួលម្រាប់ពួកអ្នករកស៊ី តែប្រជាពលរដ្ឋមិនងាយស្រួលក្នុងការធ្វើចរាចណ៏។
ពាក់ព័ន្ធបញ្ហានេះដែរ អ្នកយកព័ត៏មានវេបសាយខេមរាយើងបានព្យាយាមទាក់ទងទៅ លោក ស៊ូប្លា តុង អភិបាលក្រុងសៀមរាបដែលទើបកាន់ដំណែងថ្មីដើម្បីសុំការបំភ្លឺដែរប៉ុន្តែទូរស័ព្ទរបស់លោកស្ថិតក្រៅប្រព័ន្ធសេវា។ អាជ្ញាធរក្រុងតាមការអោយដឹងថាធ្លាប់បានចុះទៅអប់រំ និងពន្យល់ពីបញ្ហាច្បាប់ដែរតែពួកអ្នករកស៊ីទាំងនោះមិនព្រមស្តាប់ ក្រោយមកបានបញ្ជូនខាងកម្លាំងសមត្ថកិច្ចចុះទៅបង្ក្រាប និងហៅមកអប់រំជាច្រើនលើកច្រើនសាដែរ តែក្រុមអ្នកស៊ីទាំងនោះមិនបានរាងចាលទេនៅតែដាក់។ដោយ ខេង ឧត្តម
