កំពង់ឆ្នាំង៖របងថ្មប្រវែង១០ម៉ែត្ររបស់មន្ទីរពេទ្យខេត្តផ្នែកខាងជើងរលំបាក់បែក ដោយសារ រថយន្តបូមលូមួយគ្រឿងរបស់សាលារាជធានីភ្នំពេញ បើកថយក្រោយបុកបាក់ទាំងព្រឹក ហើយត្រូវបានគេចាប់អោយសង។ករណីនេះបានកើតឡើងនៅវេលាម៉ោង៧និង២៤នាទី ព្រឹកថ្ងៃទី១៩ខែមករា ឆ្នាំ២០១៥នៅរបងផ្នែកខាងជើងមន្ទីរពេទ្យខេត្ត ស្ថិតក្នុភូមិកណ្តាល សង្កាត់កំពង់ឆ្នាំងក្រុងកំពង់ឆ្នាំង។ សមត្ថកិច្ចនគរបាលចរាចរណ៍ក្រុងកំពង់ឆ្នាំងបានអោយដឹងថា៖នៅមុនពេលកើហេតុអ្នកបើកបររថយន្តបូមលូ២គ្រឿងបានបើករថយន្តទៅចតនៅខាងជើងរបងមន្ទីរពេទ្យខេត្ត ដើម្បីចុះហូបអាហារពេលព្រឹកនៅម្តុំនោះ។ពេលហូបអាហារពេលព្រឹកហើយអ្នកបើកបររថយន្តពាក់ស្លាលេខរដ្ឋ២៥ 3-0122 បានឡើងបើករថយន្តបត់ថយក្រោយត្រឡប់មកទិសខាងលិចលើផ្លូវជាតិវិញ ពេលនោះអ្នកបើកបរមិនប្រយត្ន័ក៏បានថយបុករបងថ្មមន្ទីរពេទ្យខេត្តបាក់អស់១ផ្ទាំងធំ មានប្រវែងប្រមាណ១០ម៉ែត្រ បន្ទាប់មកបានបើករថយន្តគេចមកឈប់នៅមុខមន្ទីរពេទ្យខេត្ត ហើយត្រូវបានសមត្ថកិច្ចននគរបាលចរាចរណ៍ក្រុងកំពង់ឆ្នាំងឃាត់ជាប់។
ករណីនេះសមត្ថកិច្ចបានអោយអ្នកទទួលខុសត្រូវរបស់រថយន្តបង្កទៅជួបដោះស្រាយជាមួយប្រធានមន្ទីរពេទ្យខេត្តកំពង់ឆ្នាំងអោយបានរួចរាល់ទើបអនុញ្ញាតអោយយករថយន្តបង្កត្រឡប់ទៅអង្គភាពខ្លួនវិញ។
លោក ស សាវ៉ាត ប្រធានរដ្ឋបាលមន្ទីរពេទ្យខេត្តបាននិយាយអោយដឹងនៅព្រឹកថ្ងៃទី១៩ ខែមករា ឆ្នាំ២០១៥នេះថា៖ការខូចបែកបាក់របងថ្មមន្ទីរពេទ្យផ្នែកខាងជើងប្រមាណ១០ម៉ែត្រនេះ អ្នកទទួលខុសត្រូវរថយន្តបូមលូ បានធ្វើកិច្ចសន្យាធានាហៅជាងមកជួសជុសអោយបានស្អាតបាតសងវិញ។ដែលតាមការវាយតម្លៃរបស់ជាងក្នាក់ថា ការបែកបាក់នេះអាចជួសជុលអស់ពី២០០ទៅ៣០០ដុល្លា។
សមត្ថកិច្ចបានអោយដឹងថា៖ក្រោយពីបានសម្របសម្រួលជាមួយលោកប្រធានរដ្ឋបាល
មន្ទីរពេទ្យខេត្តរួចមក សមត្ថកិច្ចក៏បានអនុញ្ញាតិអោយរថយន្តបង្កវិលត្រឡប់ទៅធ្វើការងារខ្លួនវិញ។ករណីបង្កការខូចខាតនេះ សមត្ថកិច្ចសន្និដ្ឋានថាមកពីអ្នកបើកបរស្មានកន្ទុយរថយន្តខ្លួនឯងមិនត្រូវ។ព្រោះថាបន្ទាប់ពីកាងក្រោយរថយន្តមក រថយន្តបូមលូដ៏ថ្មីនេះត្រូវបានគេតដែកចេញមកក្រោយប្រវែងកន្លះម៉ែត្រទៀត ហេតុដូច្នេះហើយទើបអ្នកបើកបរស្មានមិនត្រូវក៏ថយបុករបងថ្មមន្ទីរពេទ្យចាស់នោះបានបាក់អស់ប្រមាណ១០ម៉ែត្រតែម្តងទៅ៕
