សៀមរាប : ក្នុងកិច្ចចុះប្រតិបត្តិការណ៍ខាងលើត្រូវបានធ្វើឡើងកាលពីថ្ងៃទី ២០ ខែ មករា ឆ្នាំ ២០១៥កន្លងទៅ ក្រោមការបញ្ជាដឹកនាំកម្លាំងផ្ទាល់ពីសំណាក់លោក វរសេនីយ៍ឯក ចៅ ម៉ៅ វីរះ ស្នងការរងទទួលបន្ទុកអន្តោប្រវេសន៍នៃស្នងការដ្ឋាននគរបាលខេត្តសៀមរាបនិងលោក វរសេនីយ៍ត្រី ជា គឹមសាន នាយការិយាល័យអន្តោប្រវេសន៍នៃស្នងការដ្ឋាននគរបាល
ខេត្តសៀមរាប ។ លោក វរសេនីយ៍ឯក ចៅ ម៉ៅ វីរះ បានអោយដឹងថាដោយអនុវត្តតាមការយកចិត្តទុកដាក់ខ្ពស់ជាប្រចាំពីសំណាក់ឯកឧត្តម នាយឧត្តមសេនីយ៍ សុខ ផល អគ្គនាយក នៃអគ្គនាយកដ្ឋានអន្តោប្រវេសន៍ ក្រសួងមហាផ្ទៃ ក៏ដូចជាលោក ឩត្តមសេនីយ៍ទោ សត ណាឌី ស្នងការនគរបាលខេត្តសៀមរាប និងដើម្បីធ្វើអោយការអនុវត្តនូវគោលនយោបាយភូមិឃុំមានសុវត្ថិភាព អោយ កាន់តែមានប្រសិទ្ធភាពខ្ពស់ផងនោះ ។ ជាក់ស្តែងកម្លាំងនគរបាលការិយាល័យអន្តោប្រវេសន៍នៃស្នងការដ្ឋាននគរបាលខេត្តសៀមរាបតែងតែបានចុះធ្វើការត្រួតពិនិត្យការងាររដ្ឋបាលចំពោះជនបរទេសដែលរស់នៅក្នុងក្រុងសៀមរាបនិងមកប្រកបរបផ្សេងៗ ផងដែរ ។ ដោយលោកវរសេនីយ៍ឯក ចៅ ម៉ៅ វីរះ ស្នងការរងទទួលបន្ទុកអន្តោប្រវេសន៍នៃស្នងការដ្ឋាននគរបាលខេត្តសៀមរាបបានបញ្ជាក់ថាបន្ទាប់ពីកម្លាំងសមត្ថកិច្ចជំនាញក្នុងការិយាល័យរបស់លោកបានទទួលព័ត៍មានពីប្រជាពលរដ្ឋថាបុរសជនជាតិ រុស្ស៊ី ម្នាក់មកជួលបន្ទប់ដើម្បីស្នាក់នៅហើយមិនព្រមបង់លុយថ្លៃឈ្នួលបន្ទប់ស្ថិតនៅក្នុងភូមិ មណ្ឌល ៣ សង្កាត់ ស្លក្រាម ក្រុងសៀមរាប ភ្លាមៗ នោះសមត្ថកិច្ចជំនាញក៏បានចុះទៅដល់ទីតាំងផ្ទះជួលបន្ទប់ខាងលើនិងបាននាំខ្លួនបុរសជនជាតិ រុស្ស៊ី ម្នាក់នេះដែលមិនស្គាល់អត្តសញ្ញាណយកមកកាន់ការិយាល័យនគរបាលជំនាញដើម្បីធ្វើការសួរនាំបន្ត ។ បន្ទាប់ពីសមត្ថកិច្ចបានធ្វើការឃាត់ខ្លួននិងបានធ្វើការសួរនាំនិងត្រួតពិនិត្យរកមើលឯកសារពីជនបរទេសរូបនេះមិនមានលិខិតឆ្លងដែន ឫ ឯកសារសម្គាល់ខ្លួនហើយនោះរហូតមកដល់ថ្ងៃទី២១ខែមករានេះសមត្ថកិច្ចបានបញ្ជូនខ្លួនបុរសជនជាតិ រុស្ស៊ី ម្នាក់នេះទៅកាន់អគ្គនាយកដ្ឋានអន្តោប្រវេសន៍ ក្រសួងមហាផ្ទៃ ដើម្បីចំណាត់ការទៅតាមផ្លូវច្បាប់បន្តដោយចោទប្រកាន់ពីបទស្នាក់នៅខុសច្បាប់៕
លោក ខេង ខេមរា
